Read lulogooli Isaya 50 Bible Online

Isaya 50 - lulogooli bible

Isaya 50

¹Yahova a vola ndi, I veye haliha ibaruwa yelikungwa lya mama wowo, ya nda mu kungira? Naho mu yavo avamagovi gange nu u li ha wa nda gulidza ive? Henza, mwa gulwa kigira budamano bwenyu, kandi mama wenyu ya kungwa kigira mahyolo genyu mwinye.

²Kunangwa, ni kindu ki, lwa ndadza mundu si ya li ho? Lwa nda langa, mundu si ya li ho wa ntivulira? Mukono gwange gu gehidzwi, gu ta nyala kandi kutungira? Naho inze si mbeye netsingulu tsyokuhonnya? Henza, ku ligondoka lyange nkaminya inyanza, nkola migera gyamadzi kuva kyangalangwi: tsisudzi tsyagyo tsi funya, kigira si ha veye namadzi, nokukudza kigira ubuluhu.

³Inze nda vika ligu lu nekisundi, na nda lomba kikuniko kyalyo kuva tsingubo tsyamagunia.

⁴Yahova Nyasaye u mali kumba ululimi lwa yavo avegidzwa, nduke kumanya kuli nyala kukonya namakuva gange uyu u luhi: a vukidzanga mugamba nomugamba, a vukidzanga ugutu gwange kuhulira kuli yavo avegidzwa.

⁵Yahova Nyasaye u nziguye ugutu gwange, na si nda li mutingu, kandi si ndirana inyima.

⁶Nda haana mugongo gwange ku yava vakuyi, na tsisaya tsyange nda sunda ku yavo ava manyula tsinderu tsyange: si nda visa mmoni mwange ku kihenyahenye nokutudzirwa amate.

⁷Kigira Yahova Nyasaye a la nkonya; kigira yaga nda vula kuva isoni: kunangwa nda vika mmoni mwange kuli ligina lidinyu, na inze manya si nda nyola tsisoni.

⁸Uyu u mbedzanga ubulungi a veye himbi; ni bwaha u la hing'ana ninze? Ku singire halala: ibwaha u veye muhing'ani wange? Yisunde himbi ku inze.

⁹Henza, Yahova Nyasaye a la nkonya; ni bwaha u nkalagira mbeye muhyoli? Henza, yava vosi va la kunguha kuli ingubo; na tsisere tsi la va lia.

¹⁰Ni bwaha hagati henyu u tidzanga Yahova, na u huliranga mwoyo gwomutumekiri wewe? Uyu a gendanga mkisundi, na si a veye nobulavu, a suuvire ku lieta lya Yahova nokwidira ku Nyasaye wewe.

¹¹Henza, mwosi ava fwananga muliru, mwinye avebohanga netsimuli tsyomuliru; mu gende mu lumemo lwomuliru gwenyu, na hagati hetsimuli tsyomuliru gwa mwa fwana. Mu la nyola yivi ku mukono gwange; na mu la gona hasi nobuverereri.