Read lulogooli Isaya 54 Bible Online

Isaya 54 - lulogooli bible

Isaya 54

¹Yimba, ive mugumba, na ive wa vula kuvereka; leta lwimbu, wimbe, kupa lwanga ligali, ive wa vula kuva nelilumwa lyelivula: kigira avana va uyu mugalang'atani va veye avanyingi kuvita avomukali wa hilwa, Yahova a vola.

²U vambule ubwiyangu bwelihema lilyo, navo va sunde imbiri tsingubo tsyokukinga tsyobumenyo bubwo; u tigalira mba, u kole migoye gyigyo mitambi, u vike tsingulu ku vivambo vivyo.

³Kigira u la vambuka ku luvega lwomukono mulungi noku mukono mmosi: nekisukululwi kikyo ki la gumira tsihiri, na madala ga kolwa hatswa a la ga kola avandu kumenya mu.

⁴U ta tia mba; kigira si u la va isoni mba: kandi u ta genya mba; kigira si u la leganywa mba; kigira u livirira tsisoni tsyobwana buke bubwo, na manyego gobukunzakali bubwo si u la gidzulira mba.

⁵Kigira Mulombi wowo a veye musatsa wowo; Yahova wa mahe ni lieta lilye: Mutakatifu wa Israeli a veye Mutu ngiri wowo; a la langwa Nyasaye welirova lyosi.

⁶Kigira Yahova u ku langi kuli mukali wa lekwa nokuvereridzwa mmwoyo, kuli mukali musuhya, inyinga a kungangwa, Nyasaye wowo a vola.

⁷Ku idakika inkekeke nda ku leka; navutswa ku tsimbabasi tsinene tsyemihiga nemihiga nda ku vungidza.

⁸Ku livihirirwa lya vita kigero nda ku visa mmoni mwange ku idakika indala; navutswa ku bulahi bu hongeranga mihiga nemihiga nda ku vererera, Yahova Mutungiri wowo a vola.

⁹Kigira inkuva yiyi i gwiye kuli amadzi ga Nuhu ku inze; kigira kuli ndisuha amadzi ga Nuhu ga la vula kutsia ku lirova kandi, ni ndiyo ndisuha si nda va nobutima ku ive, kinga kukugondokera.

¹⁰Kigira vigulu vi la twula, notugulu tu ladikidzwa; navutswa tsimbabasi tsyobuyanzi bwange si tsi la twula ku ive mba, nelilagana lyemirembe lyange si li la twulidzwa mba, Yahova a vola, uyu u vererera Ive.

¹¹O ive welidambidzwa, u sung'usangwanekihi, u vula kuleminywa mwoyo, henza, nda vika magina gogo mu tsirangi tsindahi, na nda tema muse gugwo netsisafiro.

¹²Na nda lomba madirisha gogo namagina makanyu, neviribwa vivyo vi la va mang'ereng'anu, netsinzako tsitsyo tsyosi tsi la va magina ga yanzidzanga.

¹³Na avana vovo vosi va legidzwa ku Yahova; nemirembe gyavana vovo gyi la va minene.

¹⁴U la dinyeridzwa mu bulungi: u la va ihale ku lidambidza, kigira si u la tia mba; na ihale ku litihidza, kigira li la vula kwisunda himbi ku ive.

¹⁵Henza, va la vugana halala, navutswa si ga veye ku likuva lyange: ku vosi ava vugana halala ku ive va la gwa kigira ive.

¹⁶Henza, mali kulomba mutuuli u hudziranga muliru gwamanda, nokutwulidza ikiju a duke kukola miyinzi gyigye; kandi nombi wokugotidza a duke kwononnya.

¹⁷Si ha veye nekiju kya lombwa kuhing'ana nive ki li gasidzwa; noku tsinimi tsyos; lu li vuka ku ive mu likalaga ive u la lu kalagira lu ve lwa mahyolo. Yigyi ni miyandu gya yavo avatumekiri va Yahova, nobulungi bwavo bu twulanga ku inze, Yahova a vola.