Read lulogooli Isaya 57 Bible Online

Isaya 57 - lulogooli bible

Isaya 57

¹Mulungi a diva, na si ha veye nomundu u ga vika mmwoyo; avetsimbabasi va twulidzangwa, na si ha veye na u ganagana avalungi va twulidzwa ku budamano budzanga.

²Uyu wingiranga mmirembe; va sosa mu vitali vyavo, yavo sa mulala u gendanga mbulungi bwibwe.

³Navutswa mwisunde himbi hano, mwinye avana vomukali musegetiri, lwivulu lwomuheyi nowamalaya.

⁴Mu kinira ku bwaha? Mu kunula minwa ku bwaha, nokunyira lulimi? Si mu veye avana va mahyolo, lwivulu lwobubehi,

⁵mwinye ava hambidzanga muliru gwelikayirwa hagati hevifwananyi, isi wemisala gyosi mivisi; mwinye aviitanga avana mu mavona, isi wetsiimbwa tsyetsinyanda?

⁶Kidieli kyenyu ki veye mu magina gomwivona amatereru; yaga ga veye ikura yoyo; ive u tsukanga kihaanwa kyokunwa kugo, u haananga kisyuu viriru. Nnyala nevindu yivi kuhambanywa na mwinye?

⁷Wa vika kitali kikyo ku kigulu kitambi, kya diguluka ligali; wa tsia ha zana u duke kuhaana vihaanwa vivyo.

⁸Kandi wa singeridza kyokwidzulitsa kikyo inyima womuliango na inyima wetsitiru: kigira wevimbula ive mwene kuvimbulira wundi si a veye inze na u nini igulu, u vambalalidzi kitaii kikyo, na u koli lilagana na yavo: wa yanza kitali kyavo ha wa ki lola.

⁹Na wa tsia ku mwami na maguta, nokumeda vyomwayu vivyo, wa tuma avatumwa vovo va tsia ihale, na welegannya ive mwene kuduka mu Kihadisi.

¹⁰Wa luha kigira butambi bwenzira yoyo; navutswa wa vula kuvola, ga veye ga vutswa; wa nyola livukidzwa lyetsingulu tsitsyo; kigira yaga wa vula kukudza mwoyo.

¹¹Kandi u tiye ibwaha nokuva mu butii, na u luhe u veha, na u vula kwidzulitsa inze, kandi si wa vika mwoyo mu likuva yili? Inze si nkiring'ani tsinyinga tsinyingi, na ive wa vula kuntia?

¹²Nda lang'aminya ubulungi bubwo; noku likola lilyo, si li la ku konya mba.

¹³Lwa u lira, yavo ava wa vungidza va ku honnye; navutswa imbuudza i la va hila mwika gu la va hila vosi: navutswa uyu u suuviranga mu inze a la nyola miyandu gyelirova, nekigulu kyange kitakatifu.

¹⁴Naye a la vola, Mu lombe, mu lombe, mu lungekidze inzira, twulidza vyokwikigitala ku inzira yavandu vange.

¹⁵Kigira Mulala u veye igulu ligali wa nenehidzwa u menya nga mu mihiga nemihiga, welieta lilye li veye Litakatifu, a vola: Inze menya hadiguluku na hatakatifu, halala na uyu u veye na roho gwokweganira nokwegehidza, nduke kusimugukidza roho gwa vegehidzi, nokusimugukidza myoyo gya yavo aveganiranga.

¹⁶Kigira si nda hangala madiku gosi, kinga kuva nobutima madiku gosi; kigira nkano roho gwa ka kudza imbiri wange, na myoyo gya nombi.

¹⁷Kigira ubudamano bwelikayirwa lilye nda mu vihirirwa, nokumukuya; nda visa mmoni mwange ni mbihiri rwa; na ya hongera kwirana inyima ku inzira yomwoyo gwigwe.

¹⁸Ndoli tsinzira tsitsve, nda mu honnya: nda mwimirira kandi, nokumwirannyira vyokumuleminya noku yavo ava syomanga.

¹⁹Inze mbeye mulombi wa makuyu geminwa: Mirembe, mirembe, ku uyu u veye ihale noku uyu u veye ahimbi, Yahova a vola; nda mu honnya.

²⁰Navutswa avadamano va leng'ana nenyanza i hinu lannyangwa; kigira si i nyala kusosa, namadzi gayo gu hulanga ubudohi na amandu.

²¹Si ha veye nemirembe ku avadamano, Nyasaye wange a vola.