Read lulogooli Isaya 59 Bible Online

Isaya 59 - lulogooli bible

Isaya 59

¹Henza, mukono gwa Yahova si gu gehanga ubutambi bwagwo, gu vule kuhonnya; kandi ugutu gwigwe si gu veye muliduhu, gu vule kuhulira:

²navutswa ubudamano bwenyu bwavukannyi hagati henyu na Nyasaye wenyu, nobwoni bwenyu bu visi mmoni mwimwe ku mwinye, kuduka si a la hulira.

³Kigira makono genyu gononnyeywi namasahi, na videte vyenyu nobudamano; minwa gyenyu gyi vola bubehi, netsinimi tsyenyu tsi monyanga budamano.

⁴Si ha veve nomulala wenyanga mu ubulungi, kinga mulala waniranga mu ageligali: va suuvira vya vutswa, ni va vola bubehi; va vereka inda yekivi, nokwivula ubudamano.

⁵Va lulanga mabuyu gekihirigoma, nokunava miluvo gyetsimbuvi: uyu u litsanga mabuyu gavo a kudzanga; na lyatanyangwa li twulanga inzoka.

⁶Miluvo gyavo gyi la vula kuva tsingubo, kandi va la vula kwikunika nemiyinzi gyavo: miyinzi gyavo gyi veye miyinzi gyobudamano, na likola lyekirage li veye mu makono gavo.

⁷Virenge vyavo vi nyagula tsimbiru kukola budamano, navo va kola bwangu kut ahidzo masahi ga ta li nekindu: tsiganagani tsyavo tsi veye tsyobudamano; mu mahasi gavo ha veye vutswa nobwoneku.

⁸Si va manya inzira yemirembe; si ha veye nelikalaga lilungi mu tsing'endo tsyavo: velombeye tsinzira tsyobukyamu; ku vosi u genda kutsyo si a manya mirembe mba.

⁹Kigira yaga likalaga lyobulungi li veye ihale nekwinye, kandi ubulungi si bu ku nyola: kwenyanga bulavu, navutswa henza, ni kisundi; kwenyanga ubwaku, navutswa, ku gendanga mkisundi kinene.

¹⁰Ku havatidzanga kwenya lidigi kuli mboku, yee, ku havatidzanga kuli yavo ava ta li netsimoni: kwikigitalanga inyinga yombasu hagati kuli inyinga ya isi ing'iring'ana; hagati ha yavo avalamu ku veye kuli avakudzu.

¹¹Kwosi kufwumanga kuli tsiduba, na ku liranga kuli makulu: kwenyanga likalaga lyobulungi, navutswa si li veye ho; kwenyanga ubuhonnyi, navutswa bu veye ihale ku kwinye.

¹²Kigira mahyolo getu ga medeka livalidzwa lyago imbiri wowo, na bwoni bwetu bu letanga lilolekidza ku kwinye; kigira mahyolo getu ku veye nago halala, noku budamano bwetu, ku bu manya:

¹³mu lihyola nokwambakana Yahova, nokugirunkana kuvula kulonda Nyasaye wetu, nokuvola lidambidza nekirage, lisaavira nokutwulidza mu myoyo makuva gobubehi.

¹⁴Likalaga li girunkanywa kutsia inyuma, na bulungi bu singiye ihale; kigira ageligali ga gwiye mu lihasi, na bulungi si bu nyala kwingira.

¹⁵Yee, ageligali ga gehi ligali; na uyu u lekanga ubudamano yekolanga kuva kilanye. Na Yahova ya lola yaga, nago ga mu vihiridza kigira si li veye ho likalaga lyobulungi.

¹⁶Na ya lola si ha veye nomundu, na ya genya kuvasi ha veye nomundu u saala: kigira yaga mukono gwigwe mwene gwa mu letera ubuhonnyi, nobulungi bwibwe bwamudinyeridza.

¹⁷Nayeyivika bulungi kuli isalamba yomkiritu, na igudwa yobuhonnyi yekivya ku mutwe gwigwe; na yivika lyevika lyekisalya kuva tsingubo tsitsye, na ya vikwa ubugulu kuva kuli ijoho.

¹⁸Kuli likola lyavo, ni ndiyo a la tunga, ubululu ku yavo ava hing'ana naye, litunga ku avasigu veve; visulu a la vi tunga litungwa.

¹⁹Ni ndiyo va li tia lieta lya Yahova kutwula madioli, nobukumi bwibwe kutwula butwuliru bweliuva; kigira lwa uyu musigu a ladza kuli mugera gwamadzi gwizuye, Roho wa Yahova a la singeridza ibendera kuye.

²⁰Na Mutungi a Iadza ku Zioni, nokuduka ku yavo ava girunkana nokuleka mahyolo mu Yakobo, Yahova a vola.

²¹Mu makuva gange, lilagana lyange halala navo ni yili, Yahova a vola: Roho wange u veye ku ive, na makuva gange ga mbiki mu munwa gugwo, si ga la twula mu munwa gugwo mba, kinga mu munwa gwekisukululwi kikyo, kinga mu munwa gwevisoni vivyo, Yahova a vola, kutwula kalunu kuduka mihiga nemihiga.