Read lulogooli Isaya 66 Bible Online

Isaya 66 - lulogooli bible

Isaya 66

¹Yahova a vola yaga, Ligulu li veye intebe yange yobwami, na lirova li veye intebe yevirenge vyange: mu la nyombakira inyumba yo lugano ki? Kandi ni haliha ha duka kuva hango hange hokusosa?

²Kigira makono gange ga lombi vindu yivi vyosi, ni ndiyo vya li ho vindu yivi vyosi. Yahova a vola: navutswa nda henza ku mundu uyu, yee, uyu u veye mudaka na womwoyo gwelyeganira, welidegera kigira likuva lyange.

³Uyu wiita ing'ombe a veye kuli wiiti mundu; uyu u haana kihaanwa kyeligondi a veye kuli uvunannya ligoti lyembwa; na uyu u haananga kihaanwa kyokunwa, a veye kuli u haananga masahi gempidzi na u vuyidzanga kimuli, a veye kuli u gasidzanga kifwananyi. Yee, va tovoye tsinzira tsyavo avene, na mwoyo gwavo gu sangalira livihiridza lyavo:

⁴na inze kandi nda tovola ubugadi bwavo, nobutii bwavo nda leta kuvo; kigira lwa nda langa, si ha li nomundu wa bugirira; lwa nda vola, si va hulira: navutswa va kola vyobudamano imbiri wetsimoni tsyange, nokutovola aga inze nda vula kuyanza.

⁵Mu hulire makuva ga Yahova, mwinye ava degeranga kigira makuva gege: Avamwavo venyu ava dunyira mwinye, ava syuva mwinye kyova kigira lieta lyange, va voye, Yahova a kuminywe, kuduke kulola ubuyanzi bwenyu; navutswa ni yavo va la va isoni.

⁶Mwoyo gwekivihiri gu twulanga mu lidala, mwoyo gu twulanga mu litempeli, mwoyo gwa Yahova wa vanziranga kisalya yavo avasigu veve.

⁷Na a kikiri kulumwa, yivula; lilumwa ni li kikiri kuduka kuye, yivula mwana muyai.

⁸Ni bwaha u huliye makuva kuli yaga? Ni bwaha u loli vindu kuli yivi? Kivala ki livulwa ku lidiku lilala? Ihiri i livulwa nonoho? Kigira nonoho lwa Zioni lya lumwa, livula avana valyo.

⁹Inze ndete avana va duke kwivulwa, ni mbula kwivulidza? Yahova a vola: Inze nzivulidze, mbohe inda? Nyasaye wowo a vola.

¹⁰Mu sangala halala na Yerusalemi, muyanzi kulyo, mwinye vosi va mu yanza: mu sangale nobuyanzi halala nalyo, mwosi ava syomanga kulyo;

¹¹mu duka kununa nokwiguta ku tsimbeere tsyelileminya mwoyo lilyo; mu duke kukera, nokusangalira bunyingi bwobukumi bwibwe.

¹²Kigira Yahova a vola ndi, Henza, nda meda kuye mirembe kuli mugera, nobukumi bwa vetsihiri kuli mugera gwizuye: na mu la nuna kugwo; mu la hagatwa, nokukinywa ku magulu.

¹³Kuli uyu wa mama wewe a leminyanga mwoyo, ni ndiyo nda leminya myoyo gyenyu; mu la leminywa myoyo mu Yerusalemi.

¹⁴Mu la lola yaga, na mwoyo gwenyu gu la sangala, nevigumba vyenyu vi la dedema kuli bunyasi budoto: na mukono gwa Yahova gu la manyekana ku vatumekiri veve; naye a la va nobutima ku avasigu veve.

¹⁵Kigira, henza, Yahova a ladza nomuliru, na magari gege gobulwani ga la va kuli kihudzudzi; kutunga ubutima bwibwe nobululu, neligondoka lilye lyolumemo lwomuliru.

¹⁶Kigira Yahova a la leta likalagirwa ku ave mibiri vosi, ku muliru, noku kivavi kikye; na yavo ava Yahova a liita va la va avanyingi.

¹⁷Yavo aveyahulanga nokwetakasa avene kwingira mu mulimi, inyima womulala u veye hagati, yava va veye mu lilia inyama yempidzi, nelivihiriridza nembeba; va la hera halala, Yahova a vola.

¹⁸Kigira manya miyinzi gyavo, netsiganagani tsyavo: inyinga yidzanga, ya nda vungidza halala tsihiri tsyosi, netsinimi tsyosi; navo va ladza, va la lola ubukumi bwange.

¹⁹Nda vika kilolekidzu hagati havo na yavo va li hona mu avandu yavo nda va twulidza va tsie mu tsihiri, Tarshishi, na Puli, na Ludi, ava tumekiranga ubuta, na Tubali, na Javan, ku visulu vyehale ligali, vi kikiri kuhulira lidzominywa lyange, kinga kulola ubukumi bwange; va la landidza ubukumi bwange mu tsihiri.

²⁰Va la leta avamwavo venyu vosi kutwula mu tsihiri tsyosi kuva kihaanwa kyokuhaana ku Yahova, ku tsiparasi, noku magari, noku luderu, noku tsinyumbu, noku inyama yetsimbiru ligali va duke ku kigulu kyange kitakatifu, Yerusalemi, Yahova a vola, kuli avana va Israeli va leta vihaanwa vyavo mu kiju kilahi mu inyumba ya Yahova.

²¹Kandi mu avandu yavo nda vugula mu avandu va ve avasalisi na Avalevi, Yahova a vola.

²²Kigira kuli ligulu lihya nelirova Iihya, lya nda lomba, vi menya imbiri wange, Yahova a vola, ni ndiyo kisukululwi kyenyu ki la menya, ni lieta lyenyu.

²³Na ga la duka, kutwula mweli muhya mulala, kuduka ku gundi, nokutwula ku lisabato lilala kuduka ku lindi, avemibiri vosi va ladza kusigamira imbiri wange, Yahova a vola.

²⁴Na va la twula, va la henza mibiri mikudzu gyavandu ava hyola ku inze: kigira ing'ende yavo i la vula kukudza, kandi muliru gwavo gu la vula kusiminywa; na va la va livihiriridza ku vemibiri vosi.