Read lulogooli Kyavalevi 14 Bible Online

Kyavalevi 14 - lulogooli bible

Kyavalevi 14

¹Kandi Yahova ya volera Musa, na a vola,

²Yili li la va lilaga lyomugere mu lidiku lyelitakaswa lilye: a la letwa ku musalisi:

³na musalisi a la tsia kyova wa hokusosa; na musalisi a la henza; na henza, lilwala lyobugere ni li va ni li honi ku mugere,

⁴heneyaho musalisi a la laga ga vugulirwe uyu a la takaswa, manyonyi gaviri malahi ga veye mwoyo, na musala gwa mutaragwa, na inzakanyu, na husupo:

⁵na musalisi a la laga kwiita lilala ku manyonyi mu inyingu igulu ku madzi gomugera.

⁶Kandi linyonyi li veye mwoyo a la li gumira, na mutaragwa, na inzakanyu, na husupo, navyo vyosi a la viina mu masahi gelinyonyi liitwa igulu ku madzi gomugera:

⁷na a la guuha hali gatano na gaviri ku uyu wa li kutakaswa ku bugere, na a la vola a veye mulahi, na a la lakula linyonyi li veye mwoyo, li tsie.

⁸Na uvu wa li kutakaswa a logidza tsingubo tsitsye, nokuvega lisu lyosi lilye nokwisinga mu amadzi; na a la va mulahi: na inyima wa yaga a lingira mu hokusosa, navutswa a la menya kyova welihema lilye madiku gatano na gaviri.

⁹Na ku lidiku lya gatano na gaviri, a la vega lisu lilye lyosi lyoku mutwe gwigwe na tsinderu tsitsye na tsingohe tsitsye, kali lisu lilye lyosi a la vega: na a logidza tsingubo tsitsye, nokwisinga mubiri gwigwe mu amadzi, na a la va mulahi.

¹⁰Kandi ku lidiku lya gatano na gaviri a la leta vimeme viviri vikole vidukanu, na kimeme kisuvini kyomuhiga mulala kidukanu, na vidieli vibaka ku vyelikumi vyobusie, bunyuki kuva kihaanwa kyobusie bu tsukanywa namaguta, na kigero kyamaguta.

¹¹Na musalisi u mu takasanga a la singeridza mundu wa li kutakaswa, halala na vindu yivyo, imbiri wa Yahova, ha kiliango kyelihema lyokuvuganira mu.

¹²Na musalisi a la vugula kilala ku vimeme vikole, nokukihaana kuva kihaanwa kyelihyolo, halala nekigero kya maguta, na a la vi hungudza kuva kihaanwa kyokuhungudzwa imbiri wa Yahova:

¹³na a liitira kimeme zana ha vitiiranga kihaanwa kyobwoni, na kihaanwa kyokusambwa, hango hatakatifu: kigira kuli kihaanwa kyobwoni ki veye kyomusalisi, kandi kihaanwa kyelihyolo ki veye ndiyo: ki veye kitakatifu ligali.

¹⁴Na musalisi a la vugula ku masahi gekihaanwa kyelihyolo, na musalisi a la ga vika ku gutu gwomukono mulungi gwa uyu wa li kutakaswa, noku kidete kyomukono mulungi gwigwe, noku keno kinene kyekirenge kilungi kikye.

¹⁵Na musalisi a la vugula ku kigero kyamaguta, nokugatsuka mu kigalo kikye mwene kyomukono mmosi;

¹⁶na musalisi a liina kidete kyomukono mulungi mu maguta ga veye mu mukono gwigwe mmosi na a luuha maguta nekidete, hali gatano na gaviri imbiri wa Yahova:

¹⁷Noku maguta ga tigala mu mukono gwigwe a la ga vika ku isonga yo gutu gwomukono mulungi gwa uyu wa li kutakaswa, noku kidete kinene kyomukono mulungi gwigwe, noku keno kinene kyekirenge kilungi kikye, ku masahi gekihaanwa kyelihyolo:

¹⁸na maguta ga tigala mu mukono gwomusalisi a la vika ku mutwe gwa uyu wa li kutakaswa: na musalisi a la lombera uyu kyokukunika ubwoni imbiri wa Yahova.

¹⁹Na musalisi a la haana kihaanwa kyobwoni, nokulombera uyu wa li kutakaswa kyokukunika ubwoni kigira ubudamano bwibwe: na inyima a liita kihaanwa kyokusambwa;

²⁰na musalisi a la haana kihaanwa kyokusambwa, na kihaanwa kyobusie ku bwali: na musalisi a la lombera uyu kyokukunika ubwoni, naye a la va mulahi.

²¹Naye na a va na a veye mudaka, na si a nyala kunyola vi duka kuli ndiyo, hene yaho a la leta kimeme kikole kilala kuva kihaanwa kyelihyolo kuhungudzwa, kumulombera kyokukunika ubwoni, na kidieli kilala kyelikumi kyobusie bunyuki bwa tsukanywa na maguta kuva kihaanwa kyobusie, na kigero kyamaguta;

²²na makuulu gaviri, kinga makuulu matuge gaviri, kuli aga a nyala kunyola; na lilala li la va kihaanwa kyobwoni, na lindi li la va kihaanwa kyokusambwa.

²³Noku lidiku lya gatano na gavaka a la ga leta ku musalisi, ha kiliango kyelihema lyokuvuganira mu, imbiri wa Yahova, ga ve gelitakaswa lilye:

²⁴na musalisi a la vugula kimeme kyeligondi lyekihaanwa kyelihyolo, na kigero kyamaguta, na musalisi a la vi hungudza kuva kihaanwa kyokuhungudzwa imbiri wa Yahova.

²⁵Na a liita kimeme kyekihaanwa kyelihyolo; na musalisi a la vugula ku masahi gekihaanwa kyelihyolo, nokugavika ku gutu gwomukono mulungi gwa uyu wa li kutakaswa, noku kidete kinene kyomukono gwigwe mulungi, noku keno kyekirenge kikye kilungi.

²⁶Na musalisi a la tsuka maguta mu kigalo kyomukono gwigwe mmosi;

²⁷na musalisi a luuha maguta nekidete kikye kilungi ku maguta ga veye mu mukono gwigwe mmosi hali gatano na gaviri imbiri wa Yahova:

²⁸na musalisi a la vika maguta ga veye mu mukono gwigwe ku gutu gwomukono mulungi gwa uyu wa li kutakaswa, noku kidete kinene kyomukono gwigwe mulungi, noku keno kinene kyekirenge kikye kilungi, ku masahi gekihaanwa kyelihyolo:

²⁹na maguta ga tigala mu mukono gwomusalisi a la ga vika ku mutwe gwa uyu wa li kutakaswa, kumulombera kyokukunika ubwoni imbiri wa Yahova.

³⁰Na a la haana lilala ku makuulu, kinga ku makuulu matuge, kuli aga a nyala kunyola;

³¹kali ku yaga aga a nyala kunyola lilala li la va kihaanwa kyobwoni na lindi li la va kihaanwa kyokusambwa, halala na kihaanwa kyobusie: na musalisi a la lombera uyu wa li kutakaswa, kyokukunika ubwoni imbiri wa Yahova.

³²Yili ni lilaga lya uyu u veye nelilwala lyobugere, u ta nyala kunyola ki dukana nelitakaswa lilye.

³³Na Yahova ya volera Musa na Haruni, na a vola,

³⁴Lwa mwingira mu kivala kya Kanani, kya mmu ha kuva miyandu gyenyu, na lwa mbika lilwala lyobugere ku inyu mba yekivala kyemiyandu gyenyu;

³⁵hene yaho uyu mwene inyumba a la tsia kuvolera musalisi, nokuvola, Ndolanga ha veye kuli lilwala mu inyumba yange.

³⁶Na musalisi a la laga va twulidze viju vyosi mu inyumba, musalisi na a kikiri kwingira kuhenza lilwala, kuduka vindu vyosi vi veye mu inyumba vi vule kukolwa vidamano: na lwenyima musalisi a lingira kulola inyumba:

³⁷naye a la henza lilwala, na henza, lilwala ni li va ni li veye mu madigi genyumba ni i veye noluguku, lwelifwana lyobulimu kinga lwakanyu, na liloleka lyalyo ni liingiranga kuduka mu lidigi;

³⁸hene yaho musalisi a la twula mu inyumba kuduka ha kiliango kyenyumba, na a la hana inyumba madiku gatano na gaviri.

³⁹Na ku lidiku lya gatano na gaviri musalisi a la tsia kandi, nokuhenza; na lilwala ni li va ni li landa mu madigi genyumha;

⁴⁰hene yaho musalisi a la va volera va twulidze magina agelilwala li veye mugo, nokugavika hadamano kyova welidala:

⁴¹na a la laga inyumba i halagatwe muse tsimbega tsyosi, na makindi ga ya halagata, va la tsuka kyova welidala ha veye hadamano:

⁴²na va la leta magina gandi, nokugavika ha magina ga twulidzwa; na a la leta ubudohi bundi, nokuhoma inyumba.

⁴³Na lilwala ni li va ni lirana kandi, kuloleka mu inyumba, inyima wa ya twulidza magina, na inyima wa ya halagata madigi, na inyima welihomwa lyayo;

⁴⁴hene yaho musalisi a lingira nokuhenza; na henza, lilwala ni li landa mu inyumba, bu veye ubugere bululu mu inyumba: i veye indamano.

⁴⁵A la sambula inyumba zana ligali, magina gayo, na misala gyayo, na ubudohi bwosi l bwenyumba; na a la vi hila kyova welidala kuvivika hadamano.

⁴⁶Kandi uyu wingira mu inyumba tsinyinga tsyosi tsya i hanwa a la va mudamano kuduka mgolova.

⁴⁷Na uyu u gonanga mu inyumba yeyo a logidza tsingubo tsitsye; na uyu u litsanga mu inyumba yeyo a logidza tsingubo tsitsye.

⁴⁸Na musalisi lwa yingira, nokuhenza, na lilwala ni li vula kulanda mu inyumba inyima welihomwa lyenyumba; hene yaho musalisi a la vola inyumba i veye indahi, kigira lilwala li honyeywi.

⁴⁹Na a la leta manyonyi gaviri, na musala gwa mutaragwa, na inzakanyu, na ihusupo, kutakasidza inyumba:

⁵⁰na a liita lilala ku manyonyi mu inyingu igulu ku amadzi gomugera:

⁵¹na a la vugula mutaragwa, na ihusupo, na inzakanyu, na linyonyi li veye mwoyo, na a la viina mu masahi gelinyonyi liitwa, nomu amadzi gomugera, nokuguuha ku inyumba hali gatano na gaviri:

⁵²na a la takasa inyumba namasahi gelinyonyi, na amadzi gomugera, na linyonyi liveye mwoyo, na musala gwamutaragwa, na ihusupo, na inzakanyu:

⁵³navutswa linyonyi li veye mwoyo a la li lakula kyova welidala li tsie mwigendanyama: na ndiyo a la lombera inyumba kyokukunika ubwoni; nayo i la va indahi.

⁵⁴Yili ni lilaga lyelilwala lyobugere tsingano tsyosi, kandi lyobufuma,

⁵⁵na lyobugere bwengubo, na lyenyumba,

⁵⁶na lya ha vimba, na lya ha veye nobufwiriru, na lyembala ing'ereng'anu;

⁵⁷kwegidza ki veye kidamano na ki veye kilahi: yili ni lilaga lyobugere.