Read lulogooli Kyavalevi 15 Bible Online

Kyavalevi 15 - lulogooli bible

Kyavalevi 15

¹Na Yahova ya volera Musa na Haruni, na a vola,

²Mu volere avana va Israeli, nokuvavolera, Ku vosi mundu na a nyola kisununu ki twulanga mu mbiri gwigwe, a la va mudamano kigira kisununu kikye a veye mudamano.

³Na ubudamano bwibwe mu kisununu kikye ni yibu: ni gu va ni gu twulidzanga kisununu kikye, kinga mbiri gwigwe ni gu va ni gu kalidzirwa kisununu kikye, ki veye kidamano kikye.

⁴Kitali ku vyosi kya uyu u veye na kisununu a gona ku ki la va kidamano; na vyosi vya yikala ku vi la va vidamano.

⁵Na ku vosi u dira ku kitaii kikye a logidza tsingubo tsitsye, nokwisinga mu amadzi; nokuva mudamano kuduka mgolova.

⁶Ku vosi uyu wikala ku kyosi kya uyu u veye nekisununu yikala ku, a logidza tsingubo tsitsye, nokwisinga mu amadzi, nokuva mudamano kuduka mgolova.

⁷Na uyu u dira ku mbiri gwa uyu u veye nekisununu a logidza tsingubo tsitsye, nokwisinga mu amadzi, nokuva mudamano kuduka mgolova.

⁸Na uyu wekisununu na a tudzira uyu u veye mulahi, amate, a logidza tsingubo tsitsye, nokwisinga, nokuva mudamano kuduka mgolova.

⁹Kandi ku masero gosi gokwikala ku, lyowekisununu yikala ku, li la va lidamano.

¹⁰Na ku vosi uyu u dira kindu ku vyosi kya li isi kuye a la va mudamano kuduka mgolova: na uyu u ginga vindu yivyo, a logidza tsingubo tsitsye, nokwisinga mu madzi, nokuva mudamano kuduka mgolova.

¹¹Na ku vosi mundu wa uyu wekisununu a dira, na a kikiri kwisava makono mu madzi, a logidza tsingubo tsitsye, nokwisinga mu madzi, nokuva mudamano kuduka mgolova.

¹²Na ku tsinyingu tsyosi, yiyi ya wekisununu a dira ku, i latanywa; noku vituva vyosi vi logidzwa mu madzi.

¹³Na lwa uyu wekisununu a takaswa ku kisununu kikye a levalidzira madiku gatano na gaviri gelitakaswa lilye, na a logidza tsingubo tsitsye, nokwisinga mbiri gwigwe mu madzi gomugera, na a la va mulahi.

¹⁴Na ku lidiku lya gatano na gavaka a la vugula makuulu gaviri, kinga makuulu gaviri matuge, na a la tsia imbiri wa Yahova ha kiliango kyelihema lyokuvuganira mu, na a la ga ha musalisi:

¹⁵na musalisi a la ga haana, lilala kuva kihaanwa kyobwoni, na lindi kuva kihaanwa kyokusambwa; na musalisi a la mu lombera kyokukunika ubwoni imbiri wa Yahova ku kisununu kikye.

¹⁶Mundu ni yelotera, a lisinga mbiri gwigwe gwosi mu madzi, nokuva mudamano kuduka mgolova.

¹⁷Na tsingubo, na masero gosi, tsyobugoyoko bu veye ku, tsi logidzwa na madzi, na tsi la va tsindamano kuduka mgolova.

¹⁸Na mukali womusatsa a gona naye, vombi va lisinga mu amadzi, na va la va vadamano kuduka mgolova.

¹⁹Ku vosi mukali na a tsia mweli, a la menya ha luvega madiku gatano na gaviri: na ku vosi uyu u mu dira, a la va mudamano kuduka mgolova.

²⁰Na ku vyosi kya a gona ku mu livikwa ha luvega lilye, vi la va vidamano: na vyosi vya yikala ku vi la va vidamano.

²¹Na ku vosi u dira kitali kikye a logidza tsingubo tsitsye, nokwisinga mu madzi, nokuva mudamano kuduka mgolova.

²²Na ku vosi u dira kindu kyomukali uyu yikala ku a logidza tsingubo tsitsye, nokwisinga mu madzi, nokuva mudamano kuduka mgolova.

²³Ni ki veye ku kitali, kinga ku kindu kya yikala ku, inyinga a dira ku, a la va mudamano kuduka mgolova.

²⁴Na ku vosi musatsa na a va na gona halala nomukali uyu, na ubudamano bwibwe bu veye kuye, a la va mudamano madiku gatano na gaviri; na ku vitali vyosi kya a gona ku ki la va kidamano.

²⁵Na mukali na a va nelitadza madiku manyingi, ni ga ta veye madiku gelivikwa ha luvega lilye, kinga ni ga vita tsinyinga tsyelivikwa ha luvega lilye; madiku gosi ga a veye nelitadza lyobudamano bwibwe a la va kuli mu madiku gelivikwa ha luvega lilye: a veye mudamano.

²⁶Ku vyosi kitali kya a gona ku madiku gosi gelitadza lilye ki la va kuli kitali kyelivikwa ha luvega lilye: na vyosi vya yikala ku vi la va vidamano, kuli ubudamano bwelivikwa ha luvega lilye.

²⁷Na ku vosi uyu u dira ku vindu yivi a la va mudamano, na a logidza tsingubo tsitsye, nokwisinga mu madzi, nokuva mudamano kuduka mgolova.

²⁸Navutswa mukali na a va va a takaswa ku litadza lilye, hene yaho a levalidzira madiku gatano na gaviri, na inyima a la va mulahi.

²⁹Na ku lidiku lya gatano na gavaka a la leta makuulu gaviri, kinga makuulu matuge gaviri, na a ga leta ku musalisi ha kiliango kyelihema lyokuvuganiramu.

³⁰Na musalisi a la haana lilala kuva kihaanwa kyobwoni, na lindi kuva kihaanwa kyokusambwa; na musalisi a la mu lombera kyokukunika ubwoni imbiri wa Yahova ku litadza lyobudamano bwibwe.

³¹Na ndiyo mu lavukanya avana va Israeli nobudamano bwavo, va vule kukudza mu budamano bwavo, lwa va kola kuva nobudamano lihema lyange li veye hagati havo.

³²Yili ni lilaga lya uyu u veye nekisununu, na uyu welyelotera, kuduka a veye mudamano;

³³na lyomukali u veye mu livikwa ha luvega lilye, na lyowekisununu, lyomusatsa na lyomukali, na lya uyu u gona haiala nomukali u veye nobudamano.