Read lulogooli Kyavalevi 17 Bible Online

Kyavalevi 17 - lulogooli bible

Kyavalevi 17

¹Na Yahova ya volera Musa, na a vola,

²U volere Haruni, na avana veve, na avana vosi va Israeli, nokuvavolera: Yiki ni kindu kya Yahova u lagi, na a vola,

³Ku vosi mundu wenyumba ya Israeli, wiita ing'ombe, kinga kimeme kyeligondi kinga imbuli, mu hokusosa, kinga wiitira Isyova wa hokusosa,

⁴na a vuli kugileta ha kiliango kyelihema lyokuvuganira mu, kugihaana kuva kihaanwa ku Yahova imbiri welihema lya Yahova: a la validzwa kuva nekisalya kyamasahi; u sunduye masahi; na mundu uyu a la twulidzwa mu avandu veve:

⁵kuduka avana va Israeli va lete vihaanwa vyavo, vya viitira kyova mu mulimi, kali kuduka va vi haane ku Yahova, ha kiliango kyelihema lyokuvuganira mu, ku musalisi, nokuvita vi ve vihaanwa vyemirembe vi haanwa ku Yahova.

⁶Na musalisi a luuha masahi ku bwali bwa Yahova ha kiliango kyelihema lyokuvuganira mu, nokusamba tsitinya tsi ve mwayu ku Yahova.

⁷Va vule kwiitira amademone tsisadaka tsyavo, aga va kola ubuheyi nago ku ligota. Yili li la va lilaga lyemihiga nemihiga kuvo mu visukululwi vyavo vyosi.

⁸Na u la va volera, Ku vosi mundu wenyumba ya Israeli, kinga ku yavo ava menyi hagati havo, leta kihaanwa kyokusambwa, kinga kihaanwa kindi,

⁹na a vula kukileta ha kiliango kyelihema lyokuvuganira mu, kukihaana ku Yahova; mundu uyu a la twulidzwa mu avandu veve.

¹⁰Na ku vosi mundu wenyumba ya Israeli, kinga ku yavo ava menyi hagati havo, u lia masahi ku tsing'ano tsyosi, nda dinyiridza mumoni mwange ku mundu uyu u lia masahi nokumutwulidza hagati ha avandu veve.

¹¹Kigira livamwoyo lyenyama li veye mu masahi; na nda ga haana ku mwinye ku bwali kulombera myoyo gyenyu kyokukunika ubwoni: kigira ga veye masahi aga lombanga kyokukunika ubwoni kigira livamwoyo.

¹²Kunangwa nda volera avana va Israeli, Ha ta va nomundu ku mwinye u litsanga masahi, kandi ha ta va na mugeni u menya hagati henyu u litsanga masahi.

¹³Na ku vosi umundu wa avana va Israeli, kinga ku vageni ava menya hagati havo, u nyola mu luhedzi lwilwe, inyama kinga linyonyi li libangwa; a la sundula masahi gavyo, nokugafwuma ku lugukyi.

¹⁴Kigira ku livamwoyo lyenyama yosi, amasahi gayo ga veye kindu kilala nelivamwoyo lyayo: kigira yaga nda volera avana va Israeli, Mu ta lia masahi genyama ku tsing'ano tsyosi; kigira livamwoyo lyetsinyama tsing'ano tsyosi li veye mu masahi gatsyo: ku vosi u ga lia a la twulidzwa.

¹⁵Na ku vosi mundu u lia inyama inkudzu, kinga yenyama yombulimu ya tandulannya, na a va mwene luhya kinga mugeni, a logidza tsingubo tsitsye, nokwisinga mu madzi, na a la va mudamano kuduka mgolova: kunangwa a la va mulahi.

¹⁶Navutswa na a vula kutsyogidza, nokwisinga mbiri, hene yaho a la ginga ubudamano bwibwe.