Read lulogooli Kyavalevi 19 Bible Online

Kyavalevi 19 - lulogooli bible

Kyavalevi 19

¹Na Yahova ya volera Musa, na a vola,

²U volere livugana lyosi lya avana va Israeli, nokuvavolera, Mu ve avatakatifu; kigira inze Yahova Nyasaye wenyu mbeye mutakatifu.

³Ku vosi mundu a tie mama wewe, na dada wewe; na mu linde masabato gange: inze mbeye Yahova Nyasaye wenyu.

⁴Mu ta girukana kulonda misambwa, kandi mu telombera avanyasaye ava vadzwa: inze mbeye Yahova Nyasaye wenyu.

⁵Na lwa mu haana kihaanwa kyemirembe ku Yahova, mu la ki haana mu duke kubugirirwa.

⁶Ki la libwa ku lidiku lya ki haanwa ku noku mugamba gwalyo: na ku kyosi ni ki tigala ku kihaanwa zana kuduka lidiku lya kavaka, ki la sambwa nomuliru.

⁷Na ni ki va ni ki libwa kali kikekeke ku lidiku lya kavaka, ga veye livihiriridza; si ki la bugirirwa mba:

⁸navutswa ku vosi u lia ku a la ginga ubudamano bwibwe mwene, kigira wononyi kindu kitakatifu kya Yahova: mundu uyu a la twulidzwa mu avandu veve.

⁹Na lwa mu gesa ligesa lyekivala kyenyu, u ta gesera ligali kuduka ku tsinzako tsyomulimi gugwo, kandi u ta vungidza vya ng'alika vyeligesa lilyo.

¹⁰Na u ta vugula vya ng'alika kya kizabibu, kandi u ta dola makuyu gekizabibu kikyo aga gwa hasi; u ga lekere mudaka na mugeni: inze mbeye Yahova Nyasaye wenyu.

¹¹Mu tiba mba; kandi mu ta kola ubugadi, na mu ta veherana mba.

¹²Mu tesuha lyobubehi ku lieta lyange, nokwononya lieta lya Nyasaye wowo: inze mbeye Yahova.

¹³U ta dambidza mutende wowo kinga kwiba kindu kikye: madanyi gomutumekiri wa lagwa ga la vula kumenya halala nive lidiku lyosi kuduka mugamba.

¹⁴U ta laama uyu wa hana amatu, kandi u ta vika kyokwikigitalidza imbiri womboku; navutswa u la tia Nyasaye wowo: inze mbeye Yahova.

¹⁵Mu ta kola aga ta li malungi mu likalaga: kandi u teridza liva lyomudaka, kinga kwidzominya liva lyowetsingulu; navutswa u la kalagira wakyo nobulungi.

¹⁶U ta tsia yiyi na yiyi kuli muhudziridzi hagati ha avandu vovo: kandi u ta singira ku masahi gowakyo: inze mbeye Yahova.

¹⁷U ta dunyira amwavo wowo mu mwoyo gugwo: ligali u la gaya mutende wowo, na u te nyolira ubwoni kuye mba.

¹⁸U ta vanza kisalya, kandi u ta va nobusigu ku avana va avandu vovo; navutswa u la yanza mutende wowo kuli weyanza: inze mbeye Yahova.

¹⁹Mu la gumira malago gange. U ta leka mitugu kwivulana netsinyama tsyolugano nolugano: U ta midza mu mulimi gugwo bugutsa ku tsing'ano tsiviri: kandi u tivika ingubo yetsing'ano tsiviri tsyatsukanywa halala.

²⁰Kandi ku vosi mundu u I gona nomukana mutugwa womusatsa yakwa, wa vula kutungirwa, kinga kubohololwa; vombi va la saliridzwa; va la vula kwiitwa, kigira mukana si a li muboholole.

²¹Na musatsa uyu a la leta kihaanwa kikye kyelihyola ku Yahova ha kiliango kyelihema lyokuvuganira mu, ki la va ligondi likole kuva kihaanwa kyelihyola.

²²Na musalisi a la lombera uyu kyokukunika ubwoni neligondi likole lyekihaanwa kyelihyola imbiri wa Yahova: na ubwoni bwa ya kola bu la samefwa.

²³Na lwa mu duka mu kivala, ni mu mala kusimika misala tsing'ano tsyosi kuva vyokulia, hene yaho mu la vola makuyu gagyo kuva kuli livula kukebwa lyagyo: mihiga gyivaka misala yigyo gyi la va misindi ku m-vinye; ga la vula kulibwa.

²⁴Navutswa mu muhiga gu kola gyine makuyu gagyo ga la va matakatifu, kwidzominya Yahova.

²⁵Noku muhiga gwa Ryitano mu la lia makuyu gagyo, gyi duke kwamira mwinye makuyu gagyo: inze mbeye Yahova Nyasaye wenyu.

²⁶Mu ta lia kindu halala na masahi: kandi mu ta kola busegetiri, kinga kutumekira ubung'oli.

²⁷Mu ta leka visuli vyoku mitwe gyenyu, kandi mu tononya tsisonga tsyetsinderu tsitsyo.

²⁸Mu ta salagira avakudzu mu inyama yombiri gwenyu, kandi mu ta sata tsisate ku mibiri gyenyu: inze mbeye Yahova.

²⁹U tononya mukana wowo kumukola malaya; gase kivala ki la londa amalaya, na kivala ki lizula ubudamano bunene.

³⁰Mu linde masabato gange, nokwidzominya hatakatifu hange: inze mbeye Yahova.

³¹Mu ta tsia ku yavo ava veye nemyoyo gyokulagula, kinga ku avavimbuli, mu ta venyira kwononywa navo: inze mbeye Yahova Nyasaye wenyu.

³²U la singirira wetsimbudzi, nokwidzominya musakulu, na u la tia Nyasaye wowo: inze mbeye Yahova.

³³Na mugeni na a va na a menya halala nive mu kivala kyenyu, mu ta mu kolera ubudamano.

³⁴Umgeni u menyanga halala na mwinye a la va ku mwinye kuli wivulwa iwenyu, na u la mu yanza kuli weyanza; kigira mwa li avamenya mu kivala kya Egepeti: inze mbeye Yahova Nyasaye wenyu.

³⁵Mu ta kola ubukyamu mu likalaga, kinga mu ligera lyobutambi, kinga mu ubuliduhu, kinga mu ligera lyokwizula.

³⁶Mu ve netsiratili tsinungi, na vyokugera vilungi, na efa inungi, na ihin inungi: inze mbeye Yahova Nyasaye wenyu, wa mu leta kutwula mu kivala kya Egepeti.

³⁷Na mwinye mu la gumira amalago gange gosi, na miima gyange gyosi, nokugyikola: inze mbeye Yahova.