Read lulogooli Kyavalevi 21 Bible Online

Kyavalevi 21 - lulogooli bible

Kyavalevi 21

¹Na Yahova ya volera Musa, U volere avasalisi avana va Haruni, nokuvavolera, Ku mwinye vosi mundu a tekolera mudamano ku vakudzu mu avandu veve;

²ni ga ta li ku mwiko wewe wa himbi, ku mama wewe, noku dada wewe, noku mwana wewe muyai kinga mukana, noku amwavo wewe,

³noku mbotso wewe mugima, u veye mwiko wa himbi, u kikiri kukwebwa; ku uyu a nyala kwekolera mudamano.

⁴Kigira a veye munene mu avandu veve, a tekolera mudamano, kweyononya.

⁵Va telomba kyavusu ku mitwe gyavo, kandi va ta vega tsisonga tsyetsinderu tsyavo, kandi va tesalaga mibiri gyavo.

⁶Va la va avatakatifu ku Nyasaye wavo, na va tononya lieta lya Nyasaye wavo; kigira va haana ku Nyasaye wavo, vihaanwa vya lombwa nomuliru, na ubukima bwa Nyasaye wavo va haana: kunangwa va la va avatakatifu.

⁷Va ta kwa mukali wo buheyi, kinga mudamano, kandi va ta vugula mukali wo musatsa ya leka: kigira musalisi a veye mutakatifu ku Nyasaye wewe.

⁸Kunangwa u la mu takasa; kigira a haananga ubukima bwa Nyasaye wowo: a la va mutakatifu ku ive; kigira inze Yahova u mu takasanga, mbeye mutakatifu.

⁹Na mwana mukana womusalisi, ni yeyononya ku lilonda buheyi, wononya dada wewe: a la sambwa nomuliru.

¹⁰Na uyu u veye musalisi munene hagati ha vamwavo veve, wa maguta gokuvaka ga tsukwa ku mutwe gwigwe, na wa takaswa kwivika tsingubo, uyu a la vula kuleka lisu lyoku mutwe gwigwe havulavu, kandi a la vula kutandula tsingubo tsitsye;

¹¹na a la vula kwingira ha mukudzu gu veye ho, kinga kweyononya ku dada wewe, kinga ku mama wewe;

¹²kandi si a la twula mu hatakatifu, kinga kwononya hatakatifu ha Nyasaye wewe; kigira igudwa yokuvakwa maguta ga Nyasaye wewe i veye kuye: inze mbeye Yahova.

¹³A la kwa mukana mugima.

¹⁴Mukunzakali, kinga mukali wa musatsa ya leka, kinga mudamano, kinga wobuheyi, avakali kuli yava a ta kwa mba: navutswa a la kwa mukana mugima wa avandu veve.

¹⁵Kandi a tononya lwivulu lwilwe mu avandu veve: kigira mbeye Yahova, u mu takasanga.

¹⁶Kandi Yahova ya volera Musa, na a vola,

¹⁷U volere Haruni, nokuvola, Ku vosi mundu wolwivulu lulwo mu visukululwi vyavo u veye mulema, a tesunda kuhaana ubukima bwa Nyasaye wewe.

¹⁸Kigira ku vosi u veye na mulema, si a la sunda himbi: mboku, kinga wa lema kirenge, kinga weliulu lyoneka, kinga u veye nekindu kuvitirira ku mbiri gwigwe,

¹⁹kinga mundu wa vunika kirenge, kinga wa vunika mukono,

²⁰kinga u veye nekiguku, kinga wa ku vera, kinga wekilive, kinga wolwiyage, kinga wa magakala, kinga wa duvuka tsingovole;

²¹ku vosi wekisukululwi kya Haruni musalisi, u veye mulema, a tesunda kuhaana vindu vi haanangwa nomuliru ku Yahova mba: uyu u veye mulema, a tesunda kuhaana ubukima bwa Nyasaye wewe.

²²A la lagira ubukima bwa Nyasaye wewe, mu yivyo vi veye vitakatifu ligali, nomu vi veye vitakatifu:

²³navutswa a la vula kwingira mu ingubo yokukinga, kandi a la vula kwisunda ku bwali, kigira a veye mulerna; a vule kwononya hatakatifu hange: kigira mbeye Yahova u va takasanga.

²⁴Kunangwa Musa ya volera Haruni, na avana veve, na avana vosi va Israeli.