Read lulogooli Kyavalevi 22 Bible Online

Kyavalevi 22 - lulogooli bible

Kyavalevi 22

¹Na Yahova ya volera Musa, na a vola,

²U volere Haruni na avana veve, va duke kweyahula avene ku vindu vitakatifu vya avana va Israeli, vya va takasera inze, kandi va tononya lieta lyange litakatifu: inze mbeye Yahova.

³U va volere, Ku vosi mundu wekisukululwi kyenyu kyosi, mu visukululwi vyenyu vyosi, u lisunda himbi ku vindu vitakatifu vya avana va Israeli va takasera Yahova, mundu uyu u veye nobudamano bwibwe, a la twulidzwa a ta va imbiri wange: inze mbeye Yahova.

⁴Ku vosi mundu wekisukululwi kya Haruni u veye nobugere, kinga u veye nekisununu; uyu a ta lia ku vindu vitakatifu, kuduka lwa a veye mulahi. Kandi ku vosi u dira ku kindu kidamano kyomukudzu, kinga mundu welotera;

⁵kinga u dira kimolanga kyokumukola mudamano kinga mundu wa a nyala kunyola kuye ubudamano, ku bwosi bwa a veye nabwo;

⁶mundu uyu u dira ku vyosi kuli yivi, a la va mudamano kuduka mgolova, na si a la lia ku vindu vitakatifu, bugira kwisinga mbiri mu madzi.

⁷Na lwa liuva li yera a la va mulahi; na a la lia ku vindu vitakatifu, kigira vi veye vyokulia vivye.

⁸Inyama inkudzu, kinga yiyi yenyama yombulimu i tandula, a ta gi lia, a vule kwivika mu budamano kuyo: inze mbeye Yahova.

⁹Kunangwa va la gumira malago gange, gase va la ginga ubwoni ku yaga, na va kudza mugo, ni va gononya: inze mbeye Yahova u va takasanga.

¹⁰Mugeni si a la lia ku kitakatifu: mumenya womusalisi, kinga mutumekiri u tungangwa, a ta lia ku kindu kitakatifu.

¹¹Navutswa musalisi na a va na a gula mundu ku vosi na ifetha yeye, uyu a la lia kuvyo; navo vivulwa mu inyumba, va la lia ku vyokulia vivye.

¹²Mwana mukana womusalisi, mugeni na a mu kwa, a ta lia ku kihaanwa kyokugingwa igulu mu vindu vitakatifu.

¹³Navutswa mwana mukana womusalisi na a va na a veye mukunzakali, kinga musatsa na a va na a va mu leka, na a ta li nomwana, ni yirana kumenya mu inyumba ya dada wewe kuli mu bwana bwibwe, a la lia ku vyokulia vya dada wewe: navutswa ku vageni vosi va ta lia kuvyo.

¹⁴Kandi mundu na a va na a lia ku vitakatifu na a ta manya, hene yaho a la meda kidieli kya vitano, nokuha musalisi kitakatifu zana.

¹⁵Kandi va tononya vindu vitakatifu vya avana va Israeli, va haananga ku Yahova,

¹⁶na ndiyo va kolwa kuginga mahyolo aga leta kindu kuvo, lwa va lia vindu vitakatifu vyavyo: inze mbeye Yahova u va takasanga.

¹⁷Kandi Yahova ya volera Musa, na a vola,

¹⁸U volere Haruni na avana veve, na avana va Israeli vosi u va volere, Ku vosi mundu wenyumba ya Israeli, kinga ku vageni ava veye mu Israeli, u letanga kihaanwa kikye, ni ki va ni ki veye kilala kyelilagana lyavo, kinga ni ki veye kilala ku vindu vyavo vyokuhaana nomwoyo gwobuyanzi, vya va haana ku Yahova kuva kihaanwa kyokusambwa;

¹⁹mu duke kubugirirwa mu la leta kisatsa kidukanu, ku tsing'ombe, kinga ku magondi, kinga ku tsimbuli.

²⁰Navutswa ku mitugu gyosi yigu gu veye nobulema, mu ta gu leta mba: kigira si gu la bugirirwa ku mwinye mba.

²¹Kandi ku vosi u letera Yahova kihaanwa kyemirembe kuduka kutwulidza lilagana, kinga kihaanwa kyomwoyo gwobuyanzi, ku tsing'ombe kinga ku magondi, ki ve kidukanu kubugirirwa ki ta va nobulema kukyo kali hakuzuzu.

²²Ki veye kiboku, kinga kyavunika, kinga kilema, kinga kyavimba, kinga magakala, kinga kyafwuvuka, yivi mu ta haana ku Yahova, kinga kuvilomba kuva kihaanwa kyomuliru ku bwali ku Yahova.

²³Ing'ombe kinga ligondi li veye nekindu kya vitirira, kinga kya gehera ku vindu vyevivero vyakyo, u veye nomunwa kulihaana kuva kihaanwa kyomwoyo gwobuyanzi; navutswa kyelilagana si ki la bugirirwa mba.

²⁴Si mu la haana ku Yahova kindu kya saliridzwa, kinga kya duvagwa, kinga kya vunanywa, kinga kya kalagwa; kandi mu ta haana vihaanwa kuli yivi mu kivala kyenyu mba.

²⁵Kandi mu ta haana vyokulia vya Nyasaye wenyu vi twula ku mukono gwomugeni vi veye ku yivi vyosi; kigira ubudamano bwavyo bu veye muvyo, kilema ki veye muvyo: si vi la bugirirwa ku mwinye.

²⁶Na Yahbva ya volera Musa na a vola,

²⁷Inyinga ing'ombe, kinga ligondi, kinga imbuli, yivulwa, i la va halala na innya madiku gatano na gaviri; na kutwula ku lidiku lyagatano na gavzka i la bugirirwa kuva kihaanwa kyokulombwa nomuliru ku Yahova.

²⁸Kandi ni i veye ing'ombe idwasi, kinga ligondi linyavuli, mu ta liita halala nomwana ku lidiku lilala mba.

²⁹Na lwa mu haana kihaanwa kyokusantidza Yahova, mu la kiita mu duke kubugirirwa.

³⁰Ki la libwa ku lidiku zana; mu ta leka kindu kukyo kuduka mugamba: inze mbeye Yahova.

³¹Kunangwa mu la gumira malago gange kugakola: inze mbeye Yahova.

³²Kandi mu tononya lieta lyange litakatifu; navutswa nda takaswa hagati ha avana va Israeli: inze mbeye Yahova u takasanga mwinye,

³³nowa mu twulidza mu kivala kya Egepeti, kuva Nyasaye wenyu: inze mbeye Yahova.