Read lulogooli Kyavalevi 25 Bible Online

Kyavalevi 25 - lulogooli bible

Kyavalevi 25

¹Kandi Yahova ya volera Musa mu kigulu kya Sinai, na a vola,

²U volere avana va Israeli nokuvavolera, Lwa mu duka mu kivala kya mmu hedzanga, hene yaho kivala ki la va nelisosa lyelisabato ku Yahova.

³Mihiga gyitano na mulala u la taga mulimi gugwo, na mihiga gyitano na mulala u la lomba mulimi gugwo gwemizabibu, nokuvungidza nokuleta makuyu gagyo;

⁴navutswa muhiga gwegyitano na gyiviri gu la va lisabato lyelisosa lyekivala, lisabato ku Yahova: u ta taga mulimi gugwo kandi u ta lomba mulimi gugwo gwemizabibu.

⁵Yikyo ki meranga kyene mu ligesa lilyo u ta gesa mba, na mazabibu gemizabibu gyigyo gyi ta lombwa u ta gaagula: gu la va muhiga gwokusosa gwekivala.

⁶Na lisabato lyekivala li la va lyevyokulia ku mwinye; ku ive, noku mutugwa wowo, noku mutugwa wowo mukana, noku mutugwa u tungangwa, noku mugeni wowo u menyanga halala na ive.

⁷Noku mitugu gyigyo, noku tsinyama tsi veye mu kivala kikyo, limedeka lyosi li la va vyokulia.

⁸Kandi u levalidzira masabato gatano na gaviri gemihiga ku ive, gyi veye mihiga gyitano na gyiviri hali katano na kaviri; na ga la va ku ive madiku gamasabato gatano na gaviri gemihiga, gyene gyi veye mihiga makumi gane na gyitano na gyine.

⁹Na u la tuma kisiliva kyomwoyo munene tsimbega tsyosi ku lidiku lyelikumi lyomweli gwegyitano na gyiviri; mu lidiku lyokukunika ubwoni mu tuma kisiliva mu kivala kyenyu kyosi.

¹⁰Na muhiga gwa makumi gatano mu la gu takasa, nokulandidza libohololwa mu kivala kyosi ku vosi ava menya mukyo: na gu la va jubili ku mwinye; na mu lirana sa mulala kwirana ku miyandu gyigye mwene, na mu lirana sa mulala ku aviko veve.

¹¹Muhiga gwa makumi gatano gu la va jubili ku mwinye: mu ta taga mba, kandi mu ta gesa kindu kya mera kyene, kandi mu taagula makuyu gemizabibu gyi ta lombwa.

¹²Kigira gu veye jubili; gu la va mutakatifu ku mwinye: mu la lia limedeka lyagwo lyomu mulimi.

¹³Mu muhiga gwa jubili mu lirana sa mulala kwirana ku miyandu gyigye mwene.

¹⁴Kandi nu u va nu u gulidza umutende wowo, kinga nu u gula kindu ku mukono gwomutende wowo mu ta dambidzana.

¹⁵Kuli livaiidza lyemihiga inyima womuhiga gwa jubili u la gula ku mutende wowo, kandi kuli livalidza lyemihiga gyeligesa a la ku gulidza.

¹⁶Kandi kuli livalidza lyemihiga gyi veye minyingi u la meda ubuguli bwagwo, kandi kuli livalidza lyemihiga gyi veye mikekeke u la gehidza ubuguli bwagwo; kigira kuli livalidza lyeligesa li veye, a la ku gulidza ndiyo.

¹⁷Na mu ta dambidzana avene na avene mba; navutswa u la tia Nyasaye wowo: kigira inze mbeye Yahova Nyasaye wenyu.

¹⁸Kunangwa mu la kola malago gange, na mu la gumira miima gyange nokugyikola; na mu la menya nobulahi mu kivala.

¹⁹Na kivala ki lama makuyu gakyo, na mu la lia nokwiguta, nokumenya mukyo nemirembe.

²⁰Kandi ni mu va ni mu vola, Ku la lia ki ku muhiga gwegyitano na gyiviri? Henza, si ku la taga, kandi si ku la vungidza vya medeka vyetu;

²¹hene yaho nda laga ubugasu bwange ku mihiga gwegyitano na mulala, nagwo gu lama makuyu gemihiga gyivaka.

²²Na ku muhiga gwegyitano na gyivaka, mu la taga, na mu la lia makuyu makulu; kuduka ku muhiga gwegyitano na gyine, kuduka makuyu gagwo ga duka, mu la lia makuyu makulu.

²³Na kivala si ki la gulidzwa ku ligulidzwa lyemihiga gyosi; kigira kivala ni kyange: kigira mwinye mu veye avageni na avamenyi halala na inze.

²⁴Na mu kivala kyemiyandu gyenyu gyosi mu la haanira kivala mitungu.

²⁵Amwavo wowo na a va na a gwa mudaka, nokugulidza kidieli kyemiyandu gyigye, ma mwiko wewe wa himbi, a ladza nokuboholola yikyo kya amwavo wewe ya gulidza.

²⁶Na mundu na a vula kuva nomundu kukiboholola, na mwene na a nyola ubutugi bwokuduka kukiboholola;

²⁷ma a la validza mihiga gyeligulidzwa lyakyo, na a lirannya ku uyu wa gula kya vita mu; naye a lirana ku miyandu gyigye.

²⁸Navutswa na a ta nyala kwiranyira mwene, ma kya ya gulidza ki la menya mu mukono gwa uyu wa ki gula kuduka ku muhiga gwa jubili: mu jubi li ki la bohololwa, naye a lirana ku miyandu gyigye.

²⁹Kandi mundu na a va na a gulidza inyumba yokumenya mu lidala lyolugaga, ma a la nyala kugiboholola mu muhiga mulala inyima weligulidzwa; a la va nomunwa kugiboholola kuduka muhiga mulala.

³⁰Ni i va ni i ta bohololwa kuduka muhiga mulala, hene yaho inyumba zana i veye mu lidala lyolugaga i la singeridzwa mihiga gyosi kuva ya uyu wa gi gula, mu visukululwi vivye vyosi: na i la vula kutwula mu jubili.

³¹Navutswa tsinyumba tsyomu tudala tu ta veye nolugaga tsi la validzwa halala nemilimi gyekivala: yitsi tsi nyala kubohololwa, na tsi la twula mu jubili.

³²Navutswa amadala ga Valevi, na tsinyumba tsya amadala gemiyandu gyavo, Avalevi va nyala kugiboholola ku tsinyinga tsyosi.

³³Kandi mulala ku Valevi na a va na a boholola, hene yaho inyumba ya gulidzwa, na lidala lyemiyandu gyigye, vi la twula mu jubili; kigira tsinyumba tsya madala ga Valevi tsi veye miyandu gyavo mu avana va Israeli.

³⁴Navutswa mulimi gwetsinzako tsya madala gavo, si tsi nyala kugulidzwa mba; kigira gu veye miyandu gyavo madiku gosi.

³⁵Kandi amwavo wowo na a va na a gwa mundaka, na mukono gwiwe na a gwa mudaka, na mukono gwigwe gu dendeyi halala na ive; hene yaho ive u la mu konya: kuli mugeni na mumenya a la menya halala na ive.

³⁶U la vula kuvugula kuye madanyi kinga vyambeti, navutswa u tie Nyasaye wowo; amwavo wowo a menye halala na ive.

³⁷U la vula kumuha ifetha yoyo kunyola madanyi, kinga kumuha vyokulia vivyo kunyola vyambeti.

³⁸Inze mbeye Yahova Nyasaye wenyu, wa mu twulidza mu kivala kya Egepeti, kumuha kivala kya Kanani, nokuva Nyasaye wenyu.

³⁹Kandi amwavo wowo na a va na a gwa mudaka, halala na ive, na yegulidza mwene ku ive; u ta mu kola a tumekire kuli mutugwa.

⁴⁰A la va nive kuli mutumwa u tungangwa, kandi kuli mumenya, a la va nive; a la ku tumekira kuduka ku muhiga gwa jubili:

⁴¹ma a la twula ku ive, uyu na avana veve halala naye, na a lirana ku aviko veve, noku miyandu gya avaguga veve.

⁴²Kigira va veye avatumekiri vange, ava nda twulidza mu kivala kya Egepeti: va la vula kugulidzwa kuva avatugwa.

⁴³U la vula kwameha kuye nobudinyu, navutswa u la tia Nyasaye wowo.

⁴⁴Kandi makuva ga avatugwa vovo, avasatsa na avakali, ava u la va navo; ku avetsihiri tsi veye himbi na mwinye, ku yavo mu nyala kugula avatugwa, avasatsa na avakali.

⁴⁵Kandi ku avana va avageni ava menya halala na ive, ku yavo mu nyala kugula, noku aviko vavo ava veye halala na ive, yava ava vivulira mu kivala kyenyu: navo va la va miyandu gyenyu.

⁴⁶Na mu la va kola kuva miyandu gya avana venyu inyima wenyu, kuva miyandu; ku yavo mu la vugula avatugwa venyu vyemihiga gyosi: navutswa mu tameha nobudinyu ku avamwavo venyu avana va Israeli mba.

⁴⁷Kandi mugeni kinga mumenya halala na mwinye na a gwa mutugi, na amwavo wowo na a gwa mudaka himbi naye, ni yegulidza mwene ku mugeni kinga ku uyu u menyanga na ive, kinga ku visukululwi vya aviko vomugeni;

⁴⁸lwenyima lwa a mala kugulidzwa, a nyala kubohololwa: mulala ku avamwavo veve a nyala kumuboholola;

⁴⁹kinga mifwa, kinga mwana wa mifwa wewe, a nyala kumuboholola, kinga mulala u veye himbi mu aviko veve, a nyala kumuboholola; kinga uyu mwene na a duka kuva mutugi a nyala kweboholola.

⁵⁰Na a la validza halala na uyu wa mu gula kutwula ku muhiga gwa yegulidza, kuduka ku muhiga gwa jubili: na ubuguli bwa ligulidzwa lilye bu la va kuli livalidza lyemihiga; a la va halala naye kuli mutumekiri u tungangwa.

⁵¹Ni gyi va ni gyi tigaye mihiga minyingi, kuli livalidza lyagyo a la tungira libohololwa lilye ndiyo ku ifetha ya ya gulwa.

⁵²Kandi ni gyi va ni gyi tigaye mihiga mikekeke kuduka ku muhiga gwa jubili, ma a la validza halala naye; kuli mikiga gyigye a la tungira libohololwa lilye.

⁵³Kuli mutumekiri u tungangwa ku muhiga nomuhiga a la va halala naye: si a lameha kuye nobudinyu imbiri wetsimoni tsitsyo mba.

⁵⁴Kandi na a va na a vula kubohololwa ku makuva yaga, ma a la twula ku muhiga gwa jubili, uyu, na avana veve halala naye.

⁵⁵Kigira avana va Israeli va veye avatumekiri vange; ava nda twulidza mu kivala kya Egepeti: inze mbeye Yahova Nyasaye wenyu.