Read lulogooli Kyavalevi 26 Bible Online

Kyavalevi 26 - lulogooli bible

Kyavalevi 26

¹Mu telombera vifwananyi ku vyosi, mu tesingeridzira vifwananyi kya vadzwa, kinga kinara kandi mu ta vika ligina lya vadzwa mu kivala kyenyu, kulisigamira: kigira inze mbeye Yahova Nyasaye wenyu.

²Mu la linda masabato gange, nokwidzominya hatakatifu hange: inze mbeye Yahova.

³Ni mu genda mu miima gyange, nokugumira malago gange, nokugakola;

⁴kunangwa nda kupidza imbula yenyu ku tsinyinga tsyayo, na kivala ki lama limedeka lyakyo na misala gyemilimi gyi lama makuyu gagyo.

⁵Kandi lihuula lyobuswage lyenyu li la hongerwa kuduka ku tsinyinga tsyokugesa mazabibu, na ligesa lya mazabibu li la hongerwa kuduka ku tsinyinga tsyelitaga; na mu la lia vyokulia vyenyu nokwiguuta, nokumenya mu kivala kyenyu nemirembe.

⁶Na nda mu ha mirembe mu kivala, na mu la gona, kandi si ha la va no nyala kumutihidza: na nda heridza tsinyama tsindamano mu kivala kyenyu, kandi kivavi si ki la vita mu kivala kyenyu.

⁷Na mu la kunga avasigu venyu, navo va la gwa imbiri wenyu ku kivavi.

⁸Na ku mwinye vatano va la kunga avandu mia, na ku mwinye mia va la kunga tsielfu likumi; na avasigu venyu va la gwa imbiri wenyu ku kivavi.

⁹Na nda yekidza ku mwinye tsimoni tsyange, nokumuha lwivulu lunyingi, nokumumeda, nokusingeridza lilagana lyange na mwinye.

¹⁰Na mu la lia ku vyokulia vikulu, vya vikwa kale, na mu la twulidza vikulu kigira vihya.

¹¹Na nda singeridza lihema lyange hagati henyu: na mwoyo gwange si gu la lega mwinye.

¹²Na nda genda halala na mwinye, na nda va Nyasaye wenyu, na mwinye mu la avandu vange.

¹³Inze mbeye Yahova Nyasaye wenyu, wa mu twulidza mu kivala kya Egepeti, mu vule kuva avatugwa vavo; na mmali kuvunanya misala gya inira yenyu, nokumusingeridza mu gende bulungi.

¹⁴Navutswa mwinye ni mu va ni mu vula kumbulira nakukola malago yaga gosi;

¹⁵ni mu sula malago, na mwoyo gwenyu gu lega miima gyange, kuduka ni mu vula kukola amalago gange gosi, navutswa mwononva lilagana lyange;

¹⁶inze kandi nda l mu kolera yaga: nda vika ku mwinye litihidza, kuli ubulwaye bwekiritu bunene na luhudza, vyokwononya tsimoni tsyenyu, nokung'ahidza mwovo gwenyu; mu la taga bugutsa bwenyu vutswa, kigira avasigu venyu va la bu lia.

¹⁷Kandi nda vika mumoni mwange kuvukira mwinye, na mu la kuywa imbiri wa avasigu venyu: navo ava mu dunyira va lameha ku mwinye; na mu liruka inyinga ya a ta veye ho u mu kunganga.

¹⁸Kandi mwinye ku yaga, ni mu va ni mu vula kumbulira, hene yaho nda mu li dambidza kuvita hali katano na kaviri kigira ubwoni bwenyu.

¹⁹Kandi ndononya uluyai lwetsingulu tsyenyu: na nda kola mwigulu mwenyu kuva kuli kivya, na lirova lyenyu kuli mugasa;

²⁰na tsingulu tsyenyu tsi la gota vutswa; kigira kivala kyenyu si ki lama limedeka lyakyo, na misala gyekivala si gyi lama makuyu gagyo.

²¹Kandi ni mu va ni mu genda mu lihing'ana ku inze, ni mu vula kumbulira, nda leta amaduywa ku mwinye hali katano na kaviri kuvita, kuli ubwoni bwenyu.

²²Na nda tuma tsinyama tsyombulimu hagati henyu, na tsi la mu nyaga avana venyu, nokwononya mitugu gyenyu, na tsi la mu gehidza livalidza lyenyu li gehe; na tsinzira tsyenyu tsi la va tsinzere.

²³Kandi ni mu va ni mu vula kwiranywa ku inze kigira vindu yivi, navutswa ni mu genda nelihing'ana ku inze;

²⁴inze kandi nda genda nelihing'ana ku mwinye; na nda mu duya, yee inze, nda mu duya hali katano na kaviri kigira ubwoni bwenyu.

²⁵Na nda leta kivavi ku mwinye, ki li vanza kisalya kyelilagana; na mu la vuganywa halala mu madala genyu: na nda leta a lukudzo ludamano hagati henyu; na mwinye mu la vikwa mu mukono gwa avasigu venyu.

²⁶Lwa ndi yononya vyokulia vyenyu, avakali likumi va la lugira ubukima bwenyu mu mahiga malala, na va la mu ha ubukima bwenyu ne ligera ku tsiratili: na mu la lagira, navutswa si mu liguta mba.

²⁷Kandi ku yivi vyosi, ni mu vula kumbulira, navutswa ni mu genda n nelihing'ana ku inze;

²⁸inze kandi nda genda nelihing'ana ku mwinye mu butima bwange; na kandi nda mu kupidza kivi hali katano na kaviri kigira ubwoni bwenyu.

²⁹Na mu la lia inyama yemibiri gya avana venyu avayai, na myama yemibiri gya avana venyu avakana mu la lia.

³⁰Na ndononya vitumi vyenyu, na nda kalaga vifwananyi vyenyu vyeliuva, na nda ta mikudzu gyenyu ku mibiri gyevifwananyi vyenyu; na mwovo gwange gu la mu lega.

³¹Na nda kola madala genyu ga gwe vyanyi, na hatakatifu henyu, nda kola hatswa, na si nda funyeridza lifunya lyomwayu gwenyu.

³²Na nda kola kivala ki duke kuva vutswa; na avasigu ava menya mukyo va la genya.

³³Na nda mu salanya hagati hetsihiri, na nda somola kivavi kumulonda: na kivala kyenyu ki la va kya vutswa, na amadala genyu ga la gwa vyanyi.

³⁴Kunangwa kivala ki la sangalira masabato gakyo, tsinyinga tsya ki veye mu liva lya vutswa, na mwinye mu veye mu kivala kya avasigu venyu: tsinyinga zana kivala ki la sosa, nokusangalira masabato gakyo.

³⁵Tsinyinga tsyosi tsya ki veye mu liva lya vutswa ki la sosa, ni lisosa lya kya vula kuva nalyo mu masabato genyu, inyinga mwa menya mukyo.

³⁶Na ku yava ava tigala ku mwinye, nda va letera ubutii mu myoyo gyavo mu vivala vya avasigu vavo: na mwoyo gwelitu li hungudzangwa gu la va kunga; navo va liruka kuli mundu yirukanga kivavi; na va la gwa inyinga ha ta veye nowa va kunganga.

³⁷Na va likigitala ku avene na avene, kuli ava veye imbiri wekivavi, inyinga ha ta veye nowa va kunganga: na si mu la va netsingulu kusingira imbiri wavasigu venyu.

³⁸Na mu la diva hagati hetsihiri, na kivala kya avasigu ki la mu mira.

³⁹Na yava ava tigala ku mwinye va la niala mu bwoni bwavo mu vivala vya avasigu venyu; na kandi mu bwoni bwavaguga vavo va la niala.

⁴⁰Navo va leyama ubwoni bwavo, na ubwoni bwa vaguga vavo, mu lihyolo lya va hyola ku inze, na kandi kigira va genda mu lihing'ana ku inze,

⁴¹inze kandi nda genda mu lihing'ana kuvo, na nda va leta mu kivala kyavasigu vavo: hene yaho myoyo gyavo gya vula kukebwa, ni gyi va ni gyi gehidzwa, navo va bugirira amageli gobwoni bwavo;

⁴²hene yaho ndidzulitsa lilagana lyange na Yakobo; na lilagana lyange na Isaka, na kandi lilagana lyange na Abrahamu ndidzulitsa; kandi ndidzulitsa kivala.

⁴³Na kivala kya va li leka, ki la sangalira masabato gakyo, lwa kya li mu liva lya vutswa, bugira kuva navo: navo va la bugirira kuhebwa mageli gobwoni bwavo; kigira, ligali kigira vambakana miima gyange, na mwoyo gwavo gu lega amalago gange.

⁴⁴Navutswa ku yaga gosi, lwa va veye mu kivala kya vasigu vavo, inze si nda va sula ligali, kandi si nda va lega, kuduka va dividzwe ligali, nokwononya lilagana lyange navo; kigira inze mbeye Yahova Nyasaye wavo;

⁴⁵navutswa kigira yavo ndidzulitsa lilagana lyavaguga vavo, ava nda leta kutwula mu kivala kya Egepeti, imbiri wetsimoni tsyetsihiri, nduke kuva Nyasaye wavo: inze mbeye Yahova.

⁴⁶Yaga ga veye malago na miima na likalaga lya Yahova ya lomba hagati hehe na avana va Israeli mu kigulu kya Sinai nomukono gwa Musa.