Read lulogooli Kyavalevi 3 Bible Online

Kyavalevi 3 - lulogooli bible

Kyavalevi 3

¹Kandi kihaanwa kikye ni ki va ni ki veye kihaanwa kyemirembe; na a va na a leta ku tsing'ombe igiriki kinga iroli, a la gi leta indukanu imbiri wa Yahova.

²Naye a la vika mukono gwigwe ku mutwe gwekihaanwa kikye, nokugiitira ha kiliango kyelihema kyokuvuganira mu: na avana va Haruni avasalisi va luuha masahi ku bwali tsimbega tsyosi.

³Naye a la haana kihaanwa kyemirembe kihaanwa ki lombwa nomuliru ku Yahova; nakyo ki veye itinya yomunda, na itinya yosi i veye ku amala,

⁴na tsimbigu tsyombi, na itinya yatsyo, i veye himbi nekisindi, na inderwa i veye ku likudumani, halala netsimbigu, yivi vyosi a la vi twulidza.

⁵Na avana va Haruni va la vi samba ku bwali ku kihaanwa kyokusambwa, ki veye ku tsinku tsi veye ku muliru: ki veye kihaanwa ki lombwa nomuliru, kyokufunyira Yahova mwayu.

⁶Na kihaanwa kikye kyekihaanwa kyemirembe ku Yahova, ni ki va ni ki veye ku kyayo kyamagondi; likole kinga lisuveni, a la li leta li veye lidukanu.

⁷Na a va na a haana kimeme kyeligondi kuva kihaanwa kikye, ma a la ki haana imbiri wa Yahova,

⁸na a la vika mukono gwigwe ku mutwe gwakyo, nokukiitira ha kiliango kyelihema kyokuvuganira mu: na avana va Haruni va luuha masahi gakyo ku bwali tsimbega tsyosi.

⁹Na a la leta ku vihaanwa vyemirembe, kihaanwa ki lombwa nomuliru ku Yahova; na itinya yakyo, na msembe gwosi, a la gi twulidza nokugikalira himbi nekigumba kyomugongo; na itinya yosi yomunda, na itinya yosi yoku amala,

¹⁰na tsimbigu tsyombi, na itinya yatsyo i veye himbi nekisindi, na inderwa yoku likudumani, halala netsimbigu, yivi vyosi a la vi twulidza.

¹¹Na musalisi a la vi samba ku bwali: vi veye kyokulia kyekihaanwa ki lombwa nomuliru ku Yahova.

¹²Kihaanwa kikye ni ki va ni ki veye imbuli, ma a la gi haana ku Yahova:

¹³naye a la vika mukono gwigwe ku mutwe gwayo, nokugiitira imbiri welihema lyokuvuganira mu; na avana va Haruni va luuha masahi gayo ku bwali tsimbega tsyosi.

¹⁴Naye a la haana kihaanwa kikye kuyo, ki veye kihaanwa ki lombwa nomuliru ku Yahova; na itinya yayo yomunda, na itinya yosi yoku amala,

¹⁵na tsimbigu tsyombi, na itinya yatsyo i veye himbi nekisindi, na inderwa yoku likudumani halala netsimbigu, yivi vyosi a la vi twulidza.

¹⁶Na musalisi a la vi samba ku bwali: ki veye kyokulia kyekihaanwa ki lombwa nomuliru, ki ve mwayu; itinya yosi i veye ya Yahova.

¹⁷Li ve lilaga lyamadiku gosi mu visukululwi vyenyu mu tsinyumba tsyenyu tsyosi, si mu la lia itinya kinga masahi mba.