Read lulogooli Kyavalevi 4 Bible Online

Kyavalevi 4 - lulogooli bible

Kyavalevi 4

¹Kandi Yahova ya volera Musa, nokuvola,

²U volere avana va Israeli, nokuvola, Mundu na a va na a kola ubwoni bugira lisaavira, ku likuva lyosi lya Yahova ya gaya li ta kolwa, na a kola lilala kugo:

³musalisi wa vakwa na a va na kola ubwoni kuduka kuleta kyokukalagirwa ku avandu, hene yaho a haane kigira ubwoni bwibwe, bwa ya kola, a la haana ku Yahova kimoli kigiriki ki dukanu kuva kihaanwa kyobwoni.

⁴Na a la leta kimoli kigiriki ha kiliago kyelihema lyokuvuganira mu imbiri wa Yahova; na a la vika mukono gwigwe ku mutwe gwegiriki, nokugiitira igiriki imbiri wa Yahova.

⁵Na musalisi wa vakwa s maguta a la vugula ku masahi gekimoli, nokugaleta ku lihema lyokuvuganira mu:

⁶na musalisi a la vika kidete kikye mu masahi, nokuguuha imbiri wa Yahova hali gatano na kaviri, imbiri wengubo yokukinga hatakatifu.

⁷Na musalisi a la vika masahi ku tsinziga tsyobwali tsyokusamba kimuli kyomwayu imbiri wa Yahova, bu veye mu lihema lyokuvuganira mu; na masahi gosi gekimoli a la tsuka hasi hobwali bwokusamba ku, vihaanwa, bu veye ha kiliango kyelihema lyokuvuganira mu.

⁸Na itinya yosi yekimoli kyekihaanwa kyobwoni a la gi twulidza; itinya yomunda, na itinya yosi yoku amala

⁹na tsimbigu tsyakyo tsyombi, na itinya yatsyo, i veye himbi nekisindi, na inderwa yoku likudumani, halala netsimbigu, yivi vyosi a la vi twulidza,

¹⁰kuli vi twulidzangwa ku igiriki yekihaanwa kyemirembe: na musalisi a la vi samba ku bwali bwekihaanwa kyokusamba.

¹¹Na lisero lyekimoli, na inyama yakyo yosi, halala no mutwe, ne virenge, na vyomunda, na ubose,

¹²kali kimoli kyosi a la hila kyova wa hokusosa nokukidukidza halahi, ha va tsukanga ligoke, na a la ki samba nomuliru ku tsinku; a la ki sambira heligoke li tsukangwa.

¹³Na livugana lyosi ni li va ni li kola ubwoni, na inkuva yiyi ni i visika mu tsimoni tsyelivugana, navo va koli kindu ku vindu vyosi vya Yahova ya gaya vi ta kolwa mba, na va nyoye likalagirwa;

¹⁴lwa ubwoni bwa va kola bu manyekana, hene yaho livugana li la haana kimoli kigiriki ki ve kihaanwa kyobv oni, nokukileta imbiri welihema lyokuvuganira mu.

¹⁵Na avakulundu velivugana va la vika makono gavo ku mutwe gwekimoli kigiriki imbiri wa Yahova; na kimoli kiliitirwa imbiri wa Yahova.

¹⁶Na musalisi wa vakwa maguta a la leta masahi gekimoli kigiriki mu lihema lyokuvuganira mu:

¹⁷na musalisi a la vika kidete mu masahi, nokuguuha imbiri wa Yahova, hali katano na kaviri, imbiri wengubo yokukinga.

¹⁸Naye a la vika masahi malala ku tsinziga tsyobwali bu veye imbiri wa Yahova, bu veye mu lihema lyokuvuganira mu; na masahi gosi a la ga tsuka hasi hobwali bwekihaanwa kyokusambwa, bu veye ha kiliango kyelihemalyokuvuganira mu.

¹⁹Na a la twulidza itinya yakyo yosi nokugisamba ku bwali.

²⁰Na ndiyo a la kola ku kimoli kigiriki; kuli ya kola ku kimoli kigiriki kyekihaanwa kyobwoni, a la kola ndiyo ku yiki; na musalisi a la va lombera kyokukunika ubwoni, na va la samefwa.

²¹Na a la hila kimoli kigiriki kyene kyova wa hokusosa, nokukisamba nomuliru kuli ya samba kya matsyambiri, ki ve kihaanwa kyobwoni kyelivugana.

²²Na mwamehi lwa a kola ubwoni bugira lisaavira, kilala ku vyosi vya Yahova Nyasaye wewe u gayi vi ta kolwa mba, naye a nyoye likalagirwa;

²³na a va na u vuulirwa ubwoni bwibwe bwa ya kola, a la haana kihaanwa kikye, ki la va imbuli ikole indukanu.

²⁴Na a la vika mukono gwigwe ku mutwe gwekole zana, nokugiitira ha viitiranga kihaanwa kyokusambwa imbiri wa Yahova: i veye kihaanwa kyobwoni.

²⁵Na musalisi a la vugula ku masahi gekihaanwa kyobwoni nekidete kikye, nokugavika ku tsinziga tsyobwali bwekihaanwa kyokusambwa, na masahi gayo a la ga tsuka hasi hobwali bwokusamba kihaanwa.

²⁶Na itinya yayo yosi a la gi samba ku ubwali, kuli itinya yekihaanwa kyemirembe; na musalisi a la lombera uyu ku bwoni bwibwe, kyokukunika, naye a la samefwa.

²⁷Kandi ku vosi mundu ku vandu vekivala na a va na a kola ubwoni bugira lisaavira, na a kola kilala ku vindu vya Yahova ya gaya vi ta kolwa mba, na a nyola likalagirwa;

²⁸na a va na a vuulirwa ubwoni bwibwe bwa ya kola, hene yaho a la haana imbuli, isuveni indukanu, kigira ubwoni bwibwe bwa ya kola.

²⁹Naye a la vika mukono gwigwe ku mutwe gwekihaanwa kyobwoni nokwiita kihaanwa kyobwoni ha kihaanwa kyokusambwa kiitirwa.

³⁰Na musalisi a la vugula ku masahi gakyo nekidete kikye, nokugavika ku tsinziga tsyobwali bwekihaanwa kyokusambwa; na masahi gakyo gosi a la tsuka hasi hobwali.

³¹Na a la twulidza itinya yakyo yosi, kuli itinva: twulidzangwa ku kihaanwa kyemirembe; na musalisi a la gi sambira ku bwali i ve mwayu ku Yahova; na musalisi a la lombera uyu kyokukunika ubwoni, na a la samefwa.

³²Na a va na a leta kimeme kyeligondi kuva kihaanwa kikye kyobwoni, a la ki leta isuveni indukanu.

³³Na a la vika mukono gwigwe ku mutwe gwekihaanwa kyobwoni, nokukiita ki ve kihaanwa kyobwoni ha viitiranga kihaanwa kyokusambwa.

³⁴Na musalisi a la vugula ku masahi gekihaanwa kyobwoni ne kidete kikye, nokugavika ku tsinziga tsyobwali bwekihaanwa kyokusambwa, na masahi gakyo gosi a la tsuka hasi hobwali:

³⁵na a la twulidza itinya yakyo, kuli itinya i twulidzangwa ku kimeme kyeligondi kyevihaanwa vyemirembe, na musalisi a la gi samba ku bwali, kuli vihaanwa vya Yahova vyokuhaanwa nomuliru; na musalisi a la lombera uyu kyokukunika ubwoni, ku bwoni bwibwe twa ya kola, naye a la samefwa.