Read lulogooli Kyavalevi 5 Bible Online

Kyavalevi 5 - lulogooli bible

Kyavalevi 5

¹Ku vosi mundu na a va na a kola ubwoni, ku lihulira mwoyo gwokusuha, na a va muloli, na a va ni ya lola, kinga a manya, naye na a vula kuvuula, ma a la ginga ubudamano bwibwe mwene.

²Kinga mulala ku vosi na a va na a dira kindu kidamano, ni i va inyama inkudzu indamano, kinga mikudzu gyemitugu midamano, kinga kikudzu kyekindu vi molanga kidamano, na likuva yili ni li visika kuye, na a va mudamano, hene yaho a la va nelikalagirwa.

³Kinga na a dira ubuvi bwomundu, ubuvi ku bwosi bwa a duka kuva mudamano, na inkuva yiyi ni i va ni i visika kuye; lwa a duka kumanya, hene yaho a la va nelikalagirwa.

⁴Kinga umundu ku vosi na a va ni yisuha nelivola ku munwa gwigwe bugira kuganagana kukola ubudamano, kinga kukola ubulahi, ku gosi aga a vola nelisuha bugira kuganagana, na likuva zana ni li visika kuye, lwa a duka kulimanya, hene yaho a la va nelikalagirwa ku lilala ku makuva yaga.

⁵Na ga la duka, lwa a veye nelikalagirwa ku lilala kugo, a leyama ubwoni bwibwe bwa ya kola kulyo:

⁶na a la leta ku Yahova, kihaanwa kikye kyelihyola lilye, ki ve kyobwoni bwibwe bwa ya kola, kimeme kyeligondi kisuveni, kinga imbuli isuveni, ki ve, kihaanwa kyobwoni; na musalisi a la lombera uyu kyokukunika ubwoni bwibwe.

⁷Ni i va ubunyali bwibwe si bu duka ku kimeme kyeligondi, a la leta ku Yahova, kihaanwa kikye kyelihyola lilye lya ya kola, amakuulu gaviri, kinga makuulu matuge gaviri, kuva kihaanwa kyelikalagirwa, lilala lyekihaanwa kyobwoni, na lindi lyekihaanwa kyokusambwa.

⁸Na a la ga leta ku musalisi, na a la tanga kuhaana yili li veye lyekihaanwa kyobwoni, na a li votola ligoti kutwulidza mutwe, navutswa a la vula kulyavuhannya vidonye:

⁹na masahi gekihaanwa kyobwoni a la guuha ku luvega lwobwali; na masahi ga tigala a la tahidzira hasi hobwali: ki veye kihaanwa kyobwoni.

¹⁰Naye a la haana lyagaviri, li ve kihaanwa kyokusambwa, kuli lilaga; na musalisi a la lombera uyu kyokukunika ubwoni ku ubwoni bwibwe bwa ya kola, na a la samefwa.

¹¹Navutswa ubunyali bwibwe ni bu ta duka kuleta makuulu gaviri, kinga makuulu matuge gaviri, ma a la lets kidieli kilala ku vidieli likumi vyefa vyobusie bunyuki, kuva kihaanwa kyobwoni bwa ya kola: na a la vula kuvika ku maguta, kinga kimuli; kigira ki veye kihaanwa kyobwoni.

¹²Naye a la bu leta ku musalisi, na musalisi a la vugula ku uluhe lu ve kyokwidzulitsa, nokubusamba ku bwali, ku vihaanwa vi haanangwa nomuliru ku Yahova: ki veye kihaanwa kyobwoni.

¹³Na musalisi a la mu lombera kyokukunika ubwoni bwibwe bwa ya kola ku vindu yivi, naye a la samefwa: na bu tigala bu la va bwomusalisi, kuli kihaanwa kyobusie.

¹⁴Na Yahova ya volera Musa, nokuvola,

¹⁵Ku vosi mundu na a hyola, nokukola ubwoni bugira kusaavira mu vindu vitakatifu vya Yahova, hene yaho a la leta kihaanwa kyelihyolo kikye ku Yahova, likole lyamagondi lidukanu lyomu kyayo kya magondi, kuli livalidza lilyo lyeshekeli lyefetha kuleng'ana neshekeli ya hatakatifu, ki ve kihaanwa kyelihyolo:

¹⁶naye a la tunga kigira likuva lya ya hyola ku mu vindu vitakatifu, na a la meda ku kidieli kyevitano, nokukihaana ku musalisi; na musalisi a la mu lombera kyokukuniko ubwoni neligondi likole lyekihaanwa kyelihyolo, naye a la samefwa.

¹⁷Kandi mulala ku vosi na a kola ubwoni, nokukola lilala ku makuva ga Yahova ya gaya ku ga ta kolwa mba, kali na a ta manya, a veye nelihyolo, na a la ginga ubudamano bwibwe.

¹⁸Naye a la leta ligondi likole lyekyayo lidukanu, kuli livalidza lilyo, li ve kihaanwa kyelihyolo, a la li leta ku musalisi; na musalisi a la mu lombera kyokukunika ubwoni ku likuva lya ya hyola ku bugira lisaavira na a ta manya, naye a la samefwa.

¹⁹Ki veye kihaanwa kyelihyolo; ligali uyu a veye nelihyolo imbiri wa Yahova.