Read lulogooli Kyavalevi 6 Bible Online

Kyavalevi 6 - lulogooli bible

Kyavalevi 6

¹Na Yahova ya volera Musa, nokuvola,

²Mulala ku vosi na a kola ubwoni, nokuhyola ku Yahova nokuvehera wakye ku kindu kyokuiindwa, kinga agelilagana, kinga agelinuula, kinga kutindira wakye,

³kinga na a dola kya gota, na a veha kukyo, nokwisuha ku bubehi; mu vindu yivi vyosi, kilala kuvyo vya mundu a kola nokwona ku;

⁴hene yaho ga la va, na a kola ubwoni nokunyola lihyolo, a lirannya lya ya nyola ku linuula kinga kindu kya ya nyaga netsingulu kinga kyokulindwa kya vikwa kuye, kinga kya gota kya ya dola,

⁵kinga ku vyosi kya yesu ha ku nobubehi; a la virannya kuduka ku budukiru bwakyo, nokumeda ku kidieli kyevitano: a la haana ku uyu wa ki veye kikye, ku lidiku yilyo lyelikalagirwa lilye kuva welihyolo.

⁶Naye a la leta kihaanwa kyelihyolo kikye ku Yahova, ligondi likole lyekyayo lidukanu, kuli livalidza lilyo, kuva kihaanwa kyelihyolo, a la li leta ku musalisi:

⁷na musalisi a la lombera uyu kyokukunika ubwoni imbiri wa Yahova; naye a la samefwa ku vyosi vya ya kola, kuduka kuva welihyolo.

⁸Na Yahova ya volera Musa, nokuvola,

⁹U lage Haruni na avana veve, u va volere, Yili ni lilaga lyekihaanwa kyokusambwa: kihaanwa kyokusambwa ki la va ku muliru ku bwali ubudiku bwosi kuduka mugamba; na muliru gwobwali gwaduke gu vule kusima kubwo

¹⁰Na musalisi a livika ingubo yeye yekatani, na isiruhali yekatani a livika ku mbiri gwigwe; a la ng'uula ligoke lyomuliru gwa samba kihaanwa kyokusambwa ku bwali, na a la li vika haluvega lwobwali.

¹¹Naye a la twulidza tsingubo tsitsye nokwiv; ka tsingubo tsindi, na a la ginga ligoke kutsia nalyo kyova wahokusosa kuduka halahi.

¹²Na muliru gu veye ku bwali gu la lindwa gwa duke madiku gosi kubwo, gu ta sima mba; na musalisi a la samba tsinku kugwo mugamba na mugamba: na a la vika ku kihaanwa kyokusambwa, a la ki lohidza kugwo, na a la samba kugwo tsitinya tsyekihaanwa kyemirembe.

¹³Muliru gu ligereridzwa ku bwali kazozo; gu vule kusima.

¹⁴Na yili ni lilaga lyekihaanwa kyobusie: avana va Haruni va la ki haana imbiri wa Yahova imbiri wobwali.

¹⁵Naye a la vugula kubwo ku luhe lwilwe lwobusie bunyuki bwekihaanwa kyobusie, noku maguta gakyo, na kimuli kyosi ki veye ku kihaanwa kyobusie, na a la ki samba ku bwali kuva mwayu, ki ve kyokwidzulitsa ku Yahova.

¹⁶Nabwo bu tigala kubwo, Haruni na avana veve va la lia: bu la libwa bugira mamera mu hatakatifu, hamugidzi helihema lyokuvuganira mu va la bu lia.

¹⁷Butuminywa halala na mamera. Mmali kuvaha kuva kidieli kyavo ku vindu vi haanangwa ku inze nomuliru; ki veye kitakatifu ligali, kuli kihaanwa kyobwoni, na kuli kihaanwa kyelihyolo.

¹⁸Avasatsa vosi ku avana va Haruni va la bu lia, kuva kidieli kikye kyemihiga gyosi mu visukululwi vyenyu vyosi, ku vindu vi haanangwa nomuliruku vosi a dira ku a la va mutakatifu.

¹⁹Kandi Yahova ya volera Musa, nokuvola,

²⁰Yiki ni kihaanwa kya Haruni na avana veve, kya va la haana ku Yahova ku lidiku lya a vakwa maguta: kidieli kyelikumi kya efa yobusie bunyuki kuva kihaanwa kyobusie kazozo, inusu yabwo mugamba, na inusu yabwo mgolova.

²¹Bu la lomberwa ku kyokukalanga halala na maguta; na lwa bu kalangwa, u la bu leta: mu vidonye vyuminywa u la haana kihaanwa kyobusie kuva mwayu imbiri wa Yahova.

²²Na musalisi wa vakwa maguta ku avana veve u veye mu bugono bwibwe, a la bu haana: ku lilaga lyemihiga gyosi, bu la sambwa kuhaanwa ku Yahova.

²³Vihaanwa vyosi vyobusie vyomusalisi vi la sambwa ligali: si vi la libwa mba.

²⁴Na Yahova ya volera Musa, nokuvola,

²⁵U volere Haruni na avana veve, u vole, Yili ni lilaga lyekihaanwa kyobwoni: ha kihaanwa kyokusambwa yiitirangwa, niho ha kihaanwa kyobwoni ki liitirwa imbiri wa Yahova: ki veye kitakatifu ligali.

²⁶Musalisi u ki haanira ubwoni a la ki lia: ki la libwa mu hatakatifu, ha mugidzi gwelihema lyokuvuganira mu.

²⁷Ku vyosi ki dira inyama yakyo ki la va kitakatifu; na lwa masahi gakyo ga salika ku ingubo ku tsyosi, u logidza ingubo zana mu hatakatifu.

²⁸Navutswa luvindi lwobudohi lwenyama yakyo ya dekerwa mu lu latanywa; ni i va ya dekerwa mu luvindi lwomugasa, lu la kulwa, nokwogidzwa mu amadzi.

²⁹Avasatsa vosi ku vasalisi va la lia ku: i veye intakatifu ligali.

³⁰Kihaanwa kyobwoni, ku vihaanwa vyobwoni vyosi kya masahi gakyo ga letwa mu lihema lyokuvuganira mu, kulomba kyokukunika ubwoni mu hatakatifu, si ki nyala kulibwa mba: ki la sambwa nomuliru.