Read lulogooli Kyavalevi 7 Bible Online

Kyavalevi 7 - lulogooli bible

Kyavalevi 7

¹Kandi yili ni lilaga lyekihaanwa kyelihyolo: ki veye kitakatifu ligali.

²Ha kihaanwa kyokusambwa kiitirangwa va liitira ho kihaanwa kyelihyolo; na masahi gakyo a luuha ku bwali tsimbega tsyosi.

³Na a la haana itinya yakyo yosi: musembe, na itinya yosi yoku amala,

⁴na tsimbigu tsyakyo tsyombi, na itinya yatsyo, i veye himbi nekisindi, na inderwa yoku likudumani, halala netsimbigu tsyombi, a la vi twulidza;

⁵na musalisi a la vi samba ku bwali kuva kihaanwa kya lombwa nomuliru ku Yahova: ki veye kihaanwa kyelihyola.

⁶Avasalisi avasatsa vosi va la lia ku: ki la libwa mu hatakatifu; ki veye kitakatifu ligali.

⁷Kuli kihaanwa kyobwoni ki veye, kandi kihaanwa kyelihyolo ki veye ndiyo; lilaga lyavyo li veye lilala: musalisi u lomba kyokukunika ubwoni nakyo a la ki nyola.

⁸Na musalisi u haananga kihaanwa kyokusambwa kyomundu sa mulala, musalisi mwene a la nyola lisero lyekihaanwa kyokusambwa kya u haani kuva lilye.

⁹Na vihaanwa vyobusie vyosi vyuminywa mu mahiga, na vyosi vya lomberwa ku kyokukalanga, noku kisambiru, vi la va vyomusalisi uyu u vi haana.

¹⁰Na kihaanwa ku vyosi, ni ki va ni ki tsukanywa namaguta, kinga ubusie bwumu, ki la va kya avana vosi va Haruni, mulala kuli wundi.

¹¹Yili ni lilaga lyelihaana vihaanwa vyemirembe, vya mundu a la haana ku Yahova.

¹²Na a va na a ki haana ku lisantidza, hene yaho a la haana halala nekihaanwa kyelisantidza ubukima bu ta li na mamera, bu tsukanywa namaguta, na kyapati ki ta li na mamera kya vakwa na maguta, na ubukima bwobusie bunyuki na bu tsyukanywa namaguta bwa kalangwa.

¹³Halala nobukima bwamamera a la haana kihaanwa kikye kyekihaanwa kyemirembe kuva lisantidza.

¹⁴Na kuvyo a la haana kilala ku vihaanwa ki ve kihaanwa kyokudigululwa ku Yahova; ki la va kyomusalisi wuhanga masahi gevihaanwa vyemirembe.

¹⁵Na inyama yekihaanwa kikye kiitangwa ku lisantidza i la libwa ku lidiku zana lyokuhaanwa; a ta leka kali inkekeke kuyo kudukamugamba.

¹⁶Navutswa kihaanwa kikye ni ki va ni ki ve kihaanwa kyelilagana, kinga kihaanwa ki letwa nomwoyo gwobuyanzi, ki la libwa ku lidiku lya ya ki leta; na kya tigala ku inyama yekihaanwa ki la libwa ku lidiku lya kaviri:

¹⁷navutswa kya tigala kyenyama yekihaanwa kuduka ku lidiku lya kavaka ki la sambwa nomuliru.

¹⁸Kandi ku inyama yekihaanwa kyemirembe kikye, ni i va ni i libwa ku lidiku lya kavaka, si i la vugirirwa mba, kinga kuvalidzwa ku uyu wa haana i la va livihiridza, na uyu a lia kuyo mwene a la ginga ubudamano bwibwe.

¹⁹Na inyama i dira kindu kidamano si i la libwa mba; i la sambwa nomuliru. Na ku inyama yindi, sa mulala uyu u veye museredzi a la gi lia:

²⁰navutswa uyu u lia ku inyama yevihaanwa vyemirembe, vi veye vya Yahova, na a veye nobudamano bwibwe kuye, a la twulidzwa ku avandu veve.

²¹Na mundu ku vosi na a dira ku kindu kidamano, ubudamano bwomundu, kinga inyama indamano, kinga kindu kivihiriridza ku lyosi, na a lia inyama yekihaanwa kyemirembe, ki veye kya Yahova, mundu uyu a la twulidzwa ku avandu veve.

²²Kandi Yahova ya volera Musa, nokuvola,

²³U volere avana va Israeli, nokuvavolera, Mu ta lia tsitinya tsyetsing'ombe, kinga tsyamagondi, kinga tsyetsimbuli.

²⁴Kandi tsitinya tsyetsinyama tsyekudziranga, na tsitinya tsyenyama yenyama yombulimu ya tandula, mu nyala kugitumekira ku butumiki bundi bwosi; navutswa mu ta gi lia mba.

²⁵Kigira mundu ku vosi u lia tsitinya tsyenyama, ku tsinyama tsya avandu va haana kuva kihaanwa ki lombwa nomuliru ku Yahova, uyu u lia ku a la twulidza ku avandu veve.

²⁶Kandi mu ta lia masahi getsing'ano tsyosi, ni ga veye masahi gamanyonyi, kinga getsinyama, mu tsinyumba tsyenyu tsyosi.

²⁷Ku vosi uyu u lia masahi ku gosi, uyu a la twulidzwa ku vandu veve.

²⁸Kandi Yahova ya volera Musa nokuvola,

²⁹U volere avana va Israeli, nokuvavolera, Uyu u haananga vihaanwa vivye vyemirembe ku Yahova a la leta kihaanwa kikye ku Yahova ki twula ku vihaanwa vyemirembe vivye;

³⁰makono gege mwene ga la leta vihaanwa vya Yahova vi haanirwa ku muliru; a la leta itinya halala nendasi, indasi i hungudzwe kuva kihaanwa kyokuhungudzwa imbiri wa Yahova.

³¹Na musalisi a la samba itinya ku bwali; navutswa indasi i la va ya Haruni na y a avana veve.

³²Na kinama kyoluvega lwomukono mulungi u la ha musalisi kuva kihaanwa kyokudigululwa igulu, ki twulidzwe ku vihaanwa vyenyu vyemirembe.

³³Uyu ku avana va Haruni u haana masahi gevihaanwa vyemirembe, na itinya, a la nyola kinama kyoluvega lwomukono mulungi kuva kidieli kikye.

³⁴Kigira indasi yokuhungudzwa, na kinama yokudigululwa mu vi vuguye ku avana va Israeli ku vihaanwa vyavo vyemirembe, na mu vi haani ku Haruni musalisi na avana veve kuva kidieli kyavo mihiga gyosi kutwula ku avana va Israeli.

³⁵Yiki ni kidieli kyelivakwa kya Haruni, na kidieli kyelivakwa kya avana veve, ki twula ku vihaanwa vya Yahova vi haanangwa nomuliru ku lidiku lya a va singeridza va tumekire Yahova mu miyinzi gyobusalisi;

³⁶vya Yahova ya laga avana va Israeli va va he, ku lidiku lya ya va vaka maguta. Ki veye kidieli kyavo mihiga gyosi mu visukululwi vyavo vyosi.

³⁷Yili ni lilaga lyekihaanwa kyokusambwa, na lyekihaanwa kyobusie, na lyekihaanwa kyobwoni, na lyekihaanwa kyelihyolo, na lyokwivika ku miyinzi mitakatifu, na lyevihaanwa vyemirembe;

³⁸vya Yahova ya laga Musa mu kigulu kya Sinai, ku lidiku lya ya laga avana va Israeli kuleta vihaanwa vyavo ku Yahova mu kyangalangwi kya Sinai.