Read lulogooli Kyavalevi 8 Bible Online

Kyavalevi 8 - lulogooli bible

Kyavalevi 8

¹Na Yahova ya volera Musa nokuvola,

²Vugula Haruni na avana veve halala naye, na tsingubo, na maguta gokuvaka, na igiriki yekihaanwa kyobwoni, na magondi makole gaviri, na kihinda kyobukima bu ta li na mamera;

³na u vugannye livugana lyosi ha kiliango kyelihema lyokuvuganira mu.

⁴Na Musa ya kola kuli Yahova ya mu laga; na livugana lya vugannywa ha kiliango kyelihema lyokuvuganira mu.

⁵Na Musa ya volera livugana, Yili ni likuva lya Yahova va laga li kolwe.

⁶Na Musa ya leta Haruni na avana veve, na a va singa na amadzi.

⁷Na ya vika kuye likoti, na a mu boha nomusipi, na a mu vika ijoho, na a mu vika kisibao, na a mu boha musipi gwekisibao gwemiyinzi gyomusidza.

⁸Na ya vika kuye isalamba yomukiritu: na a vika Urim na Thumim mu isalamba yomukiritu.

⁹Na ya mu vika igudwa ku mutwe gwigwe; na ku igudwa, mbweni ya vika ku kibale kyethahabu, itaji intakatifu; kuli Yahova ya laga Musa.

¹⁰Na Musa ya vugula maguta gokuvaka, na a vaka lihema na vyosi vi veye mu, na a vi takasa.

¹¹Na yuha maguta ku bwali hali katano na kaviri, na a vaka ubwali na viju vyabwo vyosi, na lwero, na bwikaliru bwalwo, kuvitakasa.

¹²Naya tsuka maguta gokuvaka ku mutwe gwa Haruni, nokumuvaka kumutakasa.

¹³Na Musa ya leta avana va Haruni, na a va vika makoti, nokuvaboha misipi, na a va vika tsigudwa; kuli Yahova ya laga Musa.

¹⁴Kandi ya leta igiriki yekihaanwa kyobwoni: na Haruni na avana veve va vika makono gavo ku mutwe gwegiriki yekihaanwa kyobwoni.

¹⁵Na ya giita; na Musa ya vugula masahi, na a ga vika ku tsinziga tsyobwali tsimbega tsyosi nekidete kikye na a takasa ubwali, na a tsuka masahi isi wobwali kubutakasa, a duke kubulombera kyokukunika ubwoni.

¹⁶Na vugula tsitinya tsyosi tsyo mmunda, na inderwa yelikudumani, na tsimbigu tsyombi, na maguta gatsyo; na Musa ya vi sambira ku bwali.

¹⁷Navutswa igiriki, na lisero lyayo, na inyama yayo, na ubose bwayo, ya samba nomuliru kyova wa hokusosa; kuli Yahova ya laga Musa.

¹⁸Na ya haana ligondi likole lyekihaanwa kyokusambwa: na Haruni na avana veve va vika makono gavo ku mutwe gweligondi likole.

¹⁹Na ya liita; na Musa yuha masahi ku bwali tsimbega tsyosi.

²⁰Naye ya donnya ligondi; na Musa ya samba ni mutwe, na vidonye, na maguta.

²¹Na yogidza vyomunda, ne virenge na amadzi; na Musa ya samba ligondi likole lyosi ku bwali: kya li kihaanwa kyokusambwa kuva mwayu: kya li kihaanwa kya haanwa nomuliru ku Yahova; kuli Yahova ya laga Musa.

²²Naye ya haana ligondi likole lindi, likole lyokutakasa: na Haruni na avana veve va vika makono gavo ku mutwe gwelikole.

²³Na ya liita; na Musa ya vugula ku masahi galyo, na a ga vika ku isonga yo gutu gwa Haruni igulu gwo mukono mulungi, noku kidete kikye kinene kyomukono mulungi, noku keno kikye kinene kyekirenge kilungi.

²⁴Na ya leta avana va Haruni; na Musa ya vika masahi ku tsisonga tsya amatu gavo igulu aga mukono mulungi, noku videte vyavo vinene vyamakono malungi, noku vino vyavo vinene vyevirenge vilungi: na Musa yuha masahi ku bwali tsimbega tsyosi.

²⁵Na ya vugula vivana, na musenbe, na tsitinya tsyosi tsyomunda, na inderwa yelikudumani, na tsimbigu tsyombi, na tsitinya tsyatsyo, na kinama kyomukono mulungi:

²⁶Na mu kihinda kyobukima bu ta li na mamera, kya li imbiri wa Yahova, ya vugula mu imango indala, na imango yindi ya vakwa maguta, na kyapati kilala, na a vi vika ku maguta, noku kinama kyomukono mulungi:

²⁷na ya vika vyosi mu makono ga Haruni, nomu makono ga avana veve, na a vi hungudza vi ve kihaanwa kyokuhungudza imbiri wa Yahova.

²⁸Na Musa ya vi vugula mu makono gavo, nokuvisamba ku bwali ku kihaanwa kyokusambwa: vya li vyokutakasa, vi ve mwayu; kya li kihaanwa kya lombwa nomuliru ku Yahova.

²⁹Na Musa ya vugula indasi, na a gi hungudza i ve kihaanwa kyokuhungudzwa imbiri wa Yahova: kya li kidieli kya Musa ku likole lya haanwa kutakasa, kuli Yahova ya laga Musa.

³⁰Na Musa ya vugula ku maguta gokuvaka, noku masahi agoku bwali ni yuha ku Haruni, ku tsingubo tsitsye, noku avana veve, noku tsingubo tsya avana veve halala naye, na ya takasa Haruni, na tsingubo tsitsye, na avana veve, na tsingubo tsya avana veve halala naye.

³¹Na Musa ya volera Haruni na avana veve, Mu dekere inyama yiyi ha kiliango kyelihema lyokuvuganira mu: na mu lire ho nobukima bu veye mu kihinda kyokutakasa, kuli nda laga, nokuvola, Haruni na avana veve va la vi lia.

³²Na ki tigala ku yivyo, inyama na ubukima mu la samba nomuliru.

³³Na mu ta twula mu kiliango kyelihema lyokuvuganira mu madiku gatano na gaviri, kuduka madiku gelitakaswa lyenyu ga dukidzwa: kigira a la mu takasa madiku gatano na gaviri.

³⁴Kuli ga kolwa lero, ni ndiyo Yahova ya laga kukolwa, kulombera mwinye kyokukuniko ubwoni.

³⁵Na mu la menya ha kiliango kyelihema lyokuvuganira mu madiku gatano na gaviri, mbasu nobudiku, nokulinda ubulindi bwa Yahova mu vule kukudza: kigira ni ndiyo ndageywi.

³⁶Kunangwa Haruni na avana veve va kola makuva gosi ga Yahova ya laga nomunwa gwa Musa.