Read lulogooli Jeremia 13 Bible Online

Jeremia 13 - lulogooli bible

Jeremia 13

¹Yahova ya mbolera yaga, Tsia wegulire musipi gwa katani, u gu vike mu kikenge kikyo, u ta gu vika mu madzi.

²Ma nda gula musipi kuli likuva lya Yahova, noku gweboha mkikenge kyange.

³Na likuva lya Yahova lya duka ku inze hali kaviri, kuvola,

⁴Vugula mu sipi gwa u guli, gu veye mu kikenge kikyo, u singire, u tsie ku mugera gwa Farati u gu vise yo mu bogo bweligina.

⁵Ma nda tsia, nokuguvisa himbi nomugera gwa Farati, kuli Yahova ya mbolera.

⁶Na ga duka inyima wa madiku manyingi, Yahova ya mbolera, Singira, u tsie ku mugera gwa Farati, u vugule yo musipi, gwa nda ku volera u gu vise yo.

⁷Ma nda tsia ku mugera gwa Farati, nokuyava, na nda vugula musipi ha nda gu visa; henza, musipi gwa li ni gwoneka, si gwa li kindu kandi.

⁸Hene yaho likuva lya Yahova lya duka ku inze, kuvola,

⁹Yahova a vola, ku lilonda lugano yilu ndono nnya luyai lwa Yuda, noluyai lunene lwa Yerusalemi.

¹⁰Avandu vadamano yava, ava sula kuhulira makuva gange, ava gendanga mu bukyamu bwemyoyo gyavo, ava londa vanya saye vandi kuvatumekira, nokuva sigamira, va la va kuli musipi yigu, ugu ta veye kindu.

¹¹Kigira ga veye kuli musipi gu hambana nekikenge kyomundu, ni ndiyo inze ndehambannya inyumba yosi ya Israeli nenyumba yosi ya Yuda, Yahova a vola; va duke kuva ku inze avandu nelieta, nelidzominywa, nobukumi, navutswa si va bugirira kuhulira mba.

¹²Kunangwa kigira yaga u va volere likuva yili: Yahova, Nyasaye wa Israeli, a vola ndi, khupa sa indala i lizulitswa iwaini: navo va la ku volera, Si ku manya tsichupa si indala tsi lizula ligali iwaini?

¹³Hene Yaho u la va volera, Yahova a vola ndi, Henza, avandu vosi ava menyanga mu kivala yiki, kali avami vikala nga ku intebe yobwami ya Daudi, navasalisi, navaprofeti, na vosi ava menya Yerusalemi, nda vizulitsa lihambika.

¹⁴Nda va duyannya, kali avadada navana halala, Yahova a vola: na si nda vererera kandi si nda lekera, kandi si nda va netsimbabasi, kuduka ndeke kuvadividza.

¹⁵Mu hulire, mu tegidze matumu ta va noluyai mba; kigira Yahova u voye.

¹⁶Mu kuminye Yahova Nyasaye wenyu, na a kikiri kuleta kisundi, virenge venyu ni vi kikiri kwikigitala mu vigulu vyekisundi; kandi, inyinga mwenyanga ubulavu, a bu girunkanyanga kuva kiriri kyelikudza, nokubukola kuva kisundi kinene.

¹⁷Navutswa ni mu va ni mu vula kuhulira likuva yili, mwoyo gwange gu la lira makiriri kigira uluyai lwenyu; tsimoni tsyange tsi la lira ligali, nokuganguluka amaliga, kigira kyayo kya Yahova ki lanyeywi.

¹⁸U volera mwami nomwami wekikali mama womwami, Mwegehidze, mwikale hasi; kigira tsigudwa tsyenyu tsi kunuki, kali itaji yobukumi bwenyu.

¹⁹Madala ga Kusini ga haneywi, si ha veye nomundu wigula: Yuda u hileywi mbuhambe vosi; li hileywi mbuhambe ligali.

²⁰Mu ginge tsimoni, mu henze avatwulanga kasikasini; kyayo kikyo kya wa hebwa ki veye haliha, kyayo kikyo kilahi?

²¹U la vola ki ive lwa a vika yavo kuva mutwe ku ive, wa ive mwene u vegidza va ve avalina vovo? Ubusaliri si bu la ku gumira kuli mukali u veye mu lilumwa lilyei

²²Nu u va nu u teva mu mwoyo gugwo, Makuva yaga ga duka ku inze kigira ki? Kigira ubunene bwobudamano bubwo kitweya kikyo ki kunuliywe, na maki gogo ga saliranga.

²³Muethiopia a nyala kugirunkannya ligodo lilye, naho ingo i nyala kugirunkannya ubusalago bwayo? Nu u va nu u nyala yaga hene yaho na mwinye mu la nyala kukola bulahi, ava mwa nala kukola budamano.

²⁴Kigira yaga nda va salannya, kuli mukudzi gwilulukanga, mu imbuudza yomwigendanyama.

²⁵Ikura yoyo ni yiyi, kidieli kya wa gererwa ki twulanga ku inze, Yahova a vola; kigira mwa nzivirira, na u suuviranga makuva gobubehi.

²⁶Kigira yaga inze nda vimbula kitweya kikyo mmumoni mumwo, netsisoni tsitsyo tsi la lang'ama.

²⁷Inze ndola livihiriridza lilyo, kali ubuheyi bubwo, ne lilang'ana lilyo na makuva madamano agamalaya gogo, mu tugulu mu milimi. O bayaye ku ive Yerusalemi si wenya kutakaswa; vindu yivi vi la tsitsagil'la kuduka inyinga ki?