Read lulogooli Jeremia 15 Bible Online

Jeremia 15 - lulogooli bible

Jeremia 15

¹Hene yaho Yahova ya mbolera; Kali Musa na Samweli ni va singira imbiri wange, mwoyo gwange si gwa ka va gu yeke ku avandu yava mba: u va te va twule imbiri wetsimoni tsyange, va tsie.

²Na ga la duka, lwa va ku volera, Ku la twula kutsia haliha? Hene yaho u la va volera, Yahova a vola: Ava ng'odwa ku likudza, va la tsia kukudza; na va ng'odwa ku kivavi, va la tsia ku kivavi; na va ng'odwa ku inzala, va la tsia ku inzala, na va ng'odwa ku lilanywa, va la va lilanya.

³Nda laga kuvo tsing'ano tsine, Yahova a vola: kivavi kwiita, netsimbwa kutandula, na manyonyi gombwerefu, netsinyama tsindulu tsyekivala, kulia nokudividza.

⁴Nda kola va sigiswe yiyi neyiyi mu bwami bwosi bwelirova, kigira Manase, mwana wa Hezekia, mwami wa Yuda, kigira inkuva ya ya kola ha Yerusalemi.

⁵Kigira ni bwaha u vererera ive, O Yerusalemi? Naho ni bwaha u lirira ive? Naho ni bwaha u girunkana haluvega kuteva liva lilyo?

⁶Ive u suye inze, Yahova a vola, wirane inyima: kigira yaga nyiye mukono gwange ku ive, nokukudividza; nduhi ku lyeganira.

⁷Mba sesi nekisesero mu viribwa vyekivala; mba nyagi avana vavo, nzononnyi avandu vange; navo va vuli kwirana nokuleka tsinzira tsyavo.

⁸Avakunzakaii vavo va medeki ku inze kuvita muyeke gwomu inyanza; ndeti kuvo umulanyi, ku mama wavasoleli, inyinga yo mbasu hagati: ndeti ubululu nevyokutihidza kugwa kuye nonoho.

⁹Mukali uyu wivuli avana vatano na vaviri u gehi tsingulu; na u lakuye mwoyo; liuva lilye li yera ni gu kikiri mbasu; u nyoye tsisoni nokuleganywa: na va tigala kuvo nda va vika ku kivavi imbiri wavasigu vavo, Yahova a vola.

¹⁰Bayaye ku inze, O mama wange wa nzivula mundu wobutindi nomundu welihing'ana nelirova lyosi Inze si mbambidzanga kevete kunyola vyambeti, kandi avandu si va hambidzanga inze kunyola vyambeti; navulsua sa mulala kuvo va naamanga.

¹¹Yahova ya vola, Ligali nda ku vika tsingulu mu ubulahi; ligali nda niga musigu a saave ive inyinga yobudamano nomu inyinga yekivi.

¹²Mundu a nyala kuvunannya kivya, kivya kya twula kasikasini, kinga mugasa?

¹³Ubutugi bubwo na akiba yoyo nda vi haana vi ve vilanye bugira kutungwa, ga veye kigira ubwoni bwavo bwosi, kali mu tsinzako tsyavo tsyosi.

¹⁴Na nda va hile va tsia halala navasigu vavo, vingira mu kivala kya u ta manya: kigira muliru gu fwanyeywi mu butima bwange, gu la dedima ku ive.

¹⁵O Yahova, u manya; u nzidzulitse, udze ku inze, u mbanzire kisalya ku yavo ava dambidzanga inze; u ta ntwulidza mu lyekudzira lilyo mba: u manye nyola amanyego kigira ive.

¹⁶Makuva gogo ga loleka, na inze nda ga lia; makuva gogo ga li ubusangali nobuyanzi bwomwoyo gwange: kigira nangangwa ku lieta lilyo, O Yahova, Nyasaye wa mahe.

¹⁷Nda wla kwikala mu livugana lya yava ava syevanga, kandi nda vula kusangala; ndikala tsyeng'ine kigira mukono gugwo; kigira u nzizulitsi ubutima.

¹⁸Kigira ki lisalira lyange li tsitsagil'langa madiku gosi, nolugoma lwange, kigira ki si lu nyala kuhonywa, lwa sula kuhonywa? Iigali ive u la va ku inze kuli kisenukiru kyamadzi ki gadanga, kuli amadzi ga kamanga?

¹⁹Kigira yaga Yahova a vola, Nu u va ni wirana, hene yaho inze nda ku leta kandi, u duke kusingira imbiri wange; nu u va nu u twulidza kyobuguli budinyu mu ki veye kidamano, u la va kuli munwa gwange: va lirana ku ive, navutswa ive u la vula kwirana kuvo.

²⁰Nda kola ive u ve lidigi lyolugaga lwomugasa ku vandu yava; navo va la lwana nive, navutswa va la vula kukuguuta: kigira mbeye halala nive kukutungira nokukuhonnya, Yahova a vola.

²¹Na nda honnya ive kutwula mmukono gwavadamano, na nda tungira ive kutwula mmukono gwa uyu u tihidzanga.