Read lulogooli Jeremia 16 Bible Online

Jeremia 16 - lulogooli bible

Jeremia 16

¹Likuva lya Yahova lya duka ku inze kandi, kuvola,

²U la vula kukwa mukali, kandi u la vula kuva navana vayai kinga vakana hano.

³Kigira Yahova a vola yaga ku makuva gavana vayai noku avana vakana avivulangwa hano, noku makuva ga vamama vavo ava vivula, noku makuva ga vadada vavo ava va verekidza mu kivala yiki:

⁴Va la kudza nelikudza lidamano ligali; va la vula kusyomirwa, kandi va la vula kutebwa; va la va kuli amandu ku mmoni mwelirova; va la dividzwa nekivavi, nenzala; na mibiri mikudzu gyavo gyi la va vyokulia vyamanyonyi gombwerefu, nevyetsinyama tsyelirova.

⁵Kigira Yahova a vola, U tingira mu inyumba ya magenga, kandi u ta tsia ku lilira, kinga kuvasyomera Yahova a vola, Kigira nyagi avandu yava mirembe gyange, kali tsimbabasi tsyange nelivererera.

⁶Vosi avanene na vakekeke va la kudza mu kivala yiki: va la vula kutebwa, kandi avandu si va la va syomera mba, kandi si va lekalagira yavo mba, kandi si va la vegera uluvego mba;

⁷kandi avandu si va la va megannyira ubukima mu lisyoma kuleminya myoyo gyavo ku vakudzu; kandi avandu si va la va ha kikombe kyokuleminya va nwere dada kinga mama.

⁸U tingira mu inyumba yokulia lisavo kwikala halala navo kulia nokunwa.

⁹Kigira Yahova wa mahe, Nyasaye wa Israeli, a vola: Henza, imbiri wetsimoni tsyenyu, nomu madiku genyu, inze nda heridza hano mwoyo gwobusangali, nomwoyo gwesango, mwoyo gwa u sereye nomwoyo gwomwiha.

¹⁰Kandi ga la duka, lwa u mannya avandu yava makuva yaga gosi, navo ni va ku teva, Yahova ya vola ubudamano yibu bunene ku kwinye kigira ki? Budamano bwetu bu veye ki? Na bwoni bwetu bwa kwa kolera Yahova Nyasaye wetu bu veye ki?

¹¹Hene yaho u la va volera, Yahova a vola, Kigira avaguga venyu va ndeki, nokulonda avanyasaye vandi, nokuvatumekira, nokuvasigamira, nokuleka inze, va vule kugumira lilaga lyange;

¹²Na mwinye mu koli budamano kuvita vaguga venyu; kigira mwinye, henzi, mu gendanga sa mulala kulonda bukyamu bwomwoyo gwigwe mudamano, kuduka mu vule kuhulira inze:

¹³kunangwa kigira yaga inze nda mu ta kyova mu twule mu kivala yiki mwingire mu kivala kya mu ta manya, mwinye kinga vaguga venyu; na ha zana mu la tumekira avanyasaye vandi mbasu nobudiku; kigira inze si nda mu vererera.

¹⁴Kigira yaga, henza, madiku gadza Yahova a vola, mmadiku gene yago iikuva yili si li la volwa kandi mba, Kuli Yahova a veve mwoyo, wa leta avana va Israeli kwanegira kutwula mu kivala kya Egepeti;

¹⁵navutswa, likuva yili li la volua, Kuli Yahova a veye mwoyo wa leta avana va Israeli kutwula ku kivala kya kasikasini, nokutwula mu vivala vyosi vya ya vadikidzira mu. Na nda va leta kandi mu kivala kyavo avene, kivala kya nda ha avaguga vavo.

¹⁶Henza, nda tuma avandu kuleta avaluvi avanyingi, Yahova a vola, na va la va luva; na inyima wa yaga nda tuma avandu kuleta avahimi avanyingi, na va la va hima va twule mu vigulu vyosi, nomu tugulu twosi, nokutwula mu tsinkombe tsyamagina.

¹⁷Kigira tsimoni tsyange tsi lolanga tsinzira tsyavo tsyosi; si va visika mmoni mwange, kandi ubudamano bwavo si bu la visika imbiri wetsimoni tsyange.

¹⁸Nda tanga kuvatunga ubudamano bwavo nobwoni bwavo hali kaviri, kigira vononnyi kivala kyange nemibiri mikudzu gyevindu vyavo vyokuvihiriridza, nokwizulitsa ku miyandu gyange livihiriridza lyavo.

¹⁹O Yahova, tsingulu tsyange, impinga yange, na kyokwivisa mu kyange ku lidiku lyekivi, tsihiri tsi ladza ku ive kutwula ku tsintulu tsyelirova, na va la vola, Avaguga vetu si va nyola kindu mu miyandu navutswa ububehi bweng'ine, aga vutswa na vindu vi ta konya kindu.

²⁰Mundu a lelombera avanyasaye mwene, ava ta li avanyasaye?

²¹Kigira yaga, henza, nda va kola va manye, inyinga indala yiyi nda va mannya mukono gwange kuli gu veye, nobunyali bwange; navo va la manya lieta lyange li veye Yahova.