Read lulogooli Jeremia 17 Bible Online

Jeremia 17 - lulogooli bible

Jeremia 17

¹Ubwoni bwa Yuda bwa ng'odwa nekalamu yekivya, na isonga yeligina lyalimasi: bwa ng'odwa ku kibao kyemyoyo gyavo, noku tsinziga tsyobwalibwenyu;

²inyingaavana vavo vidzulitsa ubwali bwavo nemisambwa gyavo himbi nemisala mivisi mu vigulu vitambi.

³O kigulu kyange kyomuiimi, nda haana ubutugi bubwo na akiba yoyo yosi vi ve vilanye na hadiguluku hoho kigira ubwoni mu tsinzako tsitsyo tsyosi.

⁴Na ive, kali ive mwene, u la lekana nemiyandu gyigyo gya nda ku ha; nda niga ive u tumekire avasigu vovo mu kivala kya u ta manya: kigira mwa fwana muliru mu ubut ma bwange gu la dedima kazozo.

⁵Yahova a vola ndi: U laameywi uyu u suuviranga ku mundu, u kolanga mubiri kuva mukono gwigwe, nomwoyo gwigwe kuleka Yahova.

⁶Kigira a la va kuli musala gwekyangalangwi a la vula kulola lwa bulahi bu duka, navutswa a la menya ahumu mu kyangalangwi, kivala kyomunyu kyavandu va ta menya mu.

⁷A veye nobugasu mundu uyu u suuviranga ku Yahova, wa Yahova a veye kisuuviri kikye.

⁸Kigira a la va kuli musala gu simikwa ahimbi namadzi, ugu hilanga imiri gyagwo yiyi neyiyi himbi nomugera, a la vula kutia inyinga yo uluya ludzanga, navutswa litu lyagwo li la va livisi; si gu la henda mwoyo ku muhiga gwekimeyu, kandi si a la leka liama makuyu.

⁹Mwoyo yigwo nogwobugadi kuvita vindu vyosi, gu veye nobudekeranu buvitiriru: ni bwaha a nyala kugumanya?

¹⁰Inze, Yahova nzidera mwoyo, ngeridza kikenge, nduke kuha sa mulala kuli tsinzira tsitsye, kuli amakuyu gelikola lilye.

¹¹Kuli inkwari i goneranga mabuyu amasiru nokuvula kwalula, ni ndiyo a veye uyu u nyola ubutugi, navutswa si bu veye ku bulungi; bu la mu leka hagati ha madiku gege, na mu kiheri kikye a la va umusiru.

¹²Intebe yobwami yobukumi, ya singeridzwa kutwula mu litanga, niyo hatakatiiu hetu.

¹³O Yahova, ive kisuuviri kya Israeli, vosi ava lekanga ive va la va isoni. Yavo ava twula ku inze va la ng'odwa mu lirova, kigira va leka Yahova, u veye kisenukiru kyamadzi gelivamwoyo.

¹⁴U mbonnye, O Yahova, na nda hona; u mbonnye, na nda hona: kigira ive u veye lidzominywa lyange.

¹⁵Henza, va ntevanga, Likuva lya Yahova li veye haliha? Ii duke kalunu.

¹⁶Ku makuva gange, si nkoli bwangu kuleka kulonda ive nokuleka miyinzi gyange gyomwayi; kandi si nkayirwa lidiku lyekivi; ive u manya: yaga ga twula mu minwa gyange, ga li imbiri wommoni mumwo.

¹⁷U ta va kyokutihidza ku inze: ive u veye kyokwivisa mu kyange ku lidiku lyobudamano.

¹⁸Va ve isoni yavo ava dambidzanga inze, navutswa inze mbule kuva isoni; va timuke inkolo, navutswa inze mbule kutimuka inkolo; u lete kuvo lidiku lyobudamano, u va dividze lidividza hali kaviri.

¹⁹Yahova ya mbolera yaga: Tsia u singire mu kiribwa kyavana vavandu yava, ha avami va Yuda vingiriranga, kandi ha va twuliranga nomu viribwa vyosi vya Yerusalemi,

²⁰u va volere, Mu hulire likuva lya Yahova, mwinye avami va Yuda, na Yuda vosi, na yavo ava menyanga Yerusalemi vosi, mwinye avingiranga mu viribwa yivi:

²¹Yahova a vola Mu gelihe avene, mu ta ginga misigo kali mulala ku lidiku lyelisabato kandi mu ta gyi leta kwingira mu kiribwa kya Yerusalemi;

²²kandi mu ta twula nomusigo mu tsinyumba tssyenyu ku lidiku lyelisabato, kandi mu ta kola miyinzi kali mulala: navutswa mu takase lidiku lyelisabato, kuli nda laga avaguga venyu.

²³Navutswa si va hulira mba, kinga kutegidza amatu gavo, navutswa va kola magoti gavo kuva madinyu, va vule kuhulira, va vule kugumira megidzo.

²⁴Na ga la duka, ni mu mbulira ligali, Yahova a vola, ni mu va ni mu vula kuleta musigo kali mulala ku viribwa vyelidala yili ku lidiku lyelisabato, navutswa ni mu takasa lidiku lyelisabato, mu vule kukola miyinzi ku lidiku yilyo;

²⁵hene yaho va lingira ku viribwa vyelidala yili avami navandu vanene avikala ku intebe yobwami ya Daudi, avokunina ku magari gobwami, noku tsiparasi, navo, navanene vavo, avandu va Yuda, na yavo ava menyanga Yerusalemi; nelidala yili li la menya madiku gosi.

²⁶Na va la twula mu madala ga Yuda, nokutwula hosi ku tsimbega tsya Yerusalemi, nokutwula mu kivala kya Benjamini, nokutwula mu kivala kyekereremu, nokutwula mu kivala kyevigulu, nokutwula ku luvega lwa Kusini, va letanga vihaanwa vyokusambwa, na visyuviriru, na vihaanwa vyelisantidza, va vi leta kuduka mu inyumba ya Yahova.

²⁷Navutswa ni mu sula kuhulira inze kutakasa lidiku lyelisabato, kuvula kuginga musigo nokwingira mu viribwa vya Yerusalemi ku lidiku lyelisabato; hene yaho nda Swana muliru ha viribwa vyalyo, nagwo gu la samba tsinyumba tsyobwami tsya Yerusalemi, si gu la siminywa mba.