Read lulogooli Jeremia 21 Bible Online

Jeremia 21 - lulogooli bible

Jeremia 21

¹Likuva lya duka ku Jeremia kutwula ku Yahova, lwa mwami Zedekia ya leta kuye Pashuri mwana wa Malikija, na Zefania mwana wa Maaseia, musalisi, kuvola,

²Mwadza, u ku tevere Yahova; kigira Nebukadirezaru mwami wa Babuloni u duki kuleta ubulwani ku kwinye: namusia Yahova a la ku kolera kuli miyinzi gyigwe gyosi gyokugenya, a duke kwanegira kutwula ku kwinye.

³Ma Jeremia ya va volera, Mu la volera Zedekia makuva yaga:

⁴Yahova, Nyasaye wa Israeli, a ku volera, Henza, nda girunkannya vyuma vyobulwani vi veye mmakono genyu, vya mu lwaniranga nomwami wa Babuloni na Vakalidei ava mu kumbiridza kyova wa madigi getsingaga tsyenyu; nda va vungidza hagati helidala yili.

⁵Na inze mwene nda lwana na mw inye nomukono gwa nyirwa nomukono gwetsingulu, mu livihirirwa, nomu bululu, nomu butima bunene.

⁶Na nda kuya ava menyanga mu lidala yili, avandu netsinyama: va la kudza nobulwaye ubunene.

⁷Na inyima wa yaga, Yahova a vola, Zedekia mwami wa Yuda, navatumekiri veve, navandu vosi ava li tigala mu lidala yili inyima wobulwaye zana, nekivavi, nenzala, nda va vika vosi mmukono gwa Nebukadirezaru mwami wa Babuloni, nommakono gavasigu vavo, nommakono ga yavo avenyanga livamwoyo lyavo: naye a la viita nobwogi bwekivavi; si a la va leka mba, kandi si a la va vererera mba, kinga kuva vera tsimbabasi.

⁸Na u la volera avandu yava Yahova a vola ndi: Henza, mbikanga imbiri wenyu inzira yelivamwoyo neyelikudza.

⁹Uyu u menya mu lidala yili a la kudza nekivavi, nenzala nobulwaye; navutswa uyu u twula nokwivika ku Vakalidei ava kumbiridza mwinye, a la hona, nelivamwoyo lilye li la va kilanye kuye.

¹⁰Kigira mmali kuhenzidza mumoni mwange ku lidala yili kuleta ubudamano, si ga li kuleta ubulahi, Yahova a vola: li la vikwa mmukono gwomwami wa Babuloni, naye a la li samba nomuliru.

¹¹Kandi ku makuva genyumba yomwami wa Yuda, mu hulire likuva lya Yahova:

¹²O inyumba ya Daudi, Yahova a ku volera, U lombe likalaga mugamba, u honnye yavo avafuulwa va twule mmukono gwo mudambidzi, gase ubutima bwange bu la twula kuli muliru, nokwaaka kuduka ha v ule kuva na u nyala kubusiminya, kigira ubudamano bwevikolwa vyenyu.

¹³Henza, mbeye ku ive, o u menyanga mwivona, noweligina lyomu kereremu, Yahova a vola; mwinye ava volanga, Ni bwaha a lika ku kwinye? Kinga ni bwaha u lingira mu bumenyo bwetu?

¹⁴Nda mu ha mageli kuli amakuyu gevikolwa vyenyu, Yahova a vola; nda fwana muliru mu mulitu gwigwe, na gu la samba vindu vyosi vya mu kumbiridza ku tsimbega tsitsye.