Read lulogooli Jeremia 24 Bible Online

Jeremia 24 - lulogooli bible

Jeremia 24

¹Yahova ya ndolekidzira, henza, vihinda viviri vyamakuyu vya vikwa imbiri welitempeli lya Yahova; inyima wa Nebukadirezaru mwami wa Babuloni ya hila mbuhambe Jekonia mwana wa Jehoiakim, mwami wa Yuda, navanene va Yuda, halala navasidza navatuuli, kutwula Yerusalemi, nokuvaleta Babuloni.

²Kihinda kilala kya li namakuyu malahi ligali, kuli makuyu ga tanganga kwenga; na kihinda kindi kya li namakuyu madamano ligali, aga vula kulibwa, ku liva lya ga li amadamano.

³Hene yaho Yahova ya nteva, U hla ki, Jeremia? Na inze nda vola, Ndolanga makuyu; makuyu malahi, malahi ligali; na madamano kandi madamano ligali, aga vula kulibwa ku liva lya ga veye amadamano ligali.

⁴Na likuva lya Yahova lya duka ku inze, kuvola,

⁵Yahova, Nyasaye wa Israeli, a vola ndi: Kuli amakuyu malahi yaga ga veye, ni ndiyo ndi lola avahambe va Yuda, ava nda twulidza hano kutsia mu kivala kya Vakalidei, kuvakolera bulahi.

⁶Kigira nda vumika nobulahi, na nda va leta vingire mu kivala yiki kandi; na nda vombaka, si nda va sambula mba; nda va simika, si nda viha mba.

⁷Nda va ha myoyo gyokumanya inze, mbeye Yahova: va la va avandu vange, na inze nda va Nyasaye wavo; kigira va lirana ku inze nemyoyo gyavo gyosi.

⁸Na ku makuva gamakuyu madamano, aga ta libwa, ku liva lya ga veye madamano ligali; ligali Yahova a vola, Ni ndiyo ndi twulidza Zedekia mwami wa Yuda, navanene veve, nelitigala lya Yerusalemi, ava tigala mu kivala yiki, nava menyanga mu kivala kya Egepeti,

⁹nda va twulidza va sigiswe yiyi na yiyi hagati ho ubwami bwelirova bwosi, ku budamano; va duka kuva linyega, nolugano, nekihenyahenye, nelilaamwa, hosi ha ndi va komolola yo.

¹⁰Na nda tuma kivavi, nenzala, nobulwaye, hagati havo, kuduka va dividzwe ligali mu kivala kya nda va ha na vaguga vavo.