Read lulogooli Jeremia 25 Bible Online

Jeremia 25 - lulogooli bible

Jeremia 25

¹Likuva lya duka ku Jeremia ku makuva ga avandu vosi va Yuda, mu muhiga gwa kane gwelyameha lya Jehoiakim mwana wa Josia, mwami wa Yuda (yigu ga veye muhiga gwokutanga gwa Nebukadirezaru mwami wa Babuloni),

²lya Jeremia muprofeti ya volera avandu vosi va Yuda, noku vosi ava menyanga Yerusalemi, kuvola:

³Kutwula ku muhiga gwelikumi negyivaka gwelyameha lya Josia mwana wa Amoni, mwana wa Yuda, kuduka lero, mihiga makumi gaviri na gyivaka, likuva lya Yahova li duki ku inze, na nda volera mwinye, ni mbuka mabwebwe nokuvola; navutswa mwinye si mu huliye.

⁴Yahova ya tuma ku mwinye ava tumwa veve vosi avaprofeti, na a vuka mabwebwe na a va tuma (navutswa mwinye si mu huliye, si mu tegidzi amatu genyu kuhulira),

⁵kuvola, Mwirane kalunu sa mulala a leke inzira yeye indamano, mu leke ubudamano bwelikola lyenyu, mu menye mu kivala yiki kya Yahova ya ha mwinye navaguga venyu, kutwula ku madiku ga kale nokutsitsagil'la madiku gosi;

⁶mu vule kutsia kulonda vanyasaye vandi kuvatumekira, nokuvasigamira, mu vule kumbihiriridza nemiyinzi gyamakono genyu; na inze si nda mu kupidza kivi nekindu kali kilala.

⁷Navutswa mwa vula kumbulira, Yahova a vola; mu duke kuvihiriridza inze nemiyinzi gyamakono genyu, nokwisaleridza avene.

⁸Kunangwa kigira yaga Yahova wa mahe a vola: Kigira mwinye mwa vula kuhulira amakuva gange,

⁹henza, nda tuma avatumwa nokuvugula ubwiko bwosi ku tsimbega tsya kasikazini, Yahova a vola, nda tuma avatumwa ku Nebukadirezaru mwami wa Babuloni, mutumekiri wange nda va leta vadze ku kivala yiki, noku avandu va menyanga kukvo, noku tsihiri tsyosi tsyoku tsimbega; na nda va dividza ligali, nokuvakola kuva kyokugenya, nokukunukirwa, nokuva hatswa mihiga nemihiga.

¹⁰Kandi kuvita yaga, nda va nuula mwoyo gwobusangali, nomwoyo gwobuyanzi, mwoyo gwa u seriye nomwoyo gwomwiha mwoyo gwetsing'ina, nobulavu bwolumuli.

¹¹Na kivala yiki kyosi ki la va kyere, neligenya; na tsihiri yitsi tsi la tumekira mwami wa Babuloni mihiga makumi gatano na gaviri.

¹²Na ga la duka, lwa mihiga makumi gatano na gaviri gyi tweka, inze nda ha mwami wa Babuloni, na ihiri zana amageli, kigira ubudamano bwavo, na kivala kya Vakalidei, Yahova a vola; nda ki kola ki ve kyerekazozo.

¹³Nda leta ku kivala yikyo makuva gange gosi aga nda vola kukyo, kali gosi aga ng'odwa mu kitabu yiki, aga Jeremia ya profeta ku tsihiri yitsyo tsyosi.

¹⁴Kigira tsihiri tsinyingi navami vanene va la kola avandu yavo avatugwa, kali yavo; na nda va tunga kuli likola lyavo, na kuli miyinzi gya makono gavo.

¹⁵Kigira Yahova, Nyasaye wa Israeli, ya mbolera yaga: a vola, Vugula kikombe kyewaini yobutima mmukono gwange, u nwehidze tsihiri yitsi tsyosi, tsya nku tuma ku, va nwe.

¹⁶Navo va la nwa, na va la guyaguya, nokulaluka, kigira kivavi kya mbila hagati havo.

¹⁷Hene yaho nda vugula kikombe mmukono gwa Yahova, na nda nwehidza tsihiri zana tsyosi, tsya Yahova ya ntuma kutsyo;

¹⁸Yerusalemi, namadala ga Yuda, navami vago, navanene vago, kuvakola va ve hatswa, nekyokugenya, nelikunukirwa, nelilaamwa, kuli ga veye lero;

¹⁹Farao mwami wa Egepeti, navatumekiri veve, navanene veve, navandu veve vosi

²⁰navandu va hambana vosi, navami vosi avekivala kya Uzu, navami vosi avekivala kya Vafilisiti na Ashikelon, na Gaza, na Ekiron litigala lya Ashidodi;

²¹na Edom, na Moabu, navana va Amon;

²²navami vosi ava Turo, navami va Sidone vosi, navami vekisulu ki veye engereka wenyanza;

²³na Dedan, na Tema, na Buzu, na vosi ava vege amatsava;

²⁴navami vosi va Arabu, navami vosi vavandu ava hambana avamenyamukyangalangwi;

²⁵navami vosi va Zimri, navami vosi va Elam, navami vosi va Vamedi;

²⁶navami vosi ava luvega lwa kasikasini ihale na himbi, mulala nomulala; nobwami bwosi bwelirova, ava veye mmoni mwelirova; na uyu mwami wa Sheshaka a la nwa inyima wavo.

²⁷Na u la va volera, Yahova wa mahe, Nyasaye wa Israeli, a vola: Mu nwe, mu hambike, nokuluka, nokugwa, mu vule kuvuka kandi, kigira kivavi kya nda leta hagati henyu.

²⁸Na ga la duka, ni va sula kuvugula kikombe mmukono gugwo va nwe, hene yaho u la va volera yaga, Yahova wa mahe a vola: Ga mu dukira, mu la nwa ligali.

²⁹Kigira, henza, ntanganga likola ubudamano mu lidala li langangwa ku lieta lyange; mwinye mu la lekwa mu vule kuhebwa mageli? Si mu la lekwa, mu vule kuhebwa mageli nmba; kigira nda langa kivavi ki duke kuvo vosi ava menyanga mu lirova, Yahova wa mahe a vola.

³⁰Kunangwa kigira yaga u profete makuva yaga gosi kuvo, u va volere, Yahova a la fwuma kutwula igulu, a la twulidza mwoyo gwigwe kutwula ha bumenyo bwibwe butakatifu; a la fwuma ligali ku kego kikye; a la hanzuka, kuli yavo ava duvaganga mazabibu, ku yavo vosi ava menyanga mu lirova.

³¹Lwanga lu la duka ku kiheri kyelirova; kigira Yahova a veye nelihing'ana netsihiri, a lingira mu likalaga navemibiri vosi: ku makuva gavadamano, a la va haana va ve ku kivavi, Yahova a vola.

³²Yahova wa mahe a vola, Henza ubudamano bu la twulira ihiri yiyi kuduka ihiri yiyi, na kihi kinene ki la vukidzwa kutwulira ku tsimbega tsyekiheri tsyelirova.

³³Na aviitwa va Yahova lidiku yilyo, va la va ho kutwula ku luvega yilu lwelirova kuduka ku luvega lundi lwelirova: si va la syomirwa, kinga kuvungidzwa, kinga kutebwa; va la va kuli isina ku mmoni mwelirova.

³⁴Mu kupe tsikwili, mwinye avayi, mu lire; mu galagale mu ligoke, mwinye avobunyali vekyayo; kigira madiku geliitwa lyenyu ga duki ligali, na gelisalanywa lyenyu, na mu la gwa kuli kiju kyokuyanzidza.

³⁵Navayi va la vula kuva nenzira yokwiruka, kandi avobunyali vekyayo va la vula kuva nenzira yokuhonera.

³⁶Gu veye mwoyo gwolukwili lwavayi, nemyoyo gyelitsunwa gya avobunyali vekyayo kigira Yahova wononyi ubwayiru bwavo.

³⁷Na vigo vyemirembe vi kiring'anyeywi kigira ubutima bwomuliru bwa Yahova.

³⁸Ya leka likinga lilye, kuli king'ang'a; kigira kivala kyavo ki gwiye kyokugenya kigira ubwogi bwekivavi ki dambidzanga, kandi kigira ubutima bwibwe bwomuliru.