Read lulogooli Jeremia 28 Bible Online

Jeremia 28 - lulogooli bible

Jeremia 28

¹Na ga duka mu muhiga zana, mu litanga lyelyameha lya Zedekia mwami wa Yuda, ku muhiga gwa kane, ku mweli gwegyitano Hanania mwana wa Azuri, muprofeti wa li ha Gibeon, ya mbolera mu inyumba ya Yahova, imbiri wetsimoni tsyavasalisi navandu vosi, kuvola,

²Yahova wa mahe, Nyasaye wa Israeli, a vola ndi, Nda vunannya inira yomwami wa Babuloni.

³Ni gyi kikiri kuvita mihiga gyiviri nda leta hano kandi viju vyosi vyenyumba ya Yahova, vya Nebukadinezaru mwami wa Babuloni ya hila kutwula hano, kuvihila Babuloni:

⁴na nda leta kandi hano Jekonia mwana wa Jehoiakim, mwami wa Yuda, halala navahambe vosi va Yuda, ava tsia Babuloni, Yahova a vola; kigira inze nda vunannya inira yomwami wa Babuloni.

⁵Hene yaho muprofeti Jeremia ya volera muprofeti Hanania imbiri wetsimoni tsyavasalisi, navandu vosi ava li ni va singiye mu inyumba ya Yahova,

⁶muprofeti Jeremia ya vola, Amini: Yahova a kole ndiyo; Yahova a twekidze makuva gogo ga u profeti, a duke kuleta kandi viju vyenyumba ya Yahova, na vosi avahambe, va twule Babuloni vadze ino.

⁷Navutswa kalunu u hulire likuva yili lya mbolanga mu matu gogo, nomu matu gavandu vosi:

⁸avaprofeti ava li ho imbiri wange na imbiri wowo mmadiku ga vita va profeta ku vivala vinyingi, noku bwami bunene, va profeta makuva gobulwani lugano lugano, nagobudamano, nagobulwaye.

⁹Umuprofeti uyu u profetanga amakuva gemirembe, lwa likuva lyomuprofeti uyu li duka, hene yaho muprofeti zana a la manyekana, ligali Yahova ya mu tuma.

¹⁰Hene yaho muprofeti uyu Hanania ya vugula inira ya li kwigoti lyomuprofeti Jeremia, na a gi vunanya.

¹¹Na Hanania ya vola imbiri wetsimoni tsyavandu vosi, na a vola, Yahova a vola ndi: Ni ndiyo ndi vunannya inira ya Nebukadinezaru mwami wa Babuloni mu mihiga gyiviri i twule ku magoti gavetsihiri vosi. Ma muprofeti Jeremia ya tsia.

¹²Hene yaho likuva lya Yahova lya duka ku Jeremia, inyima wa Hanania muprofeti ya vunannya inira i twule kwigoti lyomuprofeti Jeremia, kuvola,

¹³Tsia, u volere Hanania likuva yili, Yahova a ku volera: Ive wa vunannya tsinira tsyomusala; navutswa u lombi tsinira tsyekivya mbugono bwatsyo.

¹⁴Kigira Yahova wa mahe, Nyasaye wa Israeli a vola ndi: Inze mbiki inira yekivya ku magoti getsihiri yitsi tsyosi, va duke kutumekira Nebukadinezaru mwami wa Babuloni; va la mu tumekira kandi nda mu ha tsinyama tsyombulimu.

¹⁵Hene yaho muprofeti Jeremia ya volera Hanania muprofeti, Hulira kalunu, ive Hanania; Yahova si ya tuma ive mba: navutswa ive u suuviridzanga avandu yava va suuvire ububehi.

¹⁶Kunangwa, kigi ra yaga Yahova a vola, Henza, nda ku twulidza mu mmoni mwelirova; mmuhiga yigu u la kudza, kigira wa vola likuva lyokwebaala ku Yahova.

¹⁷Ma mprofeti Hanania ya kudza ku muhiga zana, ku mweli gwegyitano na gyiviri.