Read lulogooli Jeremia 3 Bible Online

Jeremia 3 - lulogooli bible

Jeremia 3

¹Va vola, Musatsa na a kunga mukali wewe, naye na a tsia, nokugwa mukali womusatsa wundi, musatsa wokutanga a lirana kuye kandi? Kivala yikyo si ki la kolwa kidamano ligali? Navutswa u tumikiye ubuheyi halala navayanzi avanyingi navutswa wirane ku inze, Yahova a vola.

²Ginga tsimoni tsitsyo u henze hadiguluku, u duke kulola; ni haliha ha va vuli kugonera ive? Ku luginga lwetsinzira wikaye kuvalindirira, kuli Muarabu mwigendanyamana ive wononnyi kivala nobuheyi bubwo nobudamano bubwo.

³Kigira yaga ulunyirira lwembula lu gaywi, nembula yitodzo i vule kukupa; navutswa wa li nobweni bwowamalaya, wa sula kuva netsisoni.

⁴Kutwula inyinga ya kalunu ive si u lanira ku inze, kuvola, O Dada wange ive u veye mwimiriri wobusoleli bwange?

⁵A la va nobutima bwibwe madiku gosi? A la tsitsagil'la nabwo kuduka ku kiheri? Henza, u voye na u koli vidamano, na u londi inzira yoyo mwene.

⁶Yahova ya mbolera kandi mmadiku gwa Josia mwami, ni ya nteva U loli yaga aga Israeli avirani inyima va koli? Vanegira ku vigulu sa kilala kitambi, kandi vevika isi wemisala sa mulala gwa matu amavisi, na va londa vindu vya malaya ha zana.

⁷Na nda vola inyima wa va kola vindu yivi vyosi, Va lirana ku inze kandi; navutswa va vula kwirana: namwavo wewe Yuda wobugadi ya lola vindu yiyi.

⁸Na nda lola, lwa nda li ni mmu leki nokumuha ibaruwa yokulekwa, kigira agene yaga, Israeli yirana inyima kuheya, Yuda amwavo wewe wobugadi si ya tia mba; navutswa uyu kandi ya tsia na a londa malaya.

⁹Na ga duka kigira ubuhuhu bwa malaya gege, kivala yikyo kyononywa, na ya heya namagina nevitinya vyemisala.

¹⁰Kandi kali ku yaga gosi, amwavo wewe Yuda wobugadi si yirani ku inze nomwoyo gwigwe gwosi, navutswa nobubehi, Yahova a vola.

¹¹Yahova ya mbolera, Israeli wirana inyima welolekidzi mwene kuva wobulungi kuvita Yuda wobugadi.

¹²Tsia, wilwadze makuva yaga ku luvega lwa kasikasini, u vole, Wirane, O Israeli yirani inyima, Yahova a vola; si nda henza mwinye nobutima mba; kigira mbeye netsimbabasi, Yahova a vola, si ntsitsagil'la nobutima madiku gosi mba.

¹³Wiyame ubudamano bubwo, bwa webaalira ku Yahova Nyasaye wowo, nokusalannya tsinzira tsitsyo tsi ve tsyavageni isi womusala sa mulala gwa matu mavisi, na si mwa hulira mwoyo gwange mba, Yahova a vola.

¹⁴Mwirane mwinye avana, avirani inyima, Yahova a vola; kigira mbeye musatsa wenyu: na nda vugula mulala welidala, na vaviri ku bwiko bulala, na nda leta mwinye Zioni.

¹⁵Na nda ha mwinye avayi va veye kuli mwoyo gwange, ava li lageridza mwinye nobugeeri nelimanya.

¹⁶Na ga la duka, lwa mu medeka kuva vanyingi mu kivala, Yahova a vola, mu madiku yaga, si va la vola kandi, Lisanduku lyamalago ga Yahova; kandi si li lingira mu mwoyo; kandi si va la li luta; kandi si li la lombwa kandi.

¹⁷Inyinga yeyo va la gulika Yerusalemi intebe yobwami ya Yahova; netsihiri tsyosi tsi la vugana ha Yerusalemi ku lieta lya Yahova: kandi si va la genda kandi kulonda budinyu bwomwoyo gwavo mudamano.

¹⁸Mu madiku yago inyumba ya Yuda i la genda halala nenyumba ya Israeli, navo va ladza halala kutwula ku kivala kya kasikasini, kuduka ku kivala kya nda ha avaguga venyu kuva imiyandu gyavo.

¹⁹Navutswa nda vola, Nyala ndi kuvika ive halala na avana, nokuha ive kivala ki yanzidzanga miyandu milahi gyamahe ge tsihiri? Na nda vola, Mu la nanga Dada Wange, na si mu la girunkana kuleka kulonda inze.

²⁰Ligali kuli mukali a leka musatsa wewe nobugadi, ni ndiyo mwinye mu nkoleye nobugadi, O inyumba ya Israeli, Yahova a vola.

²¹Mwoyo gu hulirangwa ku hadiguluku, gu veye lilira nelisaala lya avana va Israeli; kigira va kyaminyi inzira yavo, na viviriye Yahova Nyasaye wavo.

²²Mwirane, avana ava mwirani inyima, nda honnya lirana inyima lyenyu. Henza, kudzanga ku ive; kigira ive u veye Yahova Nyasaye wetu.

²³Ligali ubukonyi yibu nobwa vutswa bu henzangwa kutwula mu vigulu, muliviti gu veye mu vigulu: ligali ubukonyi bwa Israeli bu veye mu Yahova Nyasaye wetu.

²⁴Navutswa kindu kyetsisoni ki mali kulia linyakana lyemiyinzi gyavaguga vetu kutwula busoleli bwetu, vyayo vyamagondi na vyetsing'ombe, avana vavo vayai navakana.

²⁵Ku gone hasi mu tsitsoni tsyetu, na lileganywa lyetu li ku kunike; kigira ku koleye Yahova Nyasaye wetu ubwoni, kwinye navaguga vetu, kutwula busoleli bwetu kuduka lidiku lya lero yili; kwa vula kuhulira mwoyo gwa Yahova Nyasaye wetu.