Read lulogooli Jeremia 30 Bible Online

Jeremia 30 - lulogooli bible

Jeremia 30

¹Likuva lya duka ku Jeremia kutwula ku Yahova, kuvola,

²Yahova, Nyasaye wa Israeli, a vola ndi, U ng'ode mu kitabu makuva gosi aga nku voleye.

³Kigira, henza amadiku gadzanga, Yahova a vola mu madiku yago nda girunkannya kandi lyadikidzwa lyavandu vange Israeli na Yuda, Yahova a vola; nda virannya virane mu kivala kya nda ha avaguga vavo, na va li ki gumira.

⁴Na makuva ga Yahova ya vola ku makuva ga Israeli noku makuva ga Yuda, ni yaga.

⁵Kigira Yahova a vola: Ku huliye mwoyo gwelidegera, nogwobutii, si gu veye gwemirembe mba.

⁶Mu teve kalunu, mu lole namusia musatsa a la va nelilumwa lyelivula: ga veye kigira ki inze kulola avasatsa vosi namakono gege wegumiye ku tsimpigu, kulimukali u lumangwa, nommoni mwosi mu galuye?

⁷O bayaye kigira lidiku yilyo li veye linene, si ha li nelindi li fwana nalyo: li veye inyinga yekivi kya Yakobo; navutswa a la honywa kuyo.

⁸Na ga la duka mu lidiku yilyo, Yahova wa mahe a vola, Nda wnannya inira i twule ku ligoti lilyo, nevibohero vyayo nda vi kalannya: navageni si va la mu kola kuva mutugwa wavo kandi mba;

⁹navutswa va la tumekira Yahova Nyasaye wavo, na Daudi mwami wavo, wa ndi singeridza kuvo.

¹⁰Kunangwa kigira yaga u ta tia mba, ive mutumekiri wange Yakobo, Yahova a vola; kinga ive Israeli, u ta timuka enkoio: kigira, henza, nda ku honnya kutwula ihale, na kisukululwi kikyo ki twule mu kivala kyelyadikidzwa lyavo; Yakobo a lirana, na a la sosa, nokwelemeridza, kandi si ha la va nowokumutihidza.

¹¹Kigira inze mbe halala nive, Yahova a vola, kukuhonya: kigira nda heridza ligali tsihiri yitsyo tsyosi ha nda ku salannya, navutswa si nda heridza ive mba; navutswa nda ku ha mageli nelikalaga, kandi si nda ku leka bugira kukuha mageli kali hakuzu mba.

¹²Kigira Yahova a vola, Lisalira lilyo si li nyala kuhonywa, ulugoma lulwo lu medi ligali.

¹³Si ha veye nomundu a ku sola, u duke kulwalidzwa, si u veye netsinyasi tsyokuhonnya.

¹⁴Vosi ava li ni va ku yanza va kwiviriye; si va kwenya mba: kigira nkwati ulugoma, kuli lwomusigu, nelikuya lyowekirage; kigira ubunene bwobudamano bubwo kigira ubwoni bubwo bwa medeka.

¹⁵Kigira ki u liranga ku lisalira lilyo? Ubusaliri bubwo si bu nyala kuhonywa; kigira ubunene bwobudamano bubwo, kigira ubwoni bubwo bu medeki, nku koleye vindu yivi.

¹⁶Kunangwa kigira yaga vosi ava lia ive navo va la libwa; navasigu vovo vosi, sa mulala a la hilwa mbuhambe; na yava ava lanyanga ive va la lanywa, na yavo vosi ava vugulanga ive ku va muhambe, nda va haana navo kuva avahambe.

¹⁷Kigira inze ndirannya ku ive ubulamu bubwo, nda ku honnya tsing'oma tsitsyo, Yahova a vola; kigira va ku langa wakungwa, ua rola, Liveye Zioni, li ta veye ho nomundu u lyenyanga.

¹⁸Yahova a vola: Henza, ndirannya kandi lyadikidzwa lya mahema ga Yakobo, na nda vererera ubumenyo bwibwe; nelidala li lombakwa ku vyanyi vyalyo vyene, nenyumba yobwami i la menywa ku lilonda mwimagwayo.

¹⁹Kandi kuvo lisantidzwa li la hulirwa, na mwoyo gwa yavo ava sangalanga: na nda va meda, na si va la va avakekeke rnba; kandi nda va kuminya, navo si va la va avake mba.

²⁰Na avana vavo va la va kuli ku matsyambiri nelivugana lyavo li la dinyeridzwa imbiri wange; na nda ha mageli vosi ava li va dambidza.

²¹Na munene wavo a la va mundu wavo mwene, na mwamehi wavo a la va mulala wa hagati havo; nda mwingeridza ku inze, naye a lesunda himbi ku inze: kigira ni bwaha u veye nobuluviriri kwesunda himbi ku inze? Yahova a vola.

²²Na mu la va avandu vange, na inze nda va Nyasaye wenyu.

²³Henza, kihi kya Yahova, livola li veye, ubutima bwibwe bwomuliru, bu twuli, ki veye kihi kya tunnyanga: ki la hudukira ku mitwe gyavadamano.

²⁴Ubutima bululu bwa Yahova bu la vula kwirana, kuduka lwa a mala likola, kuduka lwa a twekidza lisaavira lyomwoyo gwigwe: mu madiku gekiheri mu la manya yaga.