Read lulogooli Jeremia 31 Bible Online

Jeremia 31 - lulogooli bible

Jeremia 31

¹Yahova a vola, inyinga yeyo nda va Nyasaye wobwiko bwosi bwa Israeli, navo va la va avandu vange.

²Yahova a vola ndi, Avandu vekivavi kya leka va nyola tsimbabasi mu kyangalangwi; Iivola li veye uyu Israeli, lwa nda tsia kumusosidza.

³Yahova ya loleka ku inze ku matsyambiri, ni ya mbolera, Yee, nku yanzi nobuyanzi bwemihiga nemihiga: kigira yaga mali kukukwesa netsimbabasi tsyo ubuyanzi bwange.

⁴Hali kaviri nda kwombaka, na ive u lombakwa ive mukana mugima wa Israeli kandi u la syafwa netsisugudi tsitsyo, na u la twulira mbukino bwa yavo ava kinanga.

⁵Kandi u la taga milimi gyemizabibu mu vigulu vya Samaria; avatagi va la taga, na va la sangalira amakuyu gagyo.

⁶Kigira li la va ho lidiku lilala, mu lidiku yilyo mulindi u veye mu tugulu twa Efiraim a la kupa lwanga, a la Dola, Mu vuke, ku tsie kwanegire Zioni ku Yahova Nyasaye wetu.

⁷Kigira Yahova a vola ndi, Mwimbire Yakobo nobusangali, mu gingire umunene wetsihiri tsyosi mwoyo: mu landidze makuva, mwidzominye, mu vole, O Yahova u honnye avandu vovo, litigala lya Israeli.

⁸Henza, nda va leta kutwula mu kivala kya kasikasini nokuvavungidza kutwula ku tsintulu tsyelirova, na halala navo avaboku navalema, nomukali u veye inda, na uyu a lumangwa, vosi halala: va la va kiduma kinene ava lirana yino.

⁹Va ladza nelilira; na nda vimirira nelisaala: nda va gendidza himbi nemigera gyamadzi, ku inzira inungi ya va la vula kwikigitala ku; kigira inze mbeye dada wa Israeli, na Efiraim a veye wokutanga kwivulwa wange.

¹⁰Mu hulire likuva lya Yahova O mwinye avetsihiri tsyosi, nokulilandidza mu visulu vye ihale; mu vole, Uyu wa salannya Israeli a la mu vungidza, nokumulinda, kuli mwayi a lindanga kyayo kikye.

¹¹Kigira Yahova u tungiye Yakobo, nokumuboholola a twule mmukono gwa uyu wetsingulu kuvita mwene.

¹²Na va ladza nokwimba mu hadiguluku ha Zioni, na va la londekana halala va tsie ku bulahi bwa Yahova ubuswage, newaini, namaguta, noku avana vamagondi, noku vimoli: nomwoyo gwavo gu la va kuli mulimi gwa samwa; na si va la vererera kandi mba.

¹³Hene yaho mukana mugima a la sangala mbukino, navayai vasoleli navakulundu halala; kigira nda girunkannya lisyoma lyavo kuva ubusangali, nokuleminya myoyo gyavo, nokuvasangalidza va leke ubuvereri bwavo.

¹⁴Na ndigutidza myoyo gyavasalisi nevinolu, navandu vange va liguta ku bulahi bwange, Yahova a vola.

¹⁵Yahova a vola: Mwoyo gu hulirwa mu Rama, lilira nelisyoma linene, Raheli a syomera avana veve; kandi a sula kukiring'anywa, kigira avana veve, kigira si va veye ho.

¹⁶Yahova a vola ndi: U gaye mwoyo gugwo gu vule kulira, netsimoni tsitsyo tsi vule kwidoola maliga; kigira miyinzi gyigyo gyi la tungwa amadanyi gagyo, Yahova a vola; va ladza kandi kutwula mu kivala kyavasigu.

¹⁷Na kisuuviri ki veye ho ku madiku gogo gekiheri, Yahova a vola; navana vovo va la duka kandi ku lwako lwavo avene.

¹⁸Ligali mbuliye Efiraim ni yesyomeranga kuvola, Ive u mbeye amageli na inze mbeveywi amageli, kuli kimoli ki kikiri kunala inira: u ngirunkannye, na inze nda girunkanywa; kigira ive u veye Yahova Nyasaye wange.

¹⁹Ligali inyima weligirunkanywa lyange, ndeganira; nenyima weliyegidzwa lyange, ndekong'onda kwitango: na nda li netsisoni, yee, kali ku timuka inkolo, kigira nda li ni ng'ingi linyegwa lyobusoleli bwange.

²⁰Efiraim a veye mwana wange muyanze? Aveye mwana wokuyanzidza? Kigira tsinyinga tsyosi lwa mmu gondokiranga, ma mbongera kumwidzulitsa: kunangwa ligali mmu vererera, Yahova a vola.

²¹Wevikire vilolero vyetsinzira, welombere misala gyokukwimirira; u henzidze mwoyo gugwo gu yeke ku inzira inene, kali inzira ya wa tsira ku lwa wa tsia: wirane kandi, umukana mugima wa Israeli, wirane ku madala gogo kandi.

²²U la voyavoya kuduka inyinga ki, O mukana wirana inyima? Kigira Yahova u lombi inkuva impya mu lirova: Mukali a kinga musatsa.

²³Yahova wa mahe, Nyasaye wa Israeli, a vola ndi, Va la tumekira amakuva yaga kandi mu kivala kya Yuda nomu madala gakyo, lwa ndirannya kandi lyadikidzwa lyavo: Yahova a ku gasidze, O ive ubumenyo bwobulungi, O ive kigulu kyobutakatifu.

²⁴Na Yuda namadala gakyo ga la menya mu halala, avalimi, na yavo ava vodonkananga nevyayo.

²⁵Kigira mmali kwigutidza mwoyo gwa li ni gu luhi, nemyoyo sa mulala ugwa li ni gu vereranga mmali kugwirannya kuva umuhya.

²⁶Nanoho nda wka, nokuhenza; na tsindolo tsyange tsya li tsindahi ku inze.

²⁷Henza, madiku gadzanga, Yahova a vola, mu madiku yago, nda midza inyumba ya Israeli nenyumba ya Yuda ubugutsa bwomundu, nobugutsa bwemitugu.

²⁸Na ga la duka, kuli nda va henza nduke kwiha, nokusambula, nokutung'aminya, nokudividza, nokudambidza; ni ndiyo ndi va henza kwombaka, nokusimika, Yahova a vola.

²⁹Mu madiku yago si va la vola kandi, Avadada va lia mazabibu malulu, na amino gavana ga kudza.

³⁰Navutswa sa mulala a la kudza kigira budamano bwibwe mwene: sa mulala u litsa mazabibu malulu, amino gege ga la kudza.

³¹Henza, madiku gadzanga, Yahova a vola, mu madiku yago nda kola lilagana lihya nenyumba ya Israeli, halala nenyumba ya Yuda:

³²si ga li ku londa lilagana lya nda kola navaguga vavo mu lidiku lya nda va gumira mukono nduke kuvaleta va twule mu kivala kya Egepeti; lilagana lyange lya vononnya, kali ni nda li musatsa kuvo, Yahova a vola.

³³Navutswa lilagana lya nda kola nenyumba ya Israeli inyima wa madiku yago, Yahova a vola, ni yili: Nda vika lilaga lyange mugati mwavo, nda li ng'oda mu myoyo gyavonda va Nyasaye wavo, navo va la va avandu vange.

³⁴Navo va la vula kwegidzana mundu sa mulala nowakye, kandi mundu sa mulala namwavo wewe, kuvola, Mu manye Yahova; kigira va la manya inze vosi, kutwula ku muke wavo kuduka ku munene wavo, Yahova a vola: kigira nda sameha ubudamano bwavo, nobwoni bwavo si nda bwidzulitsa kandi mba.

³⁵Yahova, u hedzanga avandu liuva kuva ubulavu inyinga yombasu, namalago gomweli nagetsing'ering'ani kuva ubulavu inyinga yobudiku, u duvulanga inyanza, kuduka viguvuli vyayo vi luumanga: Yahova wa mahe ni lieta lilye: a vola ndi,

³⁶Amalago yaga ni ga twula ga vule kuva imbiri wange kandi, Yahova a vola, hene yaho kisukululwi kya Israeli nakyo ki la hera ki vule kuva ihiri kandi imbiri wange mihiga nemihiga.

³⁷Yahova a vola: Ligulu li veye igulu ni i va gyi nyala kugerwa, nemise gyelirova ni i va gyi nyala kuvulika hasi, hene yaho nda ta kisukululwi kyosi kya Israeli kigira yaga gosi aga va koli, Yahova a vola.

³⁸Henza, amadiku gadzanga, Yahova a vola, mu madiku yago lidala li lombakirwa Yahova kutwula ku kitaradzi kya Hananeli kuduka ku kiribwa kyekona.

³⁹Na mugoye gwokugera gu la tsitsagel'la ndiyo bulungi kuduka ku kigulu kya Garebi, nokuvondonkana kuduka Goa.

⁴⁰Na livona lyoii lyemibiri mikudzu, nelyeligoke, nemilimi gyosi kuduka ku mugera gwa Kidiron, kuduka ku ikona yekiribwa kyetsiparasi ku luvega lwevugwe, li la va litakatifu ku Yahova; li la vula kwifwa kinga kusambulwa kandi mihiga nemihiga.