Read lulogooli Jeremia 37 Bible Online

Jeremia 37 - lulogooli bible

Jeremia 37

¹Inyinga yeyo Zedekia mwana wa Josia yameha mbugono bwa Konia mwana wa Jehoiakim, wa Nebukadirezaru mwami wa Babuloni yamehidza mu kivala kya Yuda.

²Navutswa uyu, kinga vatumekiri veve, kinga avandu vekivala, si va hulira makuva ga Yahova, ga ya va volera nomunwa gwa Jeremia muprofeti.

³Na mwami Zedekia ya tuma Jehukali mwana wa Shelemia, na Zefania mwana wa Maaseia, musalisi va tsie ku Jeremia muprofeti, kuvola U ku saalire kalunu ku Yahova Nyasaye wetu.

⁴Na Jeremia ya li ni yingiranga nokutwula hagati ha vandu yava: kigira va li ni va kikiri kumuvika mu inyumba yavahambe

⁵Inyinga yeyo lihe lya Farao lya li ni li twuli mu kivala kya Egepeti; na Vakalidei va li ni va kumberidzi Yerusalemi, lwa va nyola makuva ga Vaegepeti, va sambula kutwula ha Yerusalemi.

⁶Hene yaho likuva lya Yahova lya, duka ku muprofeti Jeremia, kuvola,

⁷Yahova, Nyasaye wa Israeli a vola: Mwinye mu la volera mwami wa Yuda, wa mu tuma kuduka ku inze kuteva makuva yaga: Henza, lihe lya Farao, li twulanga li duka ku konya mwinye li lirana Egepeti mu kivala kyavo avene.

⁸Na Vakalidei va ladza kandi, nokulwana nelidala yili; navo va la li vugula, nokulisamba nomuliru.

⁹Yahova a vola, Mu tegadidza, kuvola, Avakalidei va la ku leka ligali, kigira si va la mu leka mba.

¹⁰Kigira kali ni mwa kuya lihe lyosi lya Vakalidei li lwananga na mwinye, va tigala hagati havo avandu ava tumitwa veng'ine, kali nkano va ka wka, vosi sa mulala mu lihema lilye, nokusamba lidala yili nomuliru.

¹¹Na ga duka, lwa lihe lya Vakalidei lya sambula kutwula Yerusalemi kigira va tia lihe lya Farao,

¹²hene yaho Jeremia ya twula Yerusalemi kutsia mu kivala kya Benjamini, kuvugula yo kidieli kikye, hagati ha avandu.

¹³Na lwa ya li ha kiribwa kya Benjamini, munyampara mulala ya li ho, welilinda, wa langwa lieta lilye Irija, ya li mwana wa Shelemia, mwana wa Hanania; naye ya gumira muprofeti Jeremia, nokumuvolera, Ive u tsitsanga kwivika ku Vakalidei.

¹⁴Hene yaho Jeremia ya vola, Si ga li ndiyo: si ntsitsanga kwivika ku Vakalidei mba. Navutswa si ya mu hulira mba; ma Irija ya gumira Jeremia, nokumuleta ku vanene.

¹⁵Na avanene va vihirirwa Jeremia, ni va mu duya, nokumbika mu buhambe mu inyumba ya Jonathan mung'odi; kigira va li ni va koli inyumba zana yavahambe.

¹⁶Na Jeremia lwa yingira mu inyumba yavahambe yombogo, kuduka mu tsinyumba tsya hasi ligali, na Jeremia ya menya yo madiku manyingi;

¹⁷hene yaho Zedekia mwami ya tuma avandu, va tsia kumuleta: nomwami ya mu teva makiriri mu inyumba yeye, na a vola, Li veye ho likuva li twula ku Yahova? Na Jeremia ya vola, Li veye ho. Kandi ya vola, Ive u la vikwa mmukono gwomwami wa Babuloni.

¹⁸Na Jeremia ya volera mwami Zedekia, na a rola, Inze nkoli ubwoni ki ku ive, naho ku vatumwa vovo, naho ku avandu yava, kuduka ni mu mbika mu buhambe?

¹⁹Avaprofeti vovo va veye haliha kalunu, ava profetera ive, kuvola, Mwami wa Babuloni si a ladza ku ive mba, kinga ku kivala yiki?

²⁰Kalunu, mwadza, u hulire, O munene wange mwami: u bugirire lisaala lyange, li bugirirwe imbiri wowo; nku saala, u ta nniga kwirana mu inyumba ya Jonathan mung'odi, gase nda kudzira yo.

²¹Hene yaho mwami Zedekia ya laga, navo va vika Jeremia mmugidzi gwavalindi: na va mu ha lidiku sa lilala ubukima imango indala ya twula ku valugi, kuduka ubukima bwosi bwa fwa mu lidala. Ni ndiyo Jeremia ya menya mmugidzi gwavalindi.