Read lulogooli Jeremia 39 Bible Online

Jeremia 39 - lulogooli bible

Jeremia 39

¹Mala kuvugulwa, (mu muhiga gwe gyitano na gyine gwelyameha lya Zedekia mwami wa Yuda, ku mweli gwelikumi, Nebukadirezaru mwami wa Babuloni yadza halala nelihe lilye lyosi a duke kulwana na Yerusalemi, naye ya li kumbiridza;

²ku muhiga gwelikumi na mulala gwelyameha lya Zedekia, ku mweli gwegyine, ku lidiku lya gatano na gane agomweli, va hudula lidigi lyelidala),

³avanene vosi avomwami wa Babuloni vingira mugati, na vikala mu kiribwa kya hagati, navo ni yava, Nerigalisharezeru, na Samgarinebo, na Sarisekim, na Rabisarisi, na Nerigalisharezeru, Rabimagu, halala navanene vo mwami wa Babuloni ava tigala.

⁴Na ga duka, Zedekia mwami wa Yuda na avelihe vosi lwa va va lola, hene yaho viruka, na va twula mu lidala ubudiku, ku inzira yommulimi gwomwami, mu kiribwa kya hagati kyamadigi gaviri; naye ya tsia kyova ku inzira ye kereremu.

⁵Navutswa lihe lya Vakalidei lya va londerera, na va nyola Zedekia mu vireremu vya Yeriko: na lwa va mu gumira va mu hila ku Nebukadirezaru mwami wa Babuloni wa li ha Ribila mu kivala kya Hamathu; naye ya mu kalagira.

⁶Hene yaho mwami wa Babuloni yiita avana va Zedekia mu Ribila, imbiri wetsimoni tsitsye: kandi mwami wa Babuloni yiita avanene vosi va Yuda.

⁷Na kandi ya hudula tsimoni tsya Zedekia, na a mboha nevisambo, a duke kumuhila Babuloni.

⁸Avakalidei va samba inyumba yomwami, halala netsinyumba tsyavandu, nomuliru, na va sasugula madigi ga Yerusalemi.

⁹Hene yaho Nebuzaradan munyampara wavalindi wa hila vahambe na a tsia navo Babuloni yavo avatigala ku vandu mu lidala, na viruki, yavo va tsia kuye, nelitigala lyavandu va tigala.

¹⁰Navutswa Nebuzaradan munyampara wavalindi ya leka avadaka mu avandu, ava li bugira kindu, ya va leka mu kivala kya Yuda, ya va ha milimi gyemizabibu, nemilimi inyinga zana yeyo.

¹¹Ma Nebukadirezaru mwami wa Babuloni ya laga Nebuzaradan munyampara wavalindi ku makuva ga Jeremia, na a mu volera,

¹²U mbugule u mu linde ligali, u ta mu kolera kindu kidamano mba, navutswa u mu kolera kuli a ku volera.

¹³Ma Nebuzaradan munyampara wavalindi, ya tuma, na Nebushaziban, na Rabisarisi, na Nerigali sharezeru, na Rabimagu, navanene vosi vomwami wa Babuloni;

¹⁴va tuma avandu, na va vugula Jeremia ni va mu twulidza mmugidzi gwavalindi, na va mu vika mmukono gwa Gedalia mwana wa Ahikam, mwana wa Sha fan, na a mu hile yengo wewe. Na ndiyo ya menya hagati ha vandu yavo.

¹⁵Ma likuva lya Yahova lya duka ku Jeremia, inyinga ya ya li mu libofwa mmugidzi gwa valindi, kuvola

¹⁶Tsia, u volere Ebedimeleku Muethiopia, u mu volere, Yahova wa mahe, Nyasaye wa Israeli, a vola: Henza, nda leta makuva gange ku lidala yili ku budamano, na si ga veye ku bulahi mba; nago ga la dukidzwa imbiri wowo ku lidiku yilyo.

¹⁷Navutswa nda honnya ive ku lidiku yilyo, Yahova a vola; na ive u la vula kuvikwa mu makono gavandu va u tidzanga.

¹⁸Kigira inze ligali nda honnya ive, na ive u la vula kugwa ku kivavi, navutswa livamwoyo lilyo u la va nalyo kuva kilanye ku ive: kigira wa suuvira inze, Yahova a vola.