Read lulogooli Jeremia 40 Bible Online

Jeremia 40 - lulogooli bible

Jeremia 40

¹Likuva lya duka Jeremia kutwula ku Yahova, inyima wa Nebuzaradan munyampara wavalindi ya mu leka kutsia kutwula Rama, lwa ya mu vugula na a veye mu libofwa neminyororo hagati ha vahambe va Yerusalemi na va Yuda, va hilwa ava hambe kuduka Babuloni.

²Munyampara wavalindi ya vugula Jeremia, na a mu volera, Yahova Nyasaye wowo ya vola budamano yibu hano;

³Yahova ya bu leta, na ya kola kuli ya vola; kigira mwa kola ubwoni ku Yahova, na si mwa hulira mwoyo gwigwe mba, kunangwa kigira yaga inkuva yiyi i duke ku mwinye.

⁴Na kalunu, henza, mbohololanga ive lero minyororo gyi veye ku mukono gugwo. Nu u va nu u lola bu'ahi kutsia Babuloni halala ninze, hamba, na inze nda ku linda bulahi; navutswa nu u va nu u lola nobudamano kutsia Babuloni halala ninze, ma u leke: henza, kivala kyosi ki veye imbiri wowo; aha u lola ni ha veye halahi, na ha kuduka ive kutsia ho nobulahi u tsie ho.

⁵Na lwa ya, li na a kikiri kwirana, ya vola, Yirana, u tsie wa Gedalia mwana wa Ahi kam, mwana wa Shafan, womwami wa Babuloni yamehidzi ku madala ga Yuda, u menye halala naye, hagati ha vandu: naho u tsie hosi ha u lola ive mwene ha kuduka. Ma munyampara wavalindi ya mu ha vyokulia nekihaanwa, na a mu leka a tsie.

⁶Hene yaho Jeremia ya tsia ha Gedalia mwana wa Ahikam ha Mizipa na ya menya halala naye hagati ha vandu va lekwa mu kivala yikyo.

⁷Navanyampara vosi ava li mwigendanyama, yavo navandu va va li navo, lwa va hulira mwami wa Babuloni wamehidzi Gedalia mwana wa Ahikam mu kivala, kandi u viki mu makono gege avasatsa, navakali navana, noku yavo avadaka vekivala, ku yavo va vula kuhilwa mbuhambe ku Babuloni;

⁸hene yaho vadza ku Gedalia ha Mizipa, navo ni Ishmaeli mwana wa Nethania, na Johanan avana va Karea, na Seraia mwana wa Tanhumetu, na vana va Efd Munetofathi, na Jezania mwana wa Mumaakathu, yava na vandu vavo.

⁹Na Gedalia mwana wa Ahikam mwana wa Shafan ya visuhira yavo na vandu vavo, kuvola, Mu ta tia kutumekira Vakalidei mba: mu menye mu kivala, mu tumekire mwami wa Babuloni, na ndiyo bu la va bulahi ku mwinye.

¹⁰Noku makuva gange, henza, nda menya ha Mizipa, nduke kusingira imbiri wa Vakalidei ava lidza ku kwinye; navutswa mwinye, mu vungidze iwaini, na makuyu genyinga yoluya, na maguta, na mu vike mu viju vyenyu, mu menye mu madala genyu ga mwa vugula

¹¹Kandi Avayuda vosi ava li ha Moabu, na hagati ha avana va Amon, na ha Edom, na yavo ava li mu vivala vyosi, lwa va hulira mwami wa Babuloni ya tigalidza litigala lya Vayuda, kandi u viki Gedalia mwana wa Ahikam mwana wa Shafan kuvo;

¹²hene yaho Vayuda vosi virana kutwula hosi ha va kungwa kutsia, na vadza ku kivala kya Yuda, ku Gedalia ha Mizipa, na va vungidza iwaini na makuyu genyinga yoluya manyingi ligali.

¹³Kandi Johanan mwana wa Karea, navanyampara vosi ava li mwigendanyama, vadza ku Gedalia ha Mizipa,

¹⁴na va mu volera, Ive u manya ligali Baalisi mwami wavana va Amon ya tuma Ishmaeli mwana wa Nethania a duke kwiita ive? Navutswa Gedalia mwana wa Ahikam si ya suuvira livola lyavo mba.

¹⁵Hene yaho Johanan mwana wa Karea ya volera Gedalia ha Mizipa makiriri, na a vola, Mwadza, mbe munwa, ntsie na ndiita Ishmaeli mwana wa Nethania, na si ha veye nomundu u manya inkuva yiyi: kigira ki a duka kwiita ive, na Vayuda vosi ava vugana ku ive va duka kusalanywa, na litigala lya Yuda li dividzwe?

¹⁶Navutswa Gedalia mwana wa Ahikam ya volera Johanan mwana wa Karea, na a vola, U ta kola inkuva yiyi mba; kigira u volanga ububehi ku makuva ga Ishmaeli.