Read lulogooli Jeremia 41 Bible Online

Jeremia 41 - lulogooli bible

Jeremia 41

¹Na ga duka, ku mweli gu kola gyitano na gyiviri, Ishmaeli mwana wa Nethania, mwana wa Elishama, wolwivulu lwobwami, wa li mulala ku vanyampara vanene womwami, navandu likumi halala naye, ya tsia ku Gedalia mwana wa Ahikam ha Mizipa; na va lia halala ha Mizipa.

²Hene yaho Ishmaeli mwana wa Nethania, navandu likumi ava li ha lala naye, va singira nokukuya Ge dalia mwana wa Ahikam mwana wa Shafan nekivavi, nokumwiita, uyu wa mwami wa Babuloni ya vika kuva govuna wa kivala

³kandi Ishmaeli yiita Avayuda yavo vosi ava li halala naye, li vola li reye, halala na Gedalia, ha Mizipa, na Vakalidei ava loleka yo, avandu velihe.

⁴Na ga duka ku lidiku lya kaviri inyima wokwiita Gedalia, na si ha li nomundu wa manya yaga,

⁵avandu valala vadza kutwula Shekem nokutwula Shilo, nokutwula Samaria va duka avandu avasatsa makumi gatano na gavaka, navo va li ni va mali kuvega tsinderu tsyavo, nokutandula tsingubo tsyavo, navo va li ni va mali kwekalaga avene, va ginga mmakono gavo vihaanwa vyobusie nevimuli, vya va letanga ku inyumba ya Yahova.

⁶Na Ishmaeli mwana wa Nethania ya twula ha Mizipa kutsia kwagana navo naye ya li mu lilira ku inzira yosi na a genda: na ga duka, lwa ya vugana navo, ya va volera, hambi ku Gedalia mwana wa Ahikam.

⁷Na ga duka, lwa vingira hagati helidala, Ishmaeli mwana wa Nethania ya viita, na ya ra ta mbogo, uyu, navandu va li halala naye.

⁸Navutswa mu vandu yava va loleka mu avandu likumi ava volera Ishmaeli, U ta kwiita mba: kigira ku veye ne tsikiba tsyetu tsya viswa yo mu mulimi, akiba yobuswage na yeshairi, na ya maguta, na yobwuki. Ma ya va leka, si yiita avandu yavo halala navamwavo vavo mba.

⁹Ma ubogo yibwo ubwa Ishmaeli ya ta mu mibiri mikudzu gyosi gyavandu va yiita, himbi na Gedalia (bu veye ubwa Asa mwami ya yava kigira ya tia Baasha mwami wa Israeli), Ishmaeli mwana wa Nethania ya bwizulitsa na yavo aviitwa.

¹⁰Hene yaho Ishmaeli ya hila avahambe avandu vosi va tigala ha Mizipa, kali avakana vomwami, navandu vosi va tigala ha Mizipa, ava uyu Nebuzaradan munyampara wavalindi ya li ni ya va vika mmakono gwa Gedalia mwana wa Ahikam; Ishmaeli mwana wa Nethania ya va hila vahambe, na ya twula ho kutsia ku avana va Amon.

¹¹Navutswa Johanan mwana wa Karea na vanyampara vosi ava li halala naye, lwa va hulira ubudamano bwosi bwa Ishmaeli mwana wa Nethania ya kola,

¹²hene yaho va vugula avandu vosi, ni va tsia kulwana na Ishmaeli mwana wa Ne thania, na va mu nyola himbi namadzi manene aga li ha Gibeon.

¹³Na ga duka avandu vosi ava li halala na Ishmaeli, lwa va lola Johanan mwana wa Karea, navanyampara vosi ava li halala naye, va sangala ligali.

¹⁴Ma avandu vosi ava Ishmaeli ya hila mbuhambe kutwula Mizipa va girunkana nokwirana, na va tsia ku Johanan mwana wa Karea.

¹⁵Navutswa Ishmaeli mwana wa Nethania ya hona ku mukono gwa Johanan, navandu vatano na vavaka halala naye, na va tsia ku avana va Amon.

¹⁶Ma Johanan mwana wa Karea, navanyampara vosi ava li halala naye, va vugula avandu vosi ava tigala ava ya nyola kandi ku Ishmaeli mwana wa Nethania, ha Mizipa, inyima wa Ishmaeli yiita Gedalia mwana wa Ahikam, avandu vasatsa velihe, navakali, navana, nevitsiri, ava ya li ni ya leta kandi kutwula Gibeon.

¹⁷Na va tsia ni va me nya Geruthu Kimham, ahimbi Bethlehemu va duke kutsia nokwingira Egepeti,

¹⁸kigira Vakalidei: kigira va va tia, kigira Ishmaeli mwana wa Nethania yiita Gedalia mwana wa Ahikam, womwami wa Babuloni ya mehidza ku kivala.