Read lulogooli Jeremia 46 Bible Online

Jeremia 46 - lulogooli bible

Jeremia 46

¹Likuva lya Yahova lya duka ku Jeremia muproieti ku tsihiri.

²Ku Egepeti: ku lihe lya Faraoneko mwami wa Egepeti, lya li himbi nomugera gwa Farati mu Karkemishi, lya Nebukadirezaru mwami wa Babuloni, ya kuya mu muhiga gwe gyine gwelyameha lya Jehoiakim mwana wa Josia, mwami wa Yuda.

³Mu lombe ingavo na ikuti, mwisunde himbi ku bulwani.

⁴Mu lombe tsiparasi, na mu nine, mwinye ava ninanga ku tsiparasi, mu singire netsigudwa tsyenyu; mu siye ma timu, mwivike tsisalamba tsyevivya.

⁵Kigira ki ndoli inkuva yiyi? Va timuka enkolo na virana inyima; avaluviriri vavo va duywa, navo viruka, nokuvula kwekevuka; li veye litihidza tsimbega tsyosi, Yahova a vola.

⁶Avetsimbiru va vule kunya gula, kinga muliviriri a hone; ku luvega lwa kasikasini himbi nomugera gwa Farati vikigitaye nokugwa.

⁷Ni bwaha uyu u vukanga kuli mugera gwa Nile, gwa madzi gagwo gedudanga kuli migera?

⁸Egepeti ki vukanga kuli mugera gwa Nile, na madzi gakyo gedudanga kuli migera: naye a volanga, Inze nda vuka, noku kunika lirova; nda dividza madala na yavo ava menyanga mugo.

⁹Mwanegire, mwinye tsiparasi; mwi gingire, mwinye magari gobulwani; avaluviriri; va tsie kyova: Kushi na Putu, ava tumekiranga tsikuti; na Valudim, ava tumekiranga ubuta, nokubunyira.

¹⁰Kigira lidiku yilyo li veye lidiku lya Yahova, uyu Yahova wa mahe, li veye lidiku lyokuvanza kisalya, a duke kwevanzira kisalya ku vasigu veve: kivavi ki la lia na ki liguta, na ki la nwa amasahi gavo nokuhambika; kigira Mwami, Yahova wa mahe, a veye nekihaanwa kikye mu kivala ku luvega lwa kasikasini himbi nomugera gwa Farati.

¹¹Yanegira u tsie Gileadi, u nyole lunyasi O mukana mugima wa Egepeti: ive u tumekiranga tsinyasi tsinyingi vutswa; si ha veye neliho nnywa ku ive.

¹²Tsihiri tsi huliye tsisoni tsitsyo, nelirova lizuyi lilira lilyo; kigira muluviriri wikigitaye ku muluviriri wakye, va gwiye vombi halala.

¹³Likuva lya Yahova ya volera Jeremia muprofeti, kuli Nebukadirezaru mwami wa Babuloni a ladza nokukuya kivala kya Egepeti.

¹⁴Mu landidze amakuva mu Egepeti, mwilwadze mu Migidoli, nokwilwadza mu Nofu nomu Tahapenesi: mu vole, Singira, wetegeke, kigira kivavi ki mali kulia ku tsimbega tsitsyo.

¹⁵Kigira ki avandu vovo vetsingulu va hilwa nokutwulidzwa? Si va singira mba, kigira Yahova ya va kunga.

¹⁶Yikigitalidza avanyingi, yee, va gwirirana avene navene: na va vola, Gende ku vuke, ku tsie kandi ku avandu vetu, ku kivala kya kwivulwa mu, kwiruke kivavi ki ku dambidzanga.

¹⁷Va kupira yo tsikwili, Farao mwami wa Egepeti a veye liyoga vutswa; inyinga ya laganwa u gi leki kuvita vutswa.

¹⁸Kuli inze mbeye mwoyo, Mwami a vola, welieta lilye li veye Yahova wa mahe, ligali kuli liva lya Taboru mu vigulu, kandi kuli liva lya Karimeli himbi nenyanza, ni ndiyo uyu a lidza.

¹⁹O mwana wange u menyanga ha Egepeti, welombe mwoyo gugwo kwetegeka u tsie mu lyadikidzwa; kigira Nofu li la va hatswa, na li la hya nomuliru, li la vula kuva nomundu u menya mu.

²⁰Egepeti li veye iroli indahi ligali; navutswa ubudivi bu twulanga ku luvega lwa kasikasini bu mali kuudza.

²¹Kandi avandu va li yo ava tungangwa ava veye hagati halyo va gwiye kuli vimoli vinetu; kigira yavo virana inyima kandi, viruka vosi halala, si va singira kali hakuzu: kigira lidiku lyekivi kyavo li duki kuvo, i veye inyinga yelihenzwa lyavo.

²²Mwoyo gwigwe gu la mola kuli inzoka; kigira va la tsia nelihe, va ladza kuye netsimbadzi, kuli avatemagi vemisala.

²³Va la temaga mulitu gwigwe, Yahova a vola, kaliva ni gu ta veye nobulolero; kigira va veye vanyingi kuvita tsisigi, si va valika mba.

²⁴Uyu mukana wa Egepeti a la leganywa; a la vikwa mmakono gavandu voluvega lwakasikasini.

²⁵Yahovawamahe, Nyasaye wa Israeli, a vola: Henza, nda haana amageli ku Amon wa No, na Farao, na Egepeti, halala navanya saye vakyo, navami vakyo; Farao na yavo ava suuviranga kuye:

²⁶nda va vika mmakono ga yavo avenyanga myoyo gyavo, nomu makono ga uyu Nebukadirezaru, mwami wa Babuloni, nommakono gavatumekiri veve; na inyima wa yago ki la menywa navandu kandi, kuli ga li mu madiku ga matsyambiri, Yahova a vola.

²⁷Navutswa u ta tia mba, O Yakobo mutumekiri wange, kandi u ta timuka inkolo, O Israeli: kigira, henza, nda ku honnya kutwula ihale ligali, nekisukululwi kikyo ki twule mu kivala kyobutugwa bwakyo; na Yakobo a lirana, naye a lehodzeridza nokusosa, kandi si ha veye nowoku mutihidza.

²⁸Ive u ta tia mba, O Yakobo mutumekiri wange, Yahova a vola; kigira inze mbeye halala nive: kigira inze nda heridza ligali tsihiri yitsyo tsyosi tsya nda ku kunga kutsia mutsyo, navutswa si nda heridza ive mba, navutswa nda ku gondokera nelikalaga, kandi si nda ku leka bugira kukuha mageli kali hakuzu.