Read lulogooli Jeremia 49 Bible Online

Jeremia 49 - lulogooli bible

Jeremia 49

¹Ku avana va Amoni. Yahova a vola: Israeli si a veye navana vayai? Si a veye nowemiyandu? Kigira ki Malikam a gumiye Gadi, navandu veve va menya mu madala gakyo?

²Kigira yaga, henza, amadiku gadzanga, Yahova a vola, mu madiku yago nda kola muliviti gwobulwani gu hulirwe ku Raba lyavana va Amoni; na li la gwa kitumi kyevyanye, navakana veve va la sambwa nomuliru: hene yaho Israeli a la gumira yava ava li ni va mu gumira Yahova a vola.

³Kupa tsikwili, O Heshibon, kigira Ai li dividzeywi; mu lire, mwinye vakana va Raba, mwebohe tsingubo tsyamagunia: mu syome, mu nyagule yiyi neyiyi hagati hetsingaga; kigira Malikam a la tsia mu lyadikidzwa, avasalisi veve navanene veve halala.

⁴Kigira ki widzominyanga mu mavona, livona lilyo li gangulukanga, O mukana wirana inyima? Uyu u suuviranga ku butugi bwibwe, nokuvola, Ni bwaha a liidza ku in''e?

⁵Henza, nda leta ubutii ku ive, Yahova a vola, Yahova wa mahe, ubu li twula ku yavo ava ku kumbiridza; na mu la kungwa sa mulala kuii mmoni mwimwe mu henzanga, kandi si ha veye nomundu u vungidza halala uyu u voyavoyanga.

⁶Navutswa lwenyima nda girunkannya kandi lyadikidzwa lyavana va Amoni, Yahova a vola.

⁷Ku Edom. Yahova wa mahe a vola: Si ha veye kandi nobugeeri mu Teman? Iivola li daki mu yavo avetsiganagani? Ubugeeri bwavo bwa goti?

⁸Mwiruke, mwirane inyima, mu menye mu luliva hasi ligali O avamenyanga Dedan; kigira nda ieta kuye kivi kya Esau, inyinga ya ndi mu henza.

⁹Avadolanga mazabibu ni vadza ku ive, si va la ng'ala mazabibu ga dolwe? Avivi ni vadza mbudiku, si va la dividza va luhe va nyole vi va duka?

¹⁰Navutswa inze nda kola Esau kuva kyahonyo, nda mu vimbula mu lyevisa lilye; naye si a la nyala kwivisa: kisukululwi kikye ki dividzeywi, navamwavo veve, na vakye veve; naye si a veye ho kandi.

¹¹U leka avana vovo va ta li na dada, nda va linda va ve mwoyo navakunzakali vovo u leke va suuvire ku inze.

¹²Kigira Yahova a vola: Henza, yavo ava vula kung'olerwa linwa ku kikombe, ligali va la nwa; na ive u veye uyu u li vula kuhebwa mageli? Ive si u la vula kuhebwa mageli, nawtswa ga ku dukira ligali kunwa.

¹³Kigira mmali kwisuha ku inze mwene, Yahova a vola, Bozra li la va ligenya, na manyego, nekyanyi, nelilaama; na madala gosi galyo ga la va vyanyi vya kazozo.

¹⁴Mbuliye makuva ga twulanga ku Yahova, mutumwa u tumeywi hagati hetsihiri, kuvola, Mu vugane halala, muudze kuye, mu singire mu tsie mu bulwani.

¹⁵Kigira, henza, nkole ive kuva muke ku tsihiri, nokulegwa mu avandu.

¹⁶Ku makuva gelitihidzwa lilyo, luyai lwomwoyo gugwo lu ku gadanga, O ive u menyanga mu tsinkombe tsyamagina, u gumiranga hadiguluku hekigulu: kaliva nu u vika kyaalira kikyo igulu ligali kuli indidzu, nda kwikidza kutwula yo, Yahova a vola.

¹⁷Edom a la va kyokugenya: sa mulala u vita himbi naye a la genya, naye a la kunukirwa kigira liduywa lilye lyosi.

¹⁸Kuli ga li mu litung'aminywa lya Sodom na Gomora namadala ga li himbi nago, Yahova a vola, si ha veye nomundu u menya yo, kandi si ha veye nomwana womundu kali mulala u menya mulyo mugeni.

¹⁹Henza, a lanegira kutwula mu luyai lwa Yordani, kuli king'ang'a, ku limenya lya avetsingulu: navutswa nda va nyagulidza viruke nonoho; na uyu wa tovolwa, niye wa ndi vika kulyo: kigira ni bwaha u leng'ana ninze? Kandi ni bwaha u ling'olera inyinga? Kandi ni bwaha ni mwayi u li singira imbiri wange?

²⁰Kigira yaga mu hulire livola lya Yahova, lya ya kola ku Edom; nelisaavira lilye, lya a saaviye ku vamenyanga ha Teman: Ligali va la va twulidza nelikwesa, kali avakekeke vekyayo; ligali a la kola ubumenyo bwavo kuva vyanyi kuvo.

²¹Kivala yikyo kya degera kigira muliviti gweligwa lyavo; ha veye nelilira, lwolwanga lwalyo lu hulirangwa Munyanza Inzakanyu.

²²Henza a lanegira nokubuluka kuli indidzu, nokuvambula tsimbaha tsitsye ku Bozra: nelidiku yilyo mwoyo gwavaluviriri va Edom gu la va kuli mwoyo gwomukali u lumangwa.

²³Ku Damasko. Hamathu li nyoye tsisoni, na Aripadi halala; kigira va huliye makuva madamano, va yinguki: ha veye neliverera linyingi ku inyanza; si i nyala kwehodzeridza.

²⁴Damasko, tsingulu tsitsye tsi gehi, u girunkani a duke kwiruka, u gumeywi nelidegera: kivi neliverera vi mu gumiye, kuli mukali mu lilumwa lilye.

²⁵O wa vugula ndi lidala lyelidzominywa, lidala lyobusangali bwange?

²⁶Kigira yaga avasoleli veve va la gwa mmahasi gege, navandu vosi avelihe va la kiring'anywa ku lidiku yilyo, Yahova wa mahe a vola.

²⁷Nda fwana muliru mu lidigi lya Damasko, na gu la samba tsinyumba tsyobwami tsya Ben-hadadi.

²⁸Ku Kedari, noku bwami bwa Hazoru, bwa Nebukadirezaru mwami wa Babuloni ya kuya. Yahova a vola: Mu singire, mwanegire Kedari, mu lanye avana vevugwe.

²⁹Va la vugula mahema gavo nevyayo vyavo: va lehilira tsingubo tsyokukinga tsyavo, neviju vyavo vyosi, netsing'amia tsyavo; na va la va kupira tsikwili, kuvola, Ha veye nelitihidza tsimbega tsyosi

³⁰Mwiruke, mu tsie kuvoyavoya ihale, mu menye mu luliva hasi ligali, mwinye avamenyi Hazoru, Yahova a vola; kigira Nebukadirezaru mwami wa Babuloni u koli makuva ku mwinye, na u saaviye likuva ku mwinye.

³¹Mu singire, mwanegire ku ihiri i veye mbusosi, i menyanga bugira linyankana, Yahova a vola; i ta veye neviribwa kinga miluguyu, avandu va menyanga veng'ine.

³²Na tsing'amia tsyavo tsi la va vilanye, nobunyingi bwetsing'ombe tsyavo bu la va vilanye: nda va salannya va tsie mu tsimbuudza tsyosi yavo avelisu lyavo lya vegwa amatsava; nda leta kuvo kivi kyavo kutwula ku tsimbega tsyavo tsyosi, Yahova a vola.

³³Hazoru li la va hobumenyo bwevibwe, li la va kyanyi mihiga nemihiga: si ha la va nomundu u menya yo, kandi si ha la va nomwana womundu u menya yo mugeni.

³⁴Likuva lya Yahova lya duka ku Jeremia muprofeti ku Elam, mu litanga lyelyameha lya Zedekia mwami wa Yuda, kuvola.

³⁵Yahova wa mahe a vola: Henza, nda vunannya ubuta bwa Elam, ubunene bwobunyali bwavo.

³⁶Noku Elam nda leta tsimbuudza tsine kutwula ku tsimbega tsyomwigulu tsine, na nda va salannya va tsie ku tsimbuudza tsyosi tsine; kandi si i la va ho ihiri kali indala ha yavo ava tebwa va Elam va vula kuduka muyo.

³⁷Nda timukira Elam enkolo imbiri wavasigu vavo, na imbiri wa yavo avenyanga myoyo gyavo; na nda leta budamano kuvo, nibwo ubutima bwange bululu, Yahova a vola; na nda hila kivavi inyima wavo, kuduka kuvadividza:

³⁸na ndikalidza intebe yange yobwami ha Elam, nda va gotidza va twule ho mwami navanene, Yahova a vola.

³⁹Navutswa ga la va mmadiku gekiheri, ndirannya kandi lyadikidzwa lya Elam, Yahova a vola.