Read lulogooli Jeremia 5 Bible Online

Jeremia 5 - lulogooli bible

Jeremia 5

¹Mu nyagule yiyi na yiyi mu tsinzira tsya Yerusalemi, mu lole kalunu, nokumanya, nokwenya mu migidze gyalyo migalamu, nu u va nu u nyala kunyola musatsa mulala, na a va na a veye ho mulala u kolanga agobulungi, wenyanga ageligali; na inze nda sameha lidala yilyo.

²Kali ni va vola, Kuli Yahova a veye mwoyo; ligali visuhanga nobu behi.

³O Yahova, tsimoni tsitsyo si tsi henzanga ageligali? U va kuyi, navutswa si va vereranga mba; u va heridzi, navutswa va suye lihebwa mageli va kolanga mmoni mwavo kuva mudinyu kuvita lwanda; va suye kwirana kandi.

⁴Hene yaho nda vola, Ligali yava va veye vadaka; va veye avasiru; kigira si va manya inzira ya Yahova, kinga lilaga lya Nyasaye wavo:

⁵nda tsia ku vandu avanene, nda volerana navo; kigira va manya inzira ya Yahova, nelikalaga lya Nyasaye wavo. Navutswa yava nomwoyo mulala va vunannya inira, nokukalannya viboheru.

⁶Kunangwa kigira yaga, king'ang'a ki twulanga mbulimu ki la viita, kisalang'ongo kyo mgolova ki la va dividza, ingo i la goneka madala gavo; mundu sa mulala u twula mu a la tandulwa; kigira mahyolo gavo ga veye manene, na lirana inyima lyavo li medeki.

⁷Nyala ndi kukusameha? Avana vovo va ndeki, na va mali kwisuha ku yava ava ta li avanyasaye. Lwa nda li ni mbigutidzanga vyokulia, va heya, nokuvugana halala viduma neviduma ha tsinyumba tsyavamalaya.

⁸Va li kuli tsiparasi tsinkomeru tsi voyavoyanga; sa mulala a volidza mukali wowakye.

⁹Si ga ndukira kuvanza kisalya ku vindu kuli yivi? Yahova a vola; mwoyo gwange si ndevanzira kisalya ku ihiri i veye kuli yiyi?

¹⁰Mu nine ku madigi gege, mu dividze; navutswa mu ta dividza ligali: mu twulidze tsisya tsyalyo; kigira si tsi veye tsya Yahova.

¹¹Kigira inyumba ya Israeli nenyumba ya Yuda tsi kol ubugadi ligali ku inze, Yahova a vola.

¹²Vambakani Yahova, nokuvola, Uyu si a li iye mba; kandi si ku la lola kivavi kinga inzala mba:

¹³avaprofeti va la gwa imbuudza, nelikuva si li la va muvo mba; ni ndiyo va li kolwa.

¹⁴Kunangwa kigira yaga Yahova, Nyasaye wa mahe, a vola ndi, Kigira mu vola likuva yili, henza, nda kola makuva gange mu munwa gugwo kuva muliru, navandu yava va la va tsinku, na muliru zana gu la va samba.

¹⁵Henza, nda leta ku mwinye ihiri i twula ihale ligali, O inyumba ya Israeli, Yahova a vola: i veye ihiri yobunyali, i veye ihiri ya kale ligali, ihiri ya ive u ta manya lulimi lwayo, kandi si u manya aga va volanga.

¹⁶Imodia yavo i veye kilindwa kyalamu, va veye avetsingulu vosi.

¹⁷Va la lia ligesa lilyo, nobukima bubwo, ubwa, dukira ava na vovo vayai navakana kulagira; va la lia vyayo vivyo vyamagondi netsing'ombe; va la lia mizabibu gyigyo nemikuyu gyigyo: va la sambulannya madala gogo getsingaga, aga wa li ni wa suuvira, va la ga sambulannya nekivavi.

¹⁸Navutswa mu madiku yago, Yahova a vola, Si nda heridza mwinye ligali mba.

¹⁹Na ga la duka, lwa mu li teva, Kigira ki Yahova Nyasaye wetu a ku kolera vindu yivi vyosi? Hene yaho u la va volera, Kuli mu leki inze, nokutumekira avanyasaye vandi mu kivala kyenyu, ni ndiyo mu la tumekira avageni mu kivala ki ta veye kyenyu.

²⁰Mwilwadze likuva yili ku inyumba ya Yakobo, mu li landidze mu Yuda, kuvola,

²¹Mu hulire likuva yili, mwinye avandu avasiru, ava ta li nelimanya; ava veye netsimoni, na si mu lolanga; ava veye namatu, na si mu huliranga:

²²Si mu tia inze? Yahova a vola: si mu degera imbiri wommoni mwange, inze wa vika muyeke kuva lwako lwenyanza, ku lilaga li singiranga madiku gosi, i vule kunyala kuvita? Kali viguvuli vyayo ni vyehinula, si vi nyala kuguuta; kali ni vi luuma, si vi nyala kuvita kulwo.

²³Navutswa yavo va veve nemyoyo gyokugirunkana nokwebaala; va girunkani va tsii.

²⁴Kandi si va vola mu myoyo gyavo Gendi ku tie Yahova Nyasaye wetu kalunu, uyu u letanga imbula, imbula yomuhiga, nembula ye itodzo ku inyinga yayo; uyu wa ku vikira masidza ga lagwa geligesa.

²⁵Ubu damano bwenyu bu mali kugirunka nnya vindu yivi, nobwoni bwenyu bwigaliye ubulahi mu vule kubu nyola.

²⁶Kigira mu avandu vange va loleki mu avadamano: va lindanga, kuli yavo ava gumiranga manyonyi mu ligoneka; va teganga mutego, va gumiranga avandu.

²⁷Kuli lisera lizuye manyonyi, ni ndiyo tsinyumba tsyavo tsizuye ubugadi: na va gwiye avanene ku tsinzira yitsi, va nyoye ubutugi.

²⁸Va komeye ligali, va ng'ereng'ana; yee, va viti kigero ku vikolwa vyavo vidamano; si va veranga likuva, likuva lyombisandu, va duke kugasidzwa; nobulungi bwomudambi si va kalaganga mba.

²⁹Si ga ndukira kuvanza kisalya ku vindu kuli yivi? Yahova a vola; mwoyo gwange si gu levanzira kisalya ku ihiri kuli yiyi?

³⁰Inkuva yokugenya nokuvihiriridza i duki mu kivala yiki:

³¹avavrofeti va profetanga bubehi, navasalisi vameha netsingulu tsyobutugi bwavo; na vandu vange va yanza vindu yivi ndiyo: na mu la kola ki ku kiheri kyavyo?