Read lulogooli Jeremia 7 Bible Online

Jeremia 7 - lulogooli bible

Jeremia 7

¹Likuva yili lya duka ku Jeremia lya twula ku Yahova, kuvola,

²Singira mu kiliango kyenyumba ya Yahova, u gambe yo likuva yili, u vole, Mu hulire likuva lya Yahova, mwinye vosi Avayuda, mwinye avi ngiranga mu viribwa yivi kutsia kusigamira Yahova.

³Yahova wa mahe, Nyasaye wa Israeli, a vola ndi, Mu lombe tsinzira tsyenyu nevikolwa vyenyu, na nda mu mennya hano.

⁴Mu ta suuvira ku makuva gobubehi, kuvola, Litempeli lya Yahova, litempeli lya Yahova, litempeli lya Yahova, ni yava.

⁵Kigira ni mu lomba tsinzira tsyenyu nevikolwa vyenyu ligali; nokukalaga bulungi hagati homundu nowakye;

⁶mu vule kudambidza umugeni, nomubisandu, nomukunzakali, kinga kutahidza masahi ga ta li nekindu hang'o hano, kinga kulonda vanyasaye vandi ku busaliri bwenyu avene:

⁷hene yaho nda mu mennya hango hano, mu kivala kya nda ha vaguga venyu, kutwula ku madiku ga kale, kuduka mihiga nemihiga.

⁸Henza, mu suuviranga makuva gobubehi, aga ta konya kindu.

⁹Mu liba, nokwiita, nokuheya, nokwisuha ku bubehi, nokuvuyidze vimuli ku Baal, nokulonda vanyasaye vandi ava mu ta manya,

¹⁰nokuudza kusingira imbiri wange mu inyumba yiyi, ya langwa ku lieta lyange, mu vole, Kwinye ku honi; ku nyalaku kola livihiriridza yiii lyosi?

¹¹Inyumba yiyi i langwa ku lieta lyange i gwiye luhangaywa lwa vanuuli mu tsimoni tsyenyu? Henza, inze, yee, inze ndoli inkuva yiyi, Yahova a vola.

¹²Navutswa kalunu mu tsie hango harge ha li mu Shilo, ha nda mennya lieta lyange ku matsyambiri, mu lole kya nda kola ho kigira ubudamano bwa avandu vange Israeli.

¹³Kalunu, kigira mu koli miyinzi yigyi gyosi, Yahova a vola, na nda mu volera, ni mbuka mabwebwe nokuvola, navutswa si mwa hulira; na nda mu langa, navutswa si mwa bugirira mba:

¹⁴kigira yaga nda kolera inyumba yiyi i langwa ku lieta lyange, ya mu suuvira ku, na hango hano ha nda ha mwinye navaguga venyu, kuli nda kolera Shilo.

¹⁵Na nda mu ta mu twule imbiri wetsimoni tsyange, kuli wa nda ta avamwavo venyu, kali kisukululwi kyosi kya Efiraim.

¹⁶Kunangwa u ta saalira avandu yava mba, kandi u ta va gingira lilira kinga lisaala, kandi u ta va saalira ku inze; kigira si nda ku hulira mba.

¹⁷Ive si u lola aga va kolanga mmadala ga Yuda nokutsinzira tsya Yerusalemi?

¹⁸Avana ka tenyanga tsinku, na vadada vavo va fwananga muliru, navakali va luganga ubukima, va duke kulombera mwami wekikali womigulu mikati, nokutsuka vihaanwa vyokunwa ku vanyasaye vandi, va duke kumbihiriridza.

¹⁹Yava va mbihiriridza naho? Yahova a vola; si va li avene avevihiriridza, kuduka ku tsisoni tsyomumoni mwavo?

²⁰Kigira yaga Mwami Nyasaye a vola: Henza, ubutima bwange nelivihiririrwa lyange vi la tsukwa hango hano, ku vandu, noku mitugu, noku misala gyemilimi noku makuyu gekivala; ga la hya, kandi si gu la siminywa mba.

²¹Yahova wa mahe, Nyasaye wa Israeli, a vola ndi; Mu tsugannye vihaanwa venyu vyokusambwa, halala nevisyuviriru vyenyu, mu lie inyama.

²²Kigira si nda volera vaguga venyu ku lidiku lya nda va leta kutwula mu kivala kya Egepeti, kinga kuvalaga ku makuva gevihaanwa vyokusa mbwa nevisyuviriru:

²³navutswa nda va laga inkuva yiyi, ni mbola, Mu hulire mwoyo gwange, na nda va Nyasaye wenyu, na mwinye mu la va avandu vange: mu gende mu inzira yosi ya mmu laga, bu duke kuva bulahi ku mwinye.

²⁴Navutswa si va hulira, kinga kutegidza amatu, navutswa va genda mu makuva gavo avene, na mu budinyu bwemyoyo gyavo midamano, na virana inyima, si va tsia imbiri mba.

²⁵Kutwula ku lidiku lyavaguga venyu va twula mu kivala kya Egepeti kuduka lidiku lya lero, ndetanga ku mwinye avatumwa vange vosi avaprofeti, ni mbu ka mabwebwe nokuvatuma:

²⁶navutswa si va mbulira mba, kandi si va tegidza amatu, navutswa va kola magoti gavo kuva madinyu: va kola vidamano kuvita vaguga vavo.

²⁷Na ive u la va volera makuva yaga gosi; navutswa si va la ku hulira mba: ive u la va langa; navutswa si va la bugira mba.

²⁸Na u la va volera, Yiyi ni ihiri i vuli kuhulira mwoyo gwa Yahova Nyasaye wavo kandi si va bugirira kuhebwa megidzo: ageligali ga goti, na ga kalageywi kutwulidzwa ku munwa gwavo.

²⁹U vege lisu lilyo, O Yerusalemi, nokuli ta, mu tange lisyoma hadiguluku; kigira Yahova u suye nokuleka likula lyobutima bwibwe.

³⁰Kigira avana va Yuda va kola buda mano imbiri wange, Yahova a vola: va singeridze livihiriridza lyavo mu inyumba i langwa ku lieta lyange, kuduka kugyononnya.

³¹Na vombaka hadiguluku ha Tofethu, ha veye mwivona lyomwana wa Hinom kusamba avana vavo vayai navakana mu muliru; inkuva ya nda vula kulaga, kandi si yingira mu mwoyo gwange.

³²Kigira yaga, henza, madiku gadzanga, Yahova a vola, mmadiku yago ha la vula kulangwa kandi Tofethu, kinga Livona lyomwana wa Hinom, navutswa ha la langua Livona lyo Bwiiti: kigira va la ta avandu mu Tofethu, kuduka si ha veye nobwiyangu buokuta ho kandi.

³³Na mibiri mikudzu gyavandu yava gyi la va vyokulia vyamanyonyi agombwerefu, na tsinyama tsyomu lirova; na si ha la va nomundu wokuvikunga.

³⁴Inyinga yeyo nda heridza mu madala ga Yuda, nomu tsinzira tsye Yerusalemi, mwoyo gwobusangali, mwoyo gwesango, nomwoyo gwosereye, nomwoyo gwo mwiha; kigira kivala ki la va vutswa.