Read lulogooli Lisyoma lya Jeremia 2 Bible Online

Lisyoma lya Jeremia 2 - lulogooli bible

Lisyoma lya Jeremia 2

¹Ga duka ndi Yahova ya kunika mukana wa Zioni nelilesi mu butima bwibwe Bulahi bwa Israeli ya bwagulula hasi kutwula migulu, Na si yidzulitsa intebe yevirenge vivye mu lidiku lyobutima bwibwe.

²Yahova u miri ubumenyo bwosi bwa Yakobo, na si ya li netsimbabasi mba: Tsimpinga tsyomukana wa Yuda ya tsi sambula mu butima bwibwe; U tsi tsomi kuduka hasi; u viki ubudamano ku bwami noku vanene vabwo.

³Lwiga lwosi lwa Israeli u lu kalagi mu butima bwibwe bululu; Wirannyi mukono gwigwe mulungi inyima gu vuli kuva imbiri wa avasigu: U sambi Yakobo kuli muliru gu dedimanga, u gu sambanga tsimbega tsyosi.

⁴U nyiye ubuta bwibwe kuli musigu, u singiye nomukono gwigwe mulungi kuli mudambidzi, Na wiiti vosi ava loleka kuva avokuyanzidza imoni: Mu lihema lyomukana wa Zioni u tsuki ubutima bwibwe kuli muliru.

⁵Yahova u gwiye kuli musigu, u miri Israeli; U miri tsinyumba tsitsye tsyosi tsyobwami, nokudividza tsimpinga tsitsve Kandi mu mukana wa Yuda u medi lisyoma nokwiduya viritu.

⁶U twulidzi netsingulu hokumenya hehe, kuli ha zana ha li milimi vutswa; wononnyi hokuvugana hehe: Yahova u koli livirirwa mu Zioni amasavo ga madiku manene nelisabato, Na mwami nomusalisi ya va lega mu livihirirwa lyobutima bwibwe.

⁷Yahova ya ta ubwali bwibwe, kandi ya ta hatakatifu hehe, Ya vika mmukono gwa avasigu madigi getsinyumba tsitsye tsyobwami: Va koli liyoga mu inyumba ya Yahova, kuli lya li ku lidiku lyelivugana.

⁸Yahova u saaviye kwononnya lidigi lyomukana wa Zioni; U nyiye mugoye,, na si yegaliye mukono gwigwe gu vule kudividza mba: Kigira yaga ya kola impinga na lidigi kusyoma; vyombi halala vi dengeya.

⁹Viribwa vivye vya sikira hasi; ya dividza nokuvunannya miluguyu gyavyo; Mwami wewe na vanene veve va veye mu tsihiri tsyelilaga li ta veye mutsyo; Yee, avaprofeti veve si va lolanga malola ga twulanga ku Yahova.

¹⁰Avakulundu vomukana wa Zioni vikaye hasi, va kiring'ani makiriri; Va viki lugukyi ku mitwe gyavo; viviki tsingubo tsya mugunia mu vikenge vyavo: Avakana vagima va Yerusalemi vinaminya mitwe gyavo kuhenzidza hasi.

¹¹Tsimoni tsyange tsi luhi kigira maliga, mwoyo gwange gu kaliki; Likudumani lyange li tsukeywi ku kivala, kigira ubwoneku bwomukana wavandu vange; Kigira avana vadoto na va nunanga va kudziye ku tsinzira tsyelidala.

¹²Va tevanga avamama vavo, Ubune iwaini vi veye haliha? Lwa va kudzanga kuli avaateywi tsing'oma ku mahasi ga ma dala, Lwe myoyo gyavo gyi tsukeywi mu viritu vya vamama vavo.

¹³Nku lolekidzira kindu ki, nda fwanannya na kindu ki ive, O mukana wa Yerusalemi? Nda leng'annya na kindu ki ive nduke kukuleminya mwoyo O mukana mugima wa Zioni? Kigira ubusasuguku bubwo bu veye bunene kuli inyanza; ni bwaha u nyala kukuhonnya?

¹⁴Avaprofeti vovo va ku loleye amalola, amalola ga vutswa na gobusiru; Navo va vula kuvimbula ubwoni bubwo, kuduka ku girunkannya lyadikidzwa lilyo, Navutswa va ku loleye busigu bwobugadi, na vivuni vye lyadikidzwa.

¹⁵Vosi ava vitanga va ku kong'ondera makono; Va kunukanga, va sung'usanga mitwe gyavo ku mukana wa Yerusalemi, ni va vola, Lidala yili nilyo lya langwa, Umudukiru wobulahi, busangali bwelirova lyosi?

¹⁶Avasigu vovo vosi va kunuye minwa gyavo ligali ku ive; Va kunukanga nokudyedyeidza amino gavo; va vola, Ku mali kumumira; Ligali yili ni lidiku lya kwa henzereranga; ku li nyoye, ku li loli.

¹⁷Yahova u koli aga ya saavira; u dukidzi likuva lilye lya ya laga mmadiku ga kale; U tsomi hasi, si ya vera tsimbabasi mba: Ya ha musigu lisangala ku ive; ya kuminya lwiga lwa yavo ava dambidzanga ive.

¹⁸Myoyo gyavo gyanira Yahova: Ive lidigi lyomukana wa Zioni, amaliga gi doole kuli mugera mbasu nobudiku; U tesosidza, u ta leka indolero yemoni yoyo i ta here mba.

¹⁹Vuka, u kupe lwanga mbudiku mu litanga lyobulindi; U tsuke mwoyo gugwo kuli amadzi imbiri womumoni mwa Yahova: Ginga makono gogo kuhenzidza kuye kigira livamwoyo lyavana vovo vadoto, yavo ava kudza myoyo kigira inzala ku kiheri kyelihasi sa lilala.

²⁰Lola, O Yahova, henza, ni bwaha wa u koleye ndiyo Avakali va lie lwivulo lwavo, avana va va lera mu makono gavo? Musalisi nomuprofeti va liitirwa mu hatakatifu ha Yahova?

²¹Muyai nomusakulu va gona hasi mu mahasi; Avakana vagima vange navasoleli vange va gwiye ku kivavi: U viiti ku lidiku lyobutima bu bwo; u viiti, na si u va vereye tsimbabasi mba.

²²U langi, kuli mu lidiku lyelivugana, vyokutihidza vyange vi veye tsimbega tsyosi; Si ha veye kali mulala wa hona, kinga wa tigala mu lidiku lyobutima bwa Yahova: Yavo ava nda lera nokuvirukidza, musigu wange u mali ku va heridza.