Read lulogooli Lisyoma lya Jeremia 3 Bible Online

Lisyoma lya Jeremia 3 - lulogooli bible

Lisyoma lya Jeremia 3

¹Mbeye umundu u loli lidambidza na impimbo yobutima bwibwe.

²Ya nzimirira nokung'endidza mu kisundi, si mwa li mu bulavu.

³Ligali ya girunkannya mukono gwigwe ku inze hali kanyingi mbasu bei.

⁴U koli inyama yange neligodo lyange kuva vikulu; u vunannyi vigumba vyange.

⁵Wombaki ku inze, nokunkumbiridza nendulwe neliluha.

⁶U nzikalidzi ha veye nekisundi, kuli avakudzu ku inyinga intambi.

⁷U viki ku inze lugaga hosi, mbule kutsia kyova; munyororo gwange u gu koli muliduhu.

⁸Yee, ni nkupa lwanga nokwenya mukonyi, a haniranga kyova lisaala lyange.

⁹U hani tsinzira tsyange na magina ga vadzwa; u kyaminyi tsinzira tsyange.

¹⁰A veye ku inze kuli iduba i gonekanga, kuli king'ang'a mu lyevisa.

¹¹U girunkannyi tsinzira tsyange, nokuntandulannya; na u nkoli kuva hatswa.

¹²U nyiye buta bwibwe, nokuvika inze kuva kyokugera ku kyombano.

¹³U ndasi nemibano gye imodia yeye mu kikenge kyange.

¹⁴Ngwiye kihenyahenye ku avandu vange vosi, lwimbu lwavo mbasu bei.

¹⁵U nzizulitsi litsunwa, u nzigutidzi nekilulu kikye.

¹⁶Kandi u vunannyi amino gange netsinzalo: u nkuniki ligoke.

¹⁷U mali kuvika mwoyo gwange gu ve ihaie nemirembe; nziviriye ligasidzwa.

¹⁸Na nda vola, Tsingulu tsyange tsi goti, na lyenya lyange ku twula ku Yahova.

¹⁹Widzulitse lidambidzwa lyange na likenya lyange, kilulu nendu lwe.

²⁰Mwoyo gwange gu kidzulitsanga yago, na gwinama mu inze.

²¹Nziyidzulitsa likuva yili; kigira yaga mbeye nelisuuvira.

²²Ga veye ku tsimbabasi tsya Yahova tsi kiranga ni ku vula kuheridzwa, kigira tsimbabasi tsi tsye si tsi gehanga mba.

²³Tsi veye tsimpya mugamba nomugamba; busuuvirifu bubwo bu veye bunene.

²⁴Yahova a veye kidieli kyange mwoyo gwange gu vola, kigira yaga nda suuvira kuye.

²⁵Yahova a veye mulahi kuvo va mu lindiranga, ku mwoyo gu mwenyanga.

²⁶Nobulahi umundu a suuvire, nokulindirira ubuhonyi bwa Yahova nelyekudzira.

²⁷Nobulahi umundu a ginge inira mu bwana buke bwibwe.

²⁸Yikale yeng'ine nokukiring'ana kigira u viki kuye inkuva yiyi.

²⁹A vike munwa gvwigwe mu lugukyi, ni i va lisuuviridza li veye ho.

³⁰A haane ku uyu u mu kuyanga lusaya lwilwe; yizule amanyego.

³¹Kigira Yahova si a la ta mihiga nemihiga.

³²Kigira kali na a vereridza, naye kandi a la vera kuli ubunene bwetsimbabasi tsitsye.

³³Kigira si a va vikanga mu kivi, kinga kuvereridza avana va vandu nomwoyo gwobuyanzi.

³⁴Ku va duvagira isi wevirenge vyavo ava bofwa vosi vomu lirova

³⁵Ku kyaminya ubulungi bwomundu imbiri wommoni mwa Uyu Uveye Igulu Ligali,

³⁶Kuhinula mundu mu livola lilye, yaga Yahova si a bugirira mba.

³⁷Ni bwaha u volanga, ma li va, ni i va Yahova si ya li laga mba?

³⁸Mu munwa gwa Uyu Uveye Igulu Ligali si ga twulanga amadamano nobulahi?

³⁹Kigira ki mundu u veye mwoyo a monyanga, umundu ku lihebwa mageli ku ubwoni bwibwe?

⁴⁰Gendi ku liguule nokugeridza tsinzira tsyetu, nokwirana ku Yahova kandi.

⁴¹Gendi ku gingire Nyasaye u veye igulu myoyo gyetu halala na makono getu.

⁴²Ku siye lwako nokwebaala; ive si u sameha mba.

⁴³U kuniki nobutima bubwo nokukulonderera; wiiti, si u veye netsimbabasi.

⁴⁴Wekuniki nelilesi, lisaala lyetu li vule kuvita.

⁴⁵U ku koli kuva kuli amandu na vindu vya tebwa hagati ha avandu.

⁴⁶Avasigu vetu vosi valaminyi mi nwa gyavo ku kwinye.

⁴⁷Ubutii na bogo vi duki ku kwinye, ubudivi na bwoneku.

⁴⁸Imoni yange yidoolanga migera gya madzi, kigira ubwoneku bwomukana wa avandu vange.

⁴⁹Imoni yange i sundukanga amadzi, si i lekeranga mba, si i kamulukanga,

⁵⁰Kuduka Yahova yumike, nokulola kutwula migulu ha a veye

⁵¹Imoni yanga i hayahayidzanga mwoyo gwange, kigira avakana vosi velidala lyange.

⁵²Va himanga inze kuli linyonyi li himangwa, ava veye avasigu vange bugira kivuni.

⁵³Va twulidzi livamwoyo lyange mu inyumba ya hasi ligali, va teye ligina ku inze.

⁵⁴Amadzi ga viti igulu womutwe gwange: nda vola, Mmali kuheridzwa.

⁵⁵Ndanira lieta lilyo, O Yahova, kutwula ha inyumba ya hasi ligali.

⁵⁶Wa hulira mwoyo gwange; u ta visa ugutu gugwo ku miyika gyange, ku lilira lyange.

⁵⁷Wesunda ku inze ku lidiku lya nda kwanira; na wa mbolera, U ta tia mba.

⁵⁸O Yahova, u veri amakuva gomwoyo gwange; u tungiye livamwoyo lyange.

⁵⁹O Yahova, u loli likolerwa lidamano lyange; kalaga likuva lyange.

⁶⁰Ive u loli kisalya kyavo kyosi, na lisaavira lyavo lyosi lya va saavira ku inze.

⁶¹Wa hulira amanyego gavo, O Yahova, na lisaavira lyavo lya va saavira ku inze,

⁶²Minwa gya yavo ava singira ku kuya inze, na lisaavira lyavo ku inze mbasu bei.

⁶³Henza likala lyavo, ne lisingira lyavo; mbeye lwimbu lwavo.

⁶⁴U la va tunga litunga, O Yahova, kuli miyinzi gya makono gavo.

⁶⁵U la va ha budinyu bwomwoyo, vilaamo vivyo kuvo.

⁶⁶U la va londerera nobutima, nokuvadividza va twule va vuli kuva isi weligulu lya Yahova.