Read lulogooli Ezekieli 10 Bible Online

Ezekieli 10 - lulogooli bible

Ezekieli 10

¹Hene yaho nda lola, henza, mu bwerefu bwa li igulu womutwe gwa vakerubi ha loleka igulu wavo kindu kuli ligina lya isafiro, na liloleka lyalyo lya li kuli intebe yobwami.

²Na ya volera mundu wivika ingubo yekatani, na a mu volera, Wingire hagati hetsingida tsyokuserengeta, isi wa vakerubi, wizulitse ku tsimpi tsitsyo tsyombi amanda gomuliru gu veye hagati ha vakerubi, u ga sigisi ku lidala. Naye yingira ha zana imbiri wetsimoni tsyange.

³Ma vakerubi va li ni va singiye ku luvega lwomukono mulungi lwenyumba mundu uyu lwa yingira; na lilesi lizula mugidzi gwomugati.

⁴Ubukumi bwa Yahova bwa nina igulu kutwula ku mukerubi, na bwa singira ku mukingi gwenyumba; nenyumba yizula lilesi, nomugidzi gwizula ubung'ering'anu bwobukumi bwa Yahova.

⁵Nomwoyo gwetsimbaha tsya vakerubi gwa hulirwa kuduka mu mugidzi gwekyova, kuli mwoyo gwa Nyasaye Wanyala Vyosi lwa a volanga.

⁶Na ga duka, lwa ya laga mundu wivika ingubo yekatani, nokumuvolera, Vugula muliru hagati hetsingida tsyokuserengeta, hagati ha vakerubi, hene yaho yingira, na ya singira himbi nengida indala.

⁷Mukerubi ya nyira mukono gwigwe kutwula hagati ha vakerubi, na ya vugula ku muliru zana, na a gu vika mu makono ga uyu wivika ingubo yekatani, naye ya gu vugula na a tsia kyova.

⁸Na ha loleka mu vakerubi lifwanana lyomukono gwomundu isi wetsimbaha tsyavo.

⁹Na nda lola, henza, tsingida tsine tsya li himbi navakerubi, ingida indala himbi nomukerubi mulala, na ingida yindi himbi nomukerubi wundi: neliloleka lyetsingida zana lya li kuli ligina lyeberulo.

¹⁰Na mu liloleka lyatsyo, yitsyo tsine tsya li nelifwana lilala, kuli tsya li ingida indala mugati mwengida.

¹¹Na lwa tsya genda, tsya tsitsanga imbiri ku tsimbega tsyavo tsine: si tsya girunkana lwa tsya tsitsanga imbiri navutswa ho mutwe gwa henzanga tsya londa ha zana; si tsya girunkana mba lwa tsya tsitsanga imbiri.

¹²Mibiri gyavo gyosi, nemigongo gyavo namakono gavo, netsimbaha tsyavo netsingida, vizula tsimoni tsimbega tsyosi, kali tsingida tsya yavo vane va li natsyo.

¹³Ku makuva getsingida, tsya langwa tsingida tsyokuserengeta, na inze nda hulira.

¹⁴Sa mulala ya li nommoni hali kane: mmoni mwokutanga mwa li mmoni mwomukerubi, nommoni mwa kaviri mwa li mmoni mwomundu, nommoni mwa kavaka mwa li mmoni mweking'ang'a, nommoni mwa kane mwa li mmoni mweindidzu.

¹⁵Na yavo vakerubi va nina igulu: henza, yivi vi veye vilombe vi veye mwoyo vya nda lola himbi nomugera gwa Kebari.

¹⁶Na lwa vakerubi va genda, tsingida tsya genda himbi kuvo; na lwa vakerubi va ginga tsimbaha tsyavo kunina kutwula ku lirova, tsingida kandi si tsya girunkana kutwula kuvo.

¹⁷Lwa va singira, natsyo tsya singira; lwa va nina igulu, natsyo tsya nina igulu halala navo: kigira roho gwevilombe vi veye mwoyo gwa li mutsyo.

¹⁸Na ubukumi bwa Yahova bwa twula ha mukingi gwenyumba, na bwa singira ku vakerubi.

¹⁹Na vakerubi va nyira tsimbaha tsyavo, na va nina igulu kutwula ku lirova imbiri wetsimoni tsyange, lwa va twula kutsia kyova, tsingida kandi tsya li himbi navo: na va singira mu kiribwa ku luvega lwevugwe lwenyumba ya Yahova; nobukumi bwa Nyasaye wa Israeli bwa li igulu wavo.

²⁰Henza, yiki ni kilombe ki veye mwoyo kya nda lola isi wa Nyasaye wa Israeli himbi nomugera gwa Kebari: na nda manya yava va veye avakerubi.

²¹Sa mulala ya li nommoni hali kane, na sa mulala ya li netsimbaha tsine; nelifwana lyamakono gomundu lya li isi wetsimbaha tsyavo.

²²Na ku makuva gelifwana lyommoni mwavo, lya li lifwana lyommoni zana mwa nda lola himbi nonugera gwa Kebari, liloleka lyavo na avene; va genda sa mulala buiungi imbiri wewe.