Read lulogooli Ezekieli 11 Bible Online

Ezekieli 11 - lulogooli bible

Ezekieli 11

¹Kandi Roho ya ng'inga igulu, na ya ndeta kuduka mu kiribwa kyevugwe kyenyumba ya Yahova, ki henza ku luvega lwevugwe: henza, va li ho ha kiliango kyekiribwa avasatsa makumi gaviri na vatano; na hagati havo nda lola Jaazania mwana wa Azuri, na Pelatia mwana wa Benaia, avanene vavandu.

²Na ya mbolera, Ive mwana womundu, yavo navandu ava saavira budamano, ava haananga makuva madamano mu lidala yili;

³ava volanga, Inyinga yelyombaka tsinyumba si i veye ahimbi mba: lidala yili li veye inyingu yokudeka, na kwinye ku veye inyama.

⁴Kigira yaga u profete kuvo, u profete, Ive mwana womundu.

⁵Na Roho wa Yahova ya gwa ku inze, na a mbolera, U vole, Yahova a volanga ndi: Ni ndiyo mwa vola, Mwinye avenyumba ya Israeli; kigira inze mmanya vindu vingira mu myoyo gyenyu.

⁶Mwinye mu medi avii twa venyu mu lidala yili, na mwizulitsi tsinzira tsyalyo aviitwa.

⁷Kigira yaga, Mwami Nyasaye a vola: Aviitwa venyu ava mwa vika hasi hagati halyo, yavo va veye inyama, nelidala yili li veye inyingu yokudeka; navutswa mwinye mu la letwa kyova kutwula hagati halyo.

⁸Mu tiye kivavi; na nda leta ku mwinye kivavi, Mwami Nyasaye a vola.

⁹Nda mu leta kyova mu twule hagati halyo, na nda mu vika mmakono gavageni, na nda kola likalaga hagati henyu.

¹⁰Mu la gwa ku kivavi; na nda mu kalagira mu tsinzako tsya Israeli; na mu la manya mbeye Yahova.

¹¹Lidala yili si li la va inyingu yenyu mba, kandi mwinye si mu la va inyama hagati halyo mba; nda ku kalagira mu tsinzako tsya Israeli,

¹²na mu la manya inze mbeye Yahova: kigira si mwa genda mu malago gange mba, kandi si mwa gumira likalaga lyange, navutswa mwa londa miima gyetsihiri tsya :nu kumbiridza.

¹³Na ga duka, lwa nda profeta, Pelatia mwana wa Benaia ya kudza. Hene yaho nda gwa hasi mammama, na nda hanzuka nomwoyo munene, ni mbola, O, Mwami Nyasaye u la heridza ligali litigala lya Israeli?

¹⁴Na likuva lya Yahova lya duka ku inze, kuvola,

¹⁵Ive mwana womundu, vamwavo vovo, avamwavo vovo veligali, avandu va viko vovo, na vosi venyumba ya Israeli, yavo vosi, nivo yava ava menyi Yerusalemi va va voleye, Mwelehe ihale ku Yahova; kivala yiki kwinye kwa hebwa kuva miyandu gyetu.

¹⁶Kigira yaga ive u vole, Mwami Nyasaye a vola ndi: Kali ni nda va twulidza ihale mu tsihiri, na kali ni nda va salannya mu vivala vindi, navutswa kandi nda va kuvo, hatakatifu inyinga inkekeke mu vivala vya va duka mu.

¹⁷Kunangwa, u vole, Mwami Nyasaye a vola ndi: Nda mu vungidza mu twule mu avandu, nda mu vugannya halala mu twule mu vivala vya mwa salannywa mu, na nda mu ha kivala yiki kya Israeli.

¹⁸Na va la duka hano, na va la twulidza vindu vyalyo vyosi vyekivihiri, nekivihiri kyalyokyosi kutwula ha zana.

¹⁹Na nda va ha mwoyo mulala, na nda vika roho muhya mu mwinye; na nda twulidza mwoyo gwamagina mu mibiri gyavo, na nda va ha mwoyo gwenyama;

²⁰va duke kugenda mu malago gange, nokugumira miima gyange nokugyikola: na va la va avandu vange, na inze nda va Nyasaye wavo

²¹Navutswa ku makuva ga yavo avemyoyo gyavo gyi londanga mwoyo gwevindu vyavo vyokuvihiriridza nekivihiri kvavo, nda leta inzira yavo ku mitwe gyavo, Yahova Nyasaye a vola.

²²Hene yaho vakerubi va ginga tsimbaha tsyavo, netsingida tsya li ahimbi kuvo; nobukumi bwa Nyasaye wa Israeli bwa li igulu wavo.

²³Nobukumi bwa Yahova bwa nina igulu kutwula hagati helidala, na bwa singira ku kigulu kyoluvega lwevugwe welidala.

²⁴Na Roho ya ng'inga igulu, nokumbila mu malola mu Kalidei, netsingulu tsya Roho wa Nyasaye, kuduka ku yava avelyadikidzwa. Kunangwa malola ga ndalola ga twula ku inze.

²⁵Hene yaho nda volera avelyadikidzwa makuva gevindu vyosi vya Yahova ya mmannya.