Read lulogooli Ezekieli 13 Bible Online

Ezekieli 13 - lulogooli bible

Ezekieli 13

¹Na likuva lya Yahova lya duka ku inze, kuvola,

²Ive mwana womundu, u profete ku vaprofeti va Israeli ava profetanga, u va volere yavo ava nyolanga buprofeti ku myo yo gyavo avene, Mu hulire likuva lya Yahova;

³Mwami Nyasaye a vola, O bayaye ku yavo avaprofeti avasiru, ava londanga roho gwavo avene, na va vula kulola kindu

⁴O Israeli avaprofeti vovo va gwiye kuli vinywere mu ha lekwa hatswa.

⁵Mwinye mwa vula kusingira ha sasugulwa, kandi si mwa lomba lugaga ku inyumba ya Israeli, ra duke kusingira mu bulwani mu lidiku lya Yahova.

⁶Va lola vindu vya vutswa, nobusegetiri bwobubehi, yavo ava volanga, Yahova a vola, na Yahova si ya va tuma mba: navo va kola avandu kusuuvira likuva yili li la dukidzwa.

⁷Si mwa lola malola ga vutswa, kandi si mwa vola busegetiri bwobubehi, mu livola lya mu volanga, Yahova a vola; na vutswa si nda vola kindu?

⁸Kigira yaga Mwami Nyasaye a vola: Kigira mwinye mwa vola ma kuva ga vutswa, nokulola vindu vyobubehi, kunangwa, henza, inze mbeye musigu wenyu, Mwami Nyasaye a vola.

⁹Mukono gwange gu la va ku vaprofeti va lolanga vindu vya vutswa, ava segetiranga ububehi: si va la va mu makuva gavandu vange, kandi si va la ng'odwa mu mang'oda genyumba ya Israeli, kandi si va lingira mu kivala kya Israeli, na mu la manya inze mbeye Mwami Nya saye.

¹⁰Kigira, yee, ga veye kigira va gotidzi avandu vange, ni va vola, Gyi veye mirembe; nemirembe si gyi veye ho; kandi mulala ni yombaka lidigi, henza, yava va li buulanga ubudohi bwa vula kuduvulwa bulahi:

¹¹u volere yavo ava buulanga ubu dohi bwa vula kuduvulwa bulahi, lidigi yilyo li la gwa: ha la va nembula yizulanga amadzi; na mwinye, O magina manene gembula, mu la gwa; na kihi ki la li tandula.

¹²Henza, lidigi lwa li gwa, si mu la volerwa likuva yili, Libuula lyenyu lya mwa buula lidigi li veye haliha?

¹³Kigira yaga Mwami Nyasaye a vola: Inze nda li tandula nekihi mu ubutima bwange: kandi ha la va nembula yizulanga amadzi namagina manene gembula mu livihirirwa kulidividza ligali.

¹⁴Ni ndiyo ndi sambula lidigi lya mwa buula ubudohi bwa vula kuduvulwa bulahi, nokulyalira hasi, kuduka imise gyalyo gyi la va milavu; li la gwa, na mwinye mu la dividzwa ligali hagati halyo: na mu la manya inze mbeye Yahova.

¹⁵Ni ndiyo ndi dukidza ubutima bwange ku lidigi, noku yavo va li buula ubudohi bwa vula kuduvulwa bulahi; na nda mu volera, Lidigi si li veye ho kalunu, kinga yava ava li buula;

¹⁶li vola li veye, avaprofeti va Israeli ava profeta ku makuva ga Yerusalemi, na ava lola malola gemirembe ku makuva galyo, si ha veye nemirembe, Mwami Nyasaye a vola.

¹⁷Na ive, mwana womundu, dinnya mmoni mumwo ku avakana vavandu vovo, ava profetanga aga twulanga ku myoyo gyavo avene:

¹⁸u profete kuvo, u vole, Mwami Nyasaye a vola ndi, Bayaye kuvo avakali ava navanga tsisume mu viyungu vyamakono vyosi, nokulomba vitambaya ku mitwe gya yaro avekigero lugano lugano kuhima mwoyo gyavandu Mwinye mu la hima myoyo gyavandu vange, nokuhonnya myoyo gyavandu kigira mwinye avene?

¹⁹Na mwinye mu lononnya inze hagati ha vandu vange kigira tsimpi tsyeshairi kandi kigira amadonye gobukima, kwiita myoyo gya yava ava ga ta dukira likudza, nokuhonnya myoyo gya yavo ava ga ta dukira kuva mwoyo, ku livehera avandu vange ava huliranga bubehi bwenyu.

²⁰Kigira yaga Mwami Nyasaye a vola: Henza, inze mbeye musigu ku tsisume tsyenyu, tsya mu himiranga myoyo gyavandu kuvabulukidza, na nda tsi tandula ku makono genyu; na nda lakula myoyo gyavandu, myoyo gya mwa hima kuvabulukidza.

²¹Nda tandula vitambaya vyenyu kandi, na nda honnya avandu vange ku makono genyu, na si va la va mu makono genyu mu lihimwa mba; na mu la manya inze mbeye Yahova.

²²Kigira mu vereridza myoyo gyavalungi namakuva genyu gobubehi, ava inze nda vula kuvereridza; nokudinyeridza amakono gomudamano, a vule kwirana nokuleka inzira yeye indamano, nokuhona a ve mwoyo;

²³kigira yaga si mu la lola aga vutswa yago kandi mba, kinga kusege tera ubusegetiri: na nda honnya avandu vange ku makono genyu: na mu la manya inze mbeye Yahova.