Read lulogooli Ezekieli 14 Bible Online

Ezekieli 14 - lulogooli bible

Ezekieli 14

¹Hene yaho avalala ku vakulundu va Israeli vadza ku inze, ni vikala imbiri wange.

²Na likuva lya Yahova lya duka ku inze, kuvola,

³Ive mwana womundu, avandu yava va viki vifwananyi vyavo mu myoyo gyavo, va viki kyokwikigitala kyobudamano bwavo imbiri wommoni mwavo: ga ndukira yavo va nteve ku makuva gosi?

⁴Kigira yaga u va volere nokuvavolera, Mwami Nyasaye a vola: Umundu sa mulala wenyumba ya Israeli u vugula kifwananyi kikye nokukivika mu mwoyo gwigwe, nokuvika kyokwikigitalidza kyobudamano bwibwe imbiri wommoni mwimwe, nokutsia ku muprofeti; inze Yahova nda mu tivulira ku likuva lilye kuli ubunyingi bwevifwananyi vivye;

⁵nduke kugumira inyumba ya Israeli mu myoyo gyavo avene, kigira veyahuye ku inze ku vifwananyi vyavo.

⁶Kunangwa u volere inyumba ya Israeli, Mwami Nyasaye a vola ndi: Mwirane, mweganire nokuleka vifwananyi vyenyu; mu girunkannye mmoni mwenyu mu vule kuhenza ku kivihiri kyenyu.

⁷Kigira mundu sa mulala mu inyumba ya Israeli, kinga avageni va menyanga mu Israeli, u twulidzanga mwoyo gwigwe ku inze, nokuvugula vifwananyi vivye mu mwoyo gwigwe, nokuvika kyokwikigitalidza kyobudamano bwibwe imbiri wommoni mwimwe, nokutsia ku muprofeti kunteva likuva ku mwoyo gwigwe: Inze Yahova nda mu tivulira, inze mwene:

⁸na nda dinnya mmoni mwange ku mundu uyu, na nda mu kola a ve kyokugenya, kandi a ve kilolekidzu, nolugano, na nda mu twulidza hagati ha vandu vange: na mu la manya inze mbeye Yahova.

⁹Kandi ni i va muprofeti uyu ya gadwa nokuvola likuva ku gosi Ninze, Yahova, wa gada muprofeti uyu, na nda nyira mukono gwange kuye, nokumudividza a twula hagati ha vandu vange Israeli.

¹⁰Na va la ginga ubudamano bwavo: budamano bwa uyu muprofeti bu la leng'ana nobwa uyu wa tsia kuye kumuteva,

¹¹inyumba ya Israeli i vule kuvoyavoya ihale ku inze kandi, kinga va vule kwivika mu bubi kandi ku mahyolo gavo gosi; navutswa va ve avandu vange, na inze mbe Nyasaye wavo, Mwami Nyasaye a vola.

¹²Na likuva lya Yahova lya duka ku inze, kuvola,

¹³Ive mwana womundu kivala ki kolera inze ubwoni ku likoia mahyolo, na nda nyira mukono gwange kukyo, nokuvunannya mudigiru gwevyokulia vyakyo, na nda leta inzala kukyo, nokutwulidza avandu nemitugu:

¹⁴kali avandu yava vavaka, Nuhu, na Danyeli na Ayubu ni va veye mukyo, nkano va ka honnya myoyo gyavo avene gyeng'ine mu ubulungi bwavo, Mwami Nyasaye a vola.

¹⁵Ni ndeta tsi nyama tsindamano tsi vite mu kivala yikyo, nokukyononnya, kuduka kuva hatswa, kuduka si ha veye nomundu u vita mu kivala yikyo kigira tsinyama zana;

¹⁶kali avandu yavo vavaka ni va veye mukyo, kuli inze mbeye mwoyo, Mwami Nyasaye a vola, si va la honnya avayai kinga vakana; avene veng'ine va la hona, navutswa kivala ki la tigala hatswa.

¹⁷Kinga ni ndeta kivavi ku kivala yikyo, nokuvola, Kivavi, vita hagati he kivala yikyo; kuduka kutwulidza ku kivala yikyo avandu nemitugu;

¹⁸kali avandu yavo vavaka ni va veye mukyo, kuli mbeye mwoyo, Mwami Nyasaye a vola, si va la honnya avayai kinga avakana, navutswa avene veng'ine va la honnywa,

¹⁹Kinga ni ndeta ubulwaye mu kivala yikyo, nokutsuka ubutima bwange kukyo mu masahi, kutwulidza kukyo avandu nemitugu:

²⁰kali ni va veye mukyo Nuhu, na Danyeli, na Ayubu, kuli mbeye mwoyo Mwami Nyasaye a vola, si va la honnya avayai kinga avakana; va la honnya myovo gyavo avene gyeng ine mu ubulungi bwavo.

²¹Kigira Mwami Nyasaye a vola ndi: Ga la va kuvita kuli ndi lwa ndeta gokukalaga gange gane yaga bululu ku Yerusalemi, kivavi, nenzala, netsinyama tsindamano, nobulwaye, kuduka kutwulidza ku kivala avandu nemitugu

²²Navutswa, henza, va la tigala yavo ava lihilwa kyova, avayai navakana: yava va li loleka ku mwinye, na mu la lola tsinzira tsyavo, nelikola lyavo; na mu la leminywa myoyo mu makuva gobudamano bwa nda leta ku Yerusa lemi, kali mu vyosi vya nda leta kuiyo.

²³Na va la leminya myoyo gyenyu, lwa mu lola tsinzira tsyavo nelikola lyavo: na mu la manya si nda kola bugira kivune yago gosi aga nda kola mulyo, Mwami Nyasaye a vola.