Read lulogooli Ezekieli 20 Bible Online

Ezekieli 20 - lulogooli bible

Ezekieli 20

¹Na ga duka mu muhiga gu kola gyitano na gyiviri, mu mweli gwegyitano, lidiku lyelikumi lyomweli, avalala ku vakulundu va Israeli vadza kuteva ku Yahova, na vikala imbiri wange.

²Likuva lya Yahova lya duka ku inze, kuvola,

³Ive mwana womundu, u volere avakulundu va Israeli, u va volere, Mwami Nyasaye a vola ndi: Mwinye mudzi kuteva likuva ku inze? Kuli inze mbeye mwoyo, Mwami Nyasaye a vola, mwinye si mu la teva likuva ku inze mba.

⁴U la va kalagira, ive mwana womundu, u la va kalagira? U va mannye kivihiri kya vadada vovo;

⁵kandi u va volere, Mwami Nyasaye a vola ndi: Mu lidiku lya nda tovola Israeli, nokuginga umukono gwange ku visukululwi vye nyumba ya Yakobo, nokwelang'aminya kuvo mu kivala kya Egepeti, lwa nda visuhira, nokuvola, Inze mbeye Yahova Nyasaye wenyu;

⁶ku lidiku yilyo nda visuhira, kuvatwulidza mu kivala kya Egepeti vingire mu kivala kya nda va lutira, ki gangulukanga amaveere nobwuki, ki veye ubukumi bwevivala vyosi.

⁷Na nda va volera, Mu te sa mulala kivihiri kyetsimoni tsitsye, mu vule kweyononnyira ku vifwananyi vya Egepeti; inze mbeye Yahova Nyasaye wenyu.

⁸Navutswa vebaala ku inze, si va bugirira kuhulira inze mbava vula kuta sa mulala kivihiri kyetsimoni tsyavo, kandi si va leka vifwananyi vya Egepeti. Hene yaho nda manya ni mbola, Nda tsuka ubutima bwange kuvo, nduke kudukidza ubutima bwange kuvo hagati hekivala kya Egepeti.

⁹Navutswa nda kola kigira lieta lyange, li vule kwononnywa imbiri wetsimoni tsyetsihiri, ava va li hagati havo, ava ndelang'aminya imbiri wetsimoni tsyavo, mu livatwulidza mu kivala kya Egepeti.

¹⁰Ma nda va leta kyova wekivala kya Egepeti, nokuvavika mu kyangalangwi.

¹¹Nda va ha malago gange, nokuvamannya miima gyange, gya mundu a va na a kola a la hindira mugyo.

¹²Kandi nda va ha masa bato gange, ga duke kuva lilolekidza hagati hange navo, va duke kumanya inze mbeye Yahova u va takasanga.

¹³Navutswa inyumba ya Israeli vebaala ku inze mu kyangalangwi: si va genda mu amalago gange, na va sula miima gyange, agomundu a va na a kola a la hindira mugo; na masa bato gange va gononnya ligali. Hene yaho nda vola nda tsuka ubutima bwange kuvo mu kyangalangwi, kuvadividza.

¹⁴Navutswa nda kola kigira lieta lyange, li vule kwono nnywa imbiri wetsimoni tsyetsihiri, tsya lola ni mba letanga.

¹⁵Kandi nda visuhira mu kyangalangwi, si nda va leta mkivala kya nda li ni nda va ha, kivala ki gangulukanga amaveere nobwuki, ki veye ubukumi bwevivala vyosi;

¹⁶kigira va sula likalaga lyange, na va vula kugenda mu malago gange, na vononnya masabato gange: kigira myoyo gyavo gya londa vifwananyi vyavo.

¹⁷Navutswa kandi imoni yange ya va vererera, mbule kuvadividza ligali, kandi mbule kuvamalira mu kyangalangwi.

¹⁸Na nda volera avana vavo mu kyangalangwi, Mwinye mu ta genda mu malago ga vadada venyu mba, kandi mu ta henza ku miima gyavo mba, kandi mu tivika bubi ku vifwananyi vyavo mba.

¹⁹Inze mbeye Yahova Nyasaye wenyu: mu gende mu malago gange, kugumira miima gyange, nokugakola;

²⁰mu takase masabato gange; nago ga la va kilolekidzu hagati hange nemwinye, mu duke kumanya mbeye Yahova Nyasaye wenyu.

²¹Navutswa avana vebaala ku inze; si va genda mu malago gange mba, kandi si va gumira miima gyange nokugyikola, agomu ndu a va na a kola a la hindira mugo; vononnya masabato gange. Hene yaho nda vola, nda tsuka ubutima bwa nge kuvo, nduke kudukidza ubutima bwange kuvo mukyangalangwi.

²²Navutswa nda twulidza mukono gwange, na nda kola kigira lieta lyange, li vule kwononnywa imbiri wetsimoni tsyetsihiri, tsya lola ni mba letanga.

²³Kandi nda visuhira mu kyangalangwi, nda va salannya mu tsihiri, nokuvasalannya mu vivala vyehale nehale;

²⁴kigira va li ni va ta kola miima gyange, navutswa va sula amalago gange, nokwononnya masabato gange, netsimoni tsyavo tsya londa vifwananyi vya vadada vavo.

²⁵Kandi nda va ha amalago ga ta li amalahi, miima gya va ta hindira mulyo;

²⁶nda va vika mu bubi mu vindu vya va haana avene, kigira va vitidza hagati homuliru vosi avigula inda, nduke kuvakola hatswa, va duke kumanya inze mbeye Yahova.

²⁷Kigira yaga, ive mwana womundu, u volere avenyumba ya Israeli, kuvavolera, Mwami Nyasaye a vola: Mu inkuva yiyi avadada venyu kandi va nyega inze, kigira mahyolo ga va hyola ku inze.

²⁸Kigira lwa nda mala kuvavika mu kivala yiki, kya nda visuhira nda va ha, hene yaho lwa va lola vigulu vyosi vitambi, nemisala gyosi migumalu, va haana yo vihaanwa vyavo, nokuhaana yo livihiridza lyevihaanwa vyavo; kandi ha zana va kola lifunya muhomo gwavo gu yanzidzanga, nokutsuka vihaanwa vyavo vyevyokunwa.

²⁹Hene ya ho nda va volera, Hadiguluku ha mu tsia, kivune kyaho ki veye ki? Lieta lya ha zana li veye Bama kuduka lero.

³⁰Kunangwa u volere inyumba ya Israeli, Mwami Nyasaye a vola: Mwivika mu bubi ku lilonda miima gya vadada venyu? Na mwekola avamalaya kuli kivihiri kyavo?

³¹Lwa mu haana vindu vyenyu vya mu haananga, lwa mu vitidzanga avana venyu avayai hagati homuliru, mwivikanga ku bubi ku vifwananyi vyenyu vyosi kuduka lero? Na mu la teva inze likuva, Mwinye avenyumba ya Israeli? Kuli mbeye mwoyo, Mwami Nyasaye a vola, mwinye si mu la teva inze likuva mba;

³²na yaga gingiranga mu tsiganagani tsyenyu si ga la va ho mba, mu ga mu volanga Kwinye ku la va kuli tsihiri, kuii ubwiko bwevivala, kutumekira musala neligina.

³³Kuli mbeye mwoyo, Mwami Nyasaye a vola, ligali inze nomukono gwobunyali, nomukono gwa nyirwa, nobutima bwa tsukwa, nda va mwami ku mwinye.

³⁴Nda mu twulidza mu avandu, nokumuvungidza mu twule mu vivala vya mwa salannywa mu, nomukono gwobunyali, nomu kono gwa nyirwa nobutima bwa tsukwa;

³⁵na nda mu leta nokumuvika mu kyangalangwi kyavandu, na nda mu kalagira ha zana munwa nomunwa.

³⁶Kuli nda kalagira avadada venyu mu kyangalangwi kyekivala kya Egepeti, ni ndiyo ndi kalaga mwinye, Mwami Nyasaye a vola.

³⁷Na nda mu vitidza isi wempimbo, nda mu vika mu libofwa lyelilagana

³⁸nda va sembera va twule hagati henyu avebaali, na va hyola ku inze; nda va twulidza mu kivala kya va menyanga mu ubugeni, navutswa si va lingira mu kivala kya Israeli mba: na mu la manya mbeye Yahova.

³⁹Ku makuva genyu, mwinye avenyumba ya Israeli, Mwami Nyasaye a vola: Mu tsie, sa mulala a tumekire vifwananyi vivye, nenyinga yenyima, ni mu vula kwenya kuhulira inze; navutswa lieta lyange litakatifu si mu la lyononnya kandi nevindu vyenyu vya mu haananga, nevifwananyi vyenyu.

⁴⁰Kigira mu kigulu kyange kitakatifu, mu kigulu kitambi kya Israeli Mwami Nyasaye a vola, avenyumba ya Israeli vosi, vosi va la tumekira inze ha zana mu kivala yikyo: na nda va bugirira ha zana, na ndenyera yo vindu vyenyu vya mu haananga nobuhya bwobwali bwenyu, halala nevindu vyenyu vitakatifu vyosi.

⁴¹Irze nda bugirira mwinye kuli umuhomo gu yanzidzanga, lwa ntwu lidza mwinye mu vandu, nokumu vungidza mu twule mu vivala vya mwa salannywa mu: na nda takaswa mu mwinye imbiri wetsimoni tsyetsihiri.

⁴²Na mu la manya mbeye Yahova, lwa nda mala kumuleta mu kivala kya Israeli, mu kivala kya nda mwisuhira nda ha avadada venyu.

⁴³Na mu lidzulitsa tsinzira tsyenyu ha zana, nevikolwa vyenyu vyosi vya mweyononnyera mu; mu levihirirwa mwinye avene mu tsimoni tsyenyu avene navene, kigira ubudamano bwenyu bwosi bwa mwa kola.

⁴⁴Na mu la manya inze mbeye Yahova lwa nkolera mwinye bulahi kigira lieta lyange, na mbule kumukolera kuli tsinzira tsyenyu tsindamano, kinga kuli vikolwa vyenyu vyobwoneku mwinye avenyumba ya Israeli, Mwami Nyasaye a vola.

⁴⁵Likuva lya Yahova lya duka ku inze, kuvola,

⁴⁶Ive mwana wo mundu, henzidza mmoni mumwo ku luvega lwa kusini, na likuva lilyo u li tsome ku luvega lwa kusini, na u profete ku mulitu gwomulimi gwa Kusini;

⁴⁷u volere mulitu gwa Ku sini, Hulira likuva lya Yahova: Mwami Nyasaye a vola ndi, Henza, nda fwana muliru mu ive, na gu la samba misala gyosi mivisi mu ive na misala gyosi myumu: lumemo iwomuliru gwaakanga gu la vula ku siminywa, nommoni mwosi kutwula kusini kuduka kasikasini mu la sambwa nomuliru zana.

⁴⁸Na vyemibiri vyosi vi la lola inze, Yahova mmali kufwana muliru yigwo; gu la vula kusiminywa.

⁴⁹Hene yaho nda vola O Mwami Nyasaye va la vola ku inze, Uyu si a veye wa kupa tsing'ano?