Read lulogooli Ezekieli 23 Bible Online

Ezekieli 23 - lulogooli bible

Ezekieli 23

¹Likuva lya Nyasaye lya duka ku inze kandi, kuvola,

²Ive mwana womundu, va li ho avakali vaviri, avakana va mama mulala:

³navo va tumekira malaya mu Egepeti; va tumekira malaya mu busoleli bwavo; viritu vyavo vya minikira yo, kandi ni yo wetsimbere tsyolukana lwavo tsya hambwa ku.

⁴Ameta gavo, munene ya langwa Ohola, namwavo wewe ya langwa Oholiba: navo va li avange, na vivula avana vayai navakana. Nomu ameta gavo, Samaria a veye Ohola, na Yerusalemi a veye Oholiba.

⁵Ohola ya tumekira malaya ku inyinga ya li yange; na ya yanza avayanze veve, Asuria avatende veve,

⁶ava li viviki tsingubo tsyeblue, ava nyampara na avamehanga, vosi va li vasoleli aveligondo lilahi, avetsiparasi va nina ku tsiparasi.

⁷Na ya hambidza yavo amalaya gege, vosi va li avalahi va Asuria; noku vosi ava ya yanza, yevika mu budamano ku vifwananyi vyavo.

⁸A kikiri kuleka amalaya gege kutwula ku madiku ga Egepeti; kigira inyinga yobusoleli bwibwe va gona naye, nokuhamba ku tsimbeere tsyolukana lwilwe: na va tsuka malaya gavo kuye.

⁹Kunangwa inze nda mu vika mu makono ga vayanze veve, mu makono ga Asuria, ava ya yanza.

¹⁰Yavo va vimbula kyahonyo kyikye; va vugula avana veve avayai navakana, naye va mwiita nekivavi: na ya gwa ulu gano mu vakali; kigira va kola likalaga kuye.

¹¹Na amwavo wewe Oholiba ya lola yaga, navutswa kandi ya li umwo neku ligali kuvita uyu ku liyanza lilye, nomu malaya gege ga li amanyingi ligali kuvita malaya gamwavo wewe.

¹²Ya yanza Asuria, avanyampara na avamehanga, avatende veve, avavika tsingubo tsyobukumi, avetsiparasi va nina ku tsiparasi tsyavo, vosi va li avasoleli aveligondo lilahi.

¹³Na nda lola ya vikwa mu budamano; vombi va gumira inzira indala.

¹⁴Na ya meda malaya gege; kigira ya lola avasatsa, lifwana lyavo ni li ng'odeywi ku lidigi, lifwana lya Vakalidei vya ng'odwa nekibaala,

¹⁵va bofwa misipi mu vikenge vyavo, va vikwa tsingubo tsya buulwa ku mitwe gyavo, vosi va li avanene mu liloleka lyavo, ku lifwana lya Vababuloni ha Kalidei, kivala kya vivulwa mu.

¹⁶Nonoho lwa ya va lola ya va yanza, ya hila kuvo ava tumwa kuduka Kalidei.

¹⁷Na Vababuloni vadza kuye kukitali kyobu yanzi, na va mwononnya na malaya gavo, na ya vikwa mu budamano halala navo, na mwoyo gwigwe gwavukana navo.

¹⁸Ma ya vimbula malaya gege, na ya vimbula kyahonya kyikye: hena yaho mwoyo gwange gwavukanywa naye, kuli mwoyo gwange gwavukanywa na amwavo wewe.

¹⁹Navutswa kandi ya kira kumeda amalaya gege, na yidzulira amadiku gobusoleli bwibwe, mu madiku yaga ga ya tumekira malaya mu kivala kya Egepeti.

²⁰Na ya yanza avayanze vavo, avenyama yemibiri gyavo i veye kuli inyama yetsisukiri, na kya twulanga kuvo ki veye kuli kya twula ku tsiparasi.

²¹Ma ndidzulira tsiganagani tsindamano tsyobusoleli bubwo, ku ligona lya va gona ku tsimbeere tsitsyo yavo Avaegepeti ku tsinuniru tsyobusoleli bubwo.

²²Kigira yaga, Ive Oholiba, Mwami Nyasaye a vola ndi: Henza, nda vukidza avayanze vovo va hing'ane ku ive, avomwoyo gugwo gwavukanywa kuvo, na nda va leta ku ive tsimbega tsyosi:

²³Avababuloni, na Vakalidei vosi, Pekodi, na Shoa, na Koa, na Asuria halala navo; avasoleli veligondo lilahi, vosi va li avanyampara navamehanga, avanene navandu velidzominywa, avokunina ku tsiparasi vosi.

²⁴Va ladza ku ive nevyuma vyavo, namagari gobulwani, namagari geviju, nobunyingi bwavandu; va la lomba lihe ku ive, netsingavo, netsikuti na tsigudwa tsyobulwani, kukukumbiridza: na nda va ha likalaga navo va la ku kalagira kuli likalaga lyavo.

²⁵Na ndivika likendeka lyange ku ive, na va la ku kola nobutima; va la ku twulidza amolu gogo namatu gogo; nelitigala lilyo li la gwa ku kivavi: va la vugula avayai vovo navakana vovo; nelitigala lilyo li la hya nomuliru.

²⁶Na va la ku navula tsingubo tsitsyo, nokukutwulidza viju vivyo vyobulahi.

²⁷Kunangwa nda kwavukannya ku tsiganagani tsitsyo tsindamano, no kumalaya gogo aya ua leta gokutwula mu kivala kya Egepeti kandi; gase u la ginga tsimoni tsitsyo, kinga kwi dzulira Egepeti kandi.

²⁸Kigira Mwami Nyasaye a vola: Henza, inze nda ku vika mu makono ga yavo ava u dunyiranga, mu makono ga yavo avomwoyo gugwo gwavukanywa kuvo;

²⁹na va la ku kola nelidunyira lyavo, na va la ku twulidza ku miyi nzi gyigyo gyosi, nokukuleka kyahonyo nomwere; wa vula kufumwa ingubo; na kyahonyo kyamalaya kikyo ki la vimbulwa, tsiganagani tsi tsyo tsindamano na malaya gogo.

³⁰U la kolerwa vindu yiyi, kigira wa tsia kulonda avetsihiri kutumekira malaya, kandi kigira wononywa ku vifwananyi vyavo.

³¹Wa genda ku inzira yamwavo wowo; kigira yaga nda vika kikombe kikye mmukono gugwo.

³²Mwami Nyasaye a vola ndi: Ive u la nwa kikombe kyamwavo wowo, kyenkombe yoluhove ne inene; u la sekwa kuduka kuva isoni, nokukolerwa kihenyahenye; nakyo kizuye du.

³³U lizula lihambika nobuve rere, ku kikombe yikyo kyokugenya nokukola hatswa, ku kikombe kya mwavo wowo Samaria.

³⁴U la ki nwa nokukikombiridza, na u la dakuna vijonjo vyakyo, nokunyilulula tsimbeere tsitsyo; kigira inze mmali kugavola, Mwami Nyasaye a vola.

³⁵Kigira yaga Mwami Nyasaye a vola ndi: Kigira ive wiviriye inze, no kumbika inyima wowo, kigira yaga ive u ginge tsiganagani tsitsyo tsinda mano na malaya gogo.

³⁶Kandi Yahova ya mbolera: Ive mwana womundu, u la kalagira Ohola na Oholiba? U vilwadzire kivihiri kyavo.

³⁷Kigira va heyi, na makono gavo ga veye namasahi, na va heyi ku vifwananyi vyavo; kandi avana vavo vayai va vivulira inze, va mali kuvavitidza ku muliru va tsie kuvyo kusambwa.

³⁸Kandi va nkoleye likuva yili: va viki ububi hatakatifu hange ku lidiku lyene yilyo, na va mali kwononnya masabato gange.

³⁹Kigira lwa va mala kwiita avana vavo ku vifwananyi vyavo, nonoho vingira lidiku lyene yilyo mu hata katifu hange kuhononnya, na, henza ni ndiyo va kola hagati henyumba yange.

⁴⁰Kandi kuvita yaga va tuma kulanga avandu ava twulanga ihale, ava mutumwa ya tsia kuvo, henza, vadza; na ive wesinga kigira yavo, nokwebuula mu tsimoni, nokwesiaha viju vyobulahi,

⁴¹nowikala ku kitali kyobukumi na ha zana imesa ya li ho ya tegekwa imbiri wewe, na wa vika kimuli kyange namaguta gange kuyo.

⁴²Nomuliviti gwobu nyingi bwavandu ava li mu busangali gwa li halala naye: navutswa kandi avasatsa ava li avadamano va li ho navahambiki ava twulanga mwigendanyama; na va vika migodze ku makono gavo vombi, netsitaji tsindahi ku mitwe gyavo.

⁴³Hene yaho nda vola mu makuva ga uyu wa kerera mu buheyi, Kalunu va la tumekiraamalaya halala naye, na uyu halala navo.

⁴⁴Navo vingira kuye, kuli vingiranga ku wamalaya: ni ndiyo vingira ku Ohola, noku Oholiba, avakali vetsiganagani tsindamano.

⁴⁵Na avandu vobulungi va la va kalagira nelikalaga li dukiranga avakali vaheyi, na likalaga li dukiranga avakali va tahidzanga masahi: kigira va veye avakali vaheyi nomu makono gavo va veye namasahi.

⁴⁶Kigira Mwami Nyasaye a vola ndi: Nda leta ubunyingi bwavandu kuvo, nda va haana va hinulanywe yiyi neyiyi, nokunuulwa.

⁴⁷Nobunyingi bwavandu bu la va lasa magina, nokuviita nevivavi vyavo; va liita avana vavo avayai navakana netsinyumba tsyavo va la tsi samba nomuliru.

⁴⁸Kunangwa ni ndiyo ndi heridza tsiganagani tsindamano tsi vule kuva mu kivala yiki, avakali vosi va duke kwegidzwa va vule kulonda tsiganagani tsindamano.

⁴⁹Na va la mu tunga tsiganagani tsindamano ku mwinye, na mwinye mu la ginga ubwoni bwevifwananyi vyenyu; na mu la manya inze mbeye Mwami Nyasaye.