Read lulogooli Ezekieli 24 Bible Online

Ezekieli 24 - lulogooli bible

Ezekieli 24

¹Kandi, mu muhiga gwegyitano na gyine, ku mweli gwelikumi ku lidiku lyelikumi lyomweli, likuva iya Yahova lya duka ku inze, kuvola,

²Ive mwana womundu, u ng'ode lieta lyelidiku, lyelidiku zana yilyo: mwami wa Babuloni yesunda himbi ku Yerusalemi ku lidiku zana yilyo.

³Na u kupe lugano ku inyumba yobwebaali, u va volera, Mwami Nya saye a vola ndi, Tengeka inyingu tengeka, tsuka amadzi muyo:

⁴u vungidze vidonye vivye, u vi vike mu inyingu, kali kidonye sa kilala kilahi kirenge nomukono; wizulitse inyingu vigumba vitovole.

⁵U vugule vitovole vyekyayo kyamagondi, kandi u vungidze vigumba isi wavyo: u gi deke i tavagire ligali; yee, vigumba vyavyo vi tavagire muyo.

⁶Kunangwa Mwami Nyasaye a vola ndi: O layaye ku lidala lyamasahi, noku inyingu yetsisisiniya tsyayo tsi veye muyo, yetsisisiniya tsyayo tsi vule kutwula muyo u twulidze muyo kidonye nekidonye; ha ta va nekidieli kali kilala ki tigala muyo mba.

⁷Kigira masahi gege ga veye hagati hehe; ya ga vika ku lwanda igulu; si ya ga tsuka hasi kugafuma nolugukyi mba.

⁸Ga duke kuleta ubutima kuvanza kisalya, inze mmali kuvika amasahi gege ku lwanda igulu ga vule kufumwa.

⁹Kigira yaga Mwami Nyasaye a vola ndi: O layaye ku lidala lyamasahi inze kandi nda lomba kitumi kinene.

¹⁰Mu vike tsinku tsinyingi, mu lombe muliru munene, inyama i tavagire ligali, umunyu gu bohe, nevigumba vi hake.

¹¹Ma u gi vike ku amanda inzere i nyole muliru, na mugasa gwayo gu hye, neliko lyayo li saluluke muyo, netsisisiniya tsyayo tsi hye.

¹²Yeluhidzi mwene nemiyinzi: navutswa tsisisiniya tsitsye tsinene tsi vuli ku twula kuye; tsisisiniya tsitsye si tsya twulidzwa nomuliru mba.

¹³Mu budamano bubwo mu veye netsiganagani tsindamano: kigira nda kwogidza na ive si wa lava mba, u la vula kulava ku budamano bubwo ligali, nduhe nduke kwigutidza ubutima bwange ku ive.

¹⁴Inze, Yahova, mmali kuvola: ga la va na inze nda ga kola; si ndirana inyima, kandi si nda vererera, kandi si ndeganira; kuli tsinzira tsitsyo, kuli vikolwa vivyo, ni ndiyo va la ku kalagira, Mwami Nyasaye a vola.

¹⁵Kandi likuva lya Yahova lya duka ku inze, kuvola,

¹⁶Ive, mwana womundu, henza, inze ntwulidzanga ku ive ki veye ku ive kyetovole kyetsimoni tsitsyo neliduya lilala: navutswa kandi u la vula kusyoma kinga kulira, kinga kwidoola amaliga gogo.

¹⁷U kenye, navutswa ga ta va ha vulavu, ku lihulirwa mba, u ta syomera uyu wa kudza; wivike kigudu kikyo, wivike vilatu vivyo, u ta kunika minwa gyigyo mba, u vule kulia vyokulia vyavandu.

¹⁸Ma nda volera avandu mugamba; na mgolova mukali wange ya kudza: na nda kola mugamba kuli wa nda lagwa.

¹⁹Na avandu zana va mbolera, si u la ku volera, inkuva yiyi i veye ne kivune ki ku kwinye, ya u kolanga ndi?

²⁰Hene yaho nda va volera, Likuva lya Yahova lya duka ku inze, kuvola,

²¹U volere inyumba ya Israeli, Mwami Nyasaye a vola ndi: Henza, nda vika ubudamano hatakatifu hange, ubunene bwobunyali bwenyu, kitovole kyetsimoni tsyenyu, kyemyoyo gyenyu kya vererera; navana venyu avayai navakana ava mwa leka inyima va la gwa ku kivavi.

²²Mu la kola kuli wa inze nda kola: mu la vula kukunika minwa gyenyu, kandi mu la vula kulia vyokulia vyavandu.

²³Na vigudu vyenyu mu livika ku mitwe gyenyu, nevilatu ku virenge vyenyu: ma la vula kusyoma kinga kulira; navutswa mu la nialira mu budamano bwenyu, nokukenyerana mundu sa mulala nowakye.

²⁴Kunangwa Ezekieli a la va kilolekidzu ku mwinye; kuli vyosi vya ya koia mwinye mu la kola ndiyo: lwa inkuva yiyi i duka, hene yaho mu la manya inze mbeye Mwami Nyasaye.

²⁵Na ive, mwana womundu, si ga la va mu lidiku lya ndi twulidza kuvo tsingulu tsyavo, nobuyanzi bwobukumi bwavo, nekitovole kyetsimoni tsyavo, na kya va vika ku myoyo gyavo, avana vavo avayai navakana,

²⁶mu lidiku yilyo uyu u li hona a ladza ku ive, a duke kukukola u ga hulire namatu gogo?

²⁷Ku lidiku yilyo munwa gugwo gu la kunulwa ku uyu wa hona, na ive u la vola, u la vula kuva idimbidi kandi: na ndiyo u la va kilolekidzu kuvo; na va la manya inze mbeye Yahova.