Read lulogooli Ezekieli 26 Bible Online

Ezekieli 26 - lulogooli bible

Ezekieli 26

¹Na ga duka ku muhiga gwelikumi na mulala, ku lidiku lyokutanga lyomweli, likuva lya Yahova lya duka ku inze, kuvola,

²Ive, mwana womundu, kigira Turo ya vola ku Yerusalemi, Aha, uyu yononnywa ua li kiribwa kyavandu; u girunkani kuhenza ku inze; inze ndizula du, kigira kalunu uyu u koleywi hatswa:

³kigira yaga Mwami Nyasaye a vola ndi, Henza, mbeye musigu ku ive, O Turo, nda leta tsihiri tsinyingi tsidze kulwana nive, kuli inyanza i gi nganga viguvuli vyayo igulu.

⁴Na va lononnya madigi ga Turo nokusambula vitaladzi vivye; na nda halagata ulugukyi lwilwe lu twule kuye ligali, nokumukola a ve lwanda lwere.

⁵Ha la va hokuvagala miluvo gyavaluvi hagati henyanza; kigira inze mmali kuvola likuva yili, Mvami Nyasaye a vola; na a la va vilanye ku tsihiri.

⁶Na avakana veve ava veye mu mulimi va liitwa nekivavi: na va la manya inze mbeye Yahova.

⁷Kigira Mwami Nyasaye a vola ndi: Henza, nda leta Nebukadirezaru mwami wa Babuloni, yadze ku Turo uyu mwami wavami, u twulanga ku luvega lwa kasikasini, halala netsiparasi, narnagari gobulwani, navanina ku tsiparasi, nekiduma, navandu vanyingi.

⁸A liita nekivavi avakana vovo va veye mu mulimi: na a la lomba tsimpinga ku ive, nokulomba kitumi ku ive, nokuginga ingavo ku ive.

⁹Naye a la vika vindu vivye vyokusambula imbiri welidigi lilyo na a la tigula vitaladzi vivyo netsi mbadzi tsitsye.

¹⁰Kigira ubunyingi bwetsiparasi tsitsye ulugukyi lwatsyo lu la ku kunika: amadigi gogo ga la degera kigira umuliviti gwavanina ku tsiparasi, na gwa magari ageviju, na gwa magari agobulwani, lwa yingira mu viribwa vivyo, kuli wa avandu vingiranga mu lidala lya sasugulwa.

¹¹A la duvaga tsinzira tsitsyo tsyosi netsimbagayu tsyetsiparasi tsitsye: a liita vandu vovo nekivavi; na vitaradzi vyetsingulu tsitsyo vi lika hasi.

¹²Na ubutugi bubwo a la bu kola kuva vilanye, nevyokugulannya vivyo vi la kolwa kuva vyokuhimwa; na va la sambula madigi gogo, netsinyumba tsitsyo tsyokuyanzidza va la tsyononnya; na va la vika magina gogo, na misala gyigyo, nolugukyi lulwo hagati ha madzi manene.

¹³Na nda heridza myoyo gyetsinyimbu tsitsyo, na myoyo gyobukana bubwo si gyi la hulirwa kandi mba.

¹⁴Na nda kola ive u ve ulwanda lwere: u la va hokuvagala miluvo gyavaluvi; si u lombakwa kandi mba: kigira inze Yahova mmali kuvola likuva yili, Mwami Nyasaye a vola.

¹⁵Mwami Nyasaye a voleranga Turo likuva yili: Visulu si vi la degera kigira muliviti gweligwa lilyo, lwa yava avatwa tsing'oma va kenya lwa liitwa li la kolwa hagati hoho

¹⁶Inyinga yeyo avanene vosi avenyanza va lika ku tsintebe tsyavo tsyobukumi, na va la vika ha haluvega tsinjoho tsyavo na va la navula tsingubo tsyavo tsyobung'olang'ole: va levika lidegera; va likala hasi, nokudegera idagika sa indala, nokuge nyera ive.

¹⁷Na va la syomera ive, nokuvola, Ga li ndi ive kwononnywa, ive wa li ubumenyo bwa yavo avenyanza, lidala lyelidzominywa, ive wa li netsingulu mu inyanza, uyu na yavo ava menya mulyo, ava kola litihidza lyavo li ve ku yavo vosi avamenyanga mulyo

¹⁸Kalunu visulu vi la degera mu lidiku lyeligwa lilyo: yee visulu vi veye mu inyanza vi la timukwa enkolo ku lyadika lilyo.

¹⁹Kigira Mwami Nyasaye a vola ndi: Lwa nda kola ive kuva lidala lya hatswa, kuli madala ga ta menyeywi navandu; lwa ndi leta ululiva ku ive, namadzi manene lwa ga ku kunika;

²⁰hene yaho nda kwikidza hasi halala na yavo avikanga kutsia mbogo, u tsie ku avandu va kale, nda ku kola u menye mugati mwelirova, umu veye umwere kutwula kale, halala na yavo avikanga kutsia mbogo, u vule kumenywa navandu; nda vika ubukumi mu kivala kya yavo ava veye mwoyo.

²¹Na nda ku kola u ve kyokutihidza, si u la va ho kandi mba: u lenywa, navutswa si u la nyoleka kandi mba, Mwami Nyasaye a vola.