Read lulogooli Ezekieli 29 Bible Online

Ezekieli 29 - lulogooli bible

Ezekieli 29

¹Mu muhiga gwelikumi, ku mu mweli gwelikumi, ku lidiku lyelikumi na gaviri lyomweli, likuva lya Yahova lya duka ku inze, kuvola,

²Ive, mwana womundu, Henzidza mmoni mumwo ku Farao mwami wa Egepeti, u profete kuye, noku Egepeti kyosi;

³moloma, u vole, Mwami Nyasaye a vola ndi Henza, mbeye musigu ku ive, Ive Farao mwami wa Egepeti, guyoka gunene ogu gonekanga hagati hemigera gyigye, wa vola, Mugera gwange gu veye gwange inze mwene, nda gu lomba kigira inze mwene.

⁴Nda vika tsinzago mu tsisaya tsitsyo, na nda kola tsisudzi tsyemigera gyigyo tsi hambane na magamba gogo; na nda ku twulidza hagati hemigera gyigyo, halala netsisudzi tsyosi tsyemigera gyigyo itsya hambana na magamba gogo.

⁵Nda ku ta mwigendanyama, ive netsisudzi tsyosi tsyernigera gyigyo: u la gwa kulwang'amira mu mulimi; u la vula kuletwa halala, kinga kuvungidzwa; mmali kuhaana ive kuva vyokulia vyetsinyama tsyelirova namanyonyi gombwerefu.

⁶Na ava menyanga Egepeti vosi va la manya inze mbeye Yahova, kigira va li mudigiru gwekidundu ku inyumba ya Israeli.

⁷Lwa va gumira ive, mukono gugwo, wa kalika, nokuvahalula mavega gavo gosi; na lwa vedira ku ive wa kalika nokukola vikenge vyavo kudegera.

⁸Kigira yaga Mwami Nyasaye a vola ndi: Henza, nda leta kivavi ku ive, na nda twulidza ku ive avandu nemitugu.

⁹Na kivala kya Egepeti ki la va hatswa nekyere; na va la manya inze mbeye Yahova. Kigira ya vola, Mugera no gwange, ninze wa gu lomba;

¹⁰kunangwa, henza, mbeye musigu ku ive, noku migera gyigyo, na nda kola kivala kya Egepeti kuva kyere ligali na hatswa, kutwula ku kitaradzi kya Sevene kuduka ku lwako lwa Ethiopia.

¹¹Induvatiru yomundu i la vula kuvita hagati hehe, kandi induvatiru yenyama i la vula kuvita hagati hehe, kandi si ki la menywa navandu kuduka mihiga makumi gane.

¹²Na nda kola kivala kya Egepeti kuva hatswa hagati hevivala vi veye hatswa; amadala gakyo hagati hamadala ga la va hatswa kuduka mihiga makumi gane: na nda salannya Vaegepeti hagati hetsihiri nokuvasalannya mu vivala ihale na i hale.

¹³Kigira Mwami Nyasaye a vola ndi: Ku kiheri kyemihiga amakumi gane nda vungidza halala Vaegepeti va twule mu avandu va va salannywa mu;

¹⁴na ndirannya ubutugwa bwa Egepeti, na nda virannya vingire mu kivala kya Pathrosi, kwingira mu kivala kya vivuhha mu; na va la va ho ubwami ubukekeke.

¹⁵Bu la va ubukekeke kuvita ubwami bwo si, kandi si bu la nyala kandi kweginga ku tsihiri; nda va gehidza, va vule kwameha ku tsihiri kandi.

¹⁶Na si bu la va kisuuviri kyenyumba ya Israeli kandi, kwidzulitss vyobudamano, lwa va henzera kuvo: va la manya inze mbeye Mwami Nyasaye.

¹⁷Na ga duka mu muhiga gwa makumi gaviri na gyitano na gyiviri, ku mweli gwokutanga, ku lidiku lyokutanga lyomweli, likuva lya Yahova lya duka ku inze, kuvola,

¹⁸Ive mwana womundu, Nebukadirezaru mwami wa Babuloni, ya kola lihe lilye kutumika ubutumwa bunene ku Turo: mutwe sa mulala gwa kolwa kuva nekyole, nelivega sa lilala lya fubuka; navutswa si a veye namadanyi, kinga lihe lilye, aga twula Turo, ku butumwa bwa ya tumika kukyo.

¹⁹Kigira yaga Mwami Nyasaye a vola ndi: Henza nda ha Nebukadirezaru mwami wa Babuloni kivala kya Egepeti; naye a la hila ubunyingi bwavandu veve, nokuvugula vilanye vivye, nokuvugula vyokuhima vivye; navyo vi la va amadanyi gelihe lilye.

²⁰Mmali kumuha kivala kya Egepeti kuva litungwa lilye lya ya tumekira, kigira va tumekira inze, Mwami Nyasaye a vola.

²¹Ku lidiku yilyo nda meridza lwiga lwenyumba ya Israeli, na nda ku ha likunula munwa hagati havo; na va la manya inze mbeye Yahova.