Read lulogooli Ezekieli 3 Bible Online

Ezekieli 3 - lulogooli bible

Ezekieli 3

¹Lira Kandi naye ya mbolera, Ive mwana womundu, u lie kya u lolanga; u lie lilinga lyekitabu yili, ma u tsie, u volere avenyumba ya Israeli.

²Ma nda kunula munwa gwange, naye ya ndihidza lilinga lyekitabu.

³Ni ya mbolera, Ive mwana womundu, u lihidze inda yoyo, nokwizulitsa amala gogo lilinga lyekitabu lya nda ku ha. Ma nda li lia; nalyo mmunwa gwange bunolu bwalyo bwa li kuli ubwuki.

⁴Na ya mbolera, Ive mwana womundu, genda, u tsie ku inyumba ya Israeli, u va volere makuva gange yaga.

⁵Kigira ive si u tumwa u tsie ku avandu avelivola ligeni navolulimi ludinyu, navutswa ku inyumba ya Israeli;

⁶si u tumwa ku vandu vanyingi avelivola ligeni, navetsinimi tsindinyu, ava u ta nyala kumanya makuva gavo. Ligali, mba nku tuma ku avandu yavo, ligali nkano va ka hulira ive.

⁷Navutswa avenyumba ya Israeli si va la ku hulira mbakigira si va la hulira inze: kigira inyumba yosi ya Israeli va gwiye avombweni budinyu nemyoyo gyobudinyu.

⁸Henza, nkoli mmoni mumwo kuva mudinyu mmoni mwa vo, nombweni bubwo nkoli mudinyu mu mbweni bwavo.

⁹Kuli ligina lya alimasi lidinyu kuvita ligina ni ndiyo nkoli mbweni bubwo: u ta va tia, kandi u ta timuka enkolo ku lifwana lyavo, kali ni va veye inyu mba yebaala.

¹⁰Kandi ya mbolera, Ive mwana womundu, makuva gange yaga gosi aga nku volera u ga vike mu mwoyo gugwo, nokugahulira namatu gogo.

¹¹Ma u tsie, kuduka ku yavo avelyadikidzwa, ku avana vavandu vovo, u va volere, u vole, Mwami Yahova a vola ndi; ni va va ni va hulira, naho ni va vula kuhulira.

¹²Hene yaho Roho ya ng'inga igulu, na nda hulira mwoyo inyima wange muliviti gwelihuma linene, gu rola, Ubukumi bwa Yahova bu gasidzwe ha a veye.

¹³Nda hulira muhumu gwetsimbaha tsyevilombe vi veye mwoyo lwa tsya dirana yilu neyilu, na muliviti gwetsingida ahi mbi navyo, kuli muliviti gwelihuma linene.

¹⁴Ma Roho ya ng'inga igulu, nokumbila ahandi; na nda tsia nobululu, mu butima bwomwoyo gwange; nomukono gwa Yahova gwa li ku inze netsingulu.

¹⁵Inyinga yeyo nda duka ku velyadikidzwa ha Teliabibu, ava menya himbi nomugera gwa Kebari, nda duka ha va menya; na ndikala ho hagati havo madiku gatano na gaviri nobugenya.

¹⁶Na ga duka ku kiheri kya madiku gatano na gaviri, likuva lya Yahova lya duka ku inze, kuvola,

¹⁷Ive mwana womundu, mmali kuvika ive u ve mulindi wenyumba ya Israeli: kigira yaga u hulire likuva mu munwa gwange, na u va gerehidze ni lieta lyange.

¹⁸Lwa inze mbolera mudamano, ligali u la kudza; na ive nu u vula kumugerehidza kinga nu u ta vola likuva lyokugerehidza mudamano kuleka inzira yeye indamano, a duke kuhonnya liva mwoyo lilye; uyu mudamano a la kudzira mu budamano bwibwe; navutswa masahi gege nda ga vanza mmukono gugwo.

¹⁹Navutswa nu u va nu u gerehidza mudamano, naye na a vula kweganira nokuleka budamano bwibwe, kinga na a vula kuleka inzira yeye indamano, a la kudzira mu budamano bwibwe; navutswa ive u mali kuhonnya mwoyo gugwo.

²⁰Kandi, mundu mulungi lwa a girunkana nokuleka bulungi bwibwe nokukola ubudamano, na inze nda vika kyekwikigitala imbiri wewe, a la kudza: kigira ive wa vula kumugerehidza, a la kudzira mu bwoni bwibwe, na vikolwa vivye vyobulungi vya ya kola si vi lidzulitswa mba; navutswa masahi gege nda ga vanza ku mukono gugwo.

²¹Navutswa ive nu u gerehidza mulungi, a vule kukola ubwoni, naye na a vula kukola ubwoni ligali a la hindira, kigira a bugirira ligerehidza; na ive u mali kuhonnya mwoyo gugwo.

²²Mukono gwa Yahova gwa li ku inze ha zana; na ya mbolera, Vuka, u tsie imbiri mu kereremu, nda volera nira yo nive.

²³Ma, nda vuka nonoho, ni ntsia imbiri mu kereremu: henza, ubukumi bwa Yahova bwa singira yo, kuli ubukumi bwa nda lola ahimbi nomugera gwa Kebari; na nda gwa mammama.

²⁴Hene yaho Roho yingira mu inze, na ya nsingeridza nevirenge vyange, na ya vole rana ninze, ni ya mbolera, Tsia, wehanire mu inyumba yoyo.

²⁵Navutswa ive mwana womundu, henza, va la vika migoye ku ive, na va la ku boha nagyo, na u la vula kutsia hagati havo:

²⁶na nda handidza lulimi lulwo mu kikalakula, na u la va idimbidi, na u la vula kuva mugerehidzi kuvo; kigira va veye inyumba yobwebaali.

²⁷Navutswa lwa mbolerana nive, nda kunula munwa gugwo, na u la va volera, Mwami Nyasaye a vola ndi: Uyu u huliranga, a hulire, na uyu u sulanga a sule: kigira va veye inyumba yebaala.